Harmony- शुक्र

 || श्री स्वामी समर्थ ||

शुक्राचा ठसा प्रत्येकाच्या आयुष्यावर कमी अधिक असतोच . आयुष्यातून सुख आनंद वजा केले तर आयुष्याला अर्थच उरणार नाही ते निरस होईल . शुक्र म्हणजे सकारात्मकता , निखळ आनंद आणि धबधब्यासारखे हास्य . शुक्रप्रधान व्यक्ती आजूबाजूला असतील तेव्हा वातावरण ताजेतवाने असते ,  शुक्राचा गोडवा हा माणसे जोडणारा आहे. असा हा शुक्र मने जोडणारा मनमिळाऊ आहे  म्हणूनच तो माणसातच रमतो .  भांडकुदळ नाही . असा हा शुक्र आपले आयुष्य सदाबहार ठेवत असतो. आपल्या चेहऱ्यावर निरागस हसू असणे हि देवाची देणगीच आहे . 

शुक्राचे अनेक रंग आहेत . शुक्र हा जलतत्व दर्शवतो . हा नुसताच प्रणयाचा , शृंगाराचा रस नाही तर उच्च कोटीची अध्यात्मिकता भक्तीचा  रस पण आहे. मागील लेखात आपण शुक्राचे उच्चत्व अनुभवले. रस म्हणजे ज्यामुले आपली तृषा भागते ,  आपल्याला आनंद मिळतो , आपली रसिकता शुक्र दर्शवतो मग ती कश्यातही असू शकते , एखादे वाद्य वाजवण्यात , अभिनय , फोटोग्राफी , सौंदर्यशास्त्र , पाकशास्त्र काहीही . शुक्रात प्रचंड आकर्षण शक्ती आहे . सिंह ह्या राजराशीतील शुक्र कमालीचा मादक असतो आणि राजासारख्या रुबाबात वावरणारा असतो . लग्नी शुक्र असणार्या व्यक्ती नेहमीच आनंदी , उत्साही , happening mode on असणार्या असतात . सकारात्मक आणि कलासक्त असतात . आज शुक्र कन्या राशीत कसा फलित  होतो ते पाहूया . कन्या राशी हि बुधाची , व्यावहारिक आणि अर्थ त्रिकोणातील राशी . भयंकर चिकित्सक आणि हुशार पण इथे शुक्राला न मानवणारे वातावण असल्यामुळे इथे तो चांगली फळे न देता निचीचा होतो. बुध हा पृथ्वी तत्वाचा ग्रह आहे. पृथ्वीच्या पोटात कायकाय सामावले आहे म्हणजेच सर्व गोळा करून ठेवण्याची वृत्ती आहे बुधाची , मला काय मिळणार हे पाहणारा आहे , त्यामुळेच त्याला वाणी म्हंटलेले आहे. उत्तम बुध असणारे लोक उत्तम व्यावसायिक असतात ते ह्याच कारणामुळे , इथे सगळी देवघेव आणि पैशांचे हिशोब , आकडेमोड आहे. शुक्र भाव भावनांच्या विश्वात रमणारा आहे आणि बुधाला तसेही तुमच्या इमोशन्स शी फारसे घेणे देणे नाही . त्यामुळे इथे शुक्र कोमेजून जायील , त्याच्या मोकळ्या स्वभावाला न पेलणारी हि बुधाची राशी आहे. 

नुसत्या आकर्षणावर बुध काम करत नाही .  बुधाचा तर्क आणि शुक्राचे प्रेम ह्या दोन भिन्न गोष्टी कश्या बरे एकत्र येतील ? थोडक्यात शुक्राची स्टाईल वेगळी आहे .

निसर्ग कुंडलीत कन्या राशी षष्ठात येते जिथे आपले रिपू आहेत , इथे सेवा आहे . मोजून मापून प्रेम करणे किंवा मला काय मिळणार ह्या भावनेपोटी फक्त प्रेम करणे हे शुक्राला मुळीच मान्य नाही . शुक्र धबधबा आहे मग तो प्रेमाचा असो कि हास्याचा ..निर्मळ आहे , सौख्य प्रद आहे.  व्यावहारिकता ह्या गोष्टीशी शुक्राचा ह्या गोष्टींशी दूरदूरचा संबंध नाही कारण त्याला मदहोश , मनसोक्त जगणे माहित आहे त्यामुळे इथे शुक्र नीच होतो. 

वैवाहिक सुख म्हंटले कि सर्वप्रथम लक्ष्य जाते ते शुक्र ह्या ग्रहावर . शुक्र नीट तपासावा लागतो . शुक्राचे नवमांश बळ पाहिले पाहिजे . शुक्र जर कन्या राशीत आणि कन्या नवमांशातच असेल तर अश्या पत्रिकांचा अभ्यास  वैवाहिक सुखासाठी केला तर उत्तर मिळेल . 

शुक्र केतू युती हि शुक्राचे सर्व रसिक, सकारात्मक गुण शोषून त्याला शुष्क करणारी आहे. केतुला तर काहीच दिसत नाही तो मनाचा चष्मा लावून जग बघतोय आणि शुक्र हा आनंदाचा स्त्रोत त्यामुळे हि युतीही अभ्यासावी लागते . एका ओळखीच्या स्त्रीची पत्रिका पहिली . अनेक वर्ष मी त्यांना ओळखत होते . कधीच खळखळून न हसणे , साधे कपडे , 30 वर्षाच्या वयात ५० वर्षाच्या स्त्रीचा पोक्तपणा , नटण्याची आवड नाही . पत्रिकेतील शुक्र केतू युतीने मला सगळी उत्तरे दिले . शुक्र वैवाहिक सुखाचा कारक ,त्यांचे सप्तम स्थान पापकर्तरीत आणि सप्तमेश हर्षलच्या कुयोगात त्यात भर म्हणून शुक्र केतूच्या अंशात्मक युतीत . अकाली वैधव्य आले. शुक्र केतू युती ने जीवनातील सर्व मधुर रसांची चव चाखू दिली नाही .

शुक्र म्हणजे अष्टलक्ष्मी. शुक्राच्या दशेत कुलस्वामिनीची सेवा करावी . सर्वच स्त्रियांनी आपल्या कुलदेवीचा जप करावा. शुक्रवारी पांढरे वस्त्र किंवा तांदूळ दान करावेत . नवग्रह स्तोत्रात दिल्याप्रमाणे शुक्राचा जप करावा .

सौ. अस्मिता दीक्षित 

संपर्क : 8104639230 

  

हृदयस्पर्शी लेखन – गुरुकृपा

 || श्री स्वामी समर्थ ||

आपल्या मनातील भावना समोरच्यापर्यंत पोहोचवण्याचे “ शब्द “ हे एक प्रभावी माध्यम आहे. उत्तम शब्द संग्रहातून एका प्रभावी लेखाची निर्मिती होत असते. लेखन हे खरोखरच एक कौशल्य आहे . मोजक्याच शब्दात भला मोठा आशय व्यक्त करणे हे एक स्कील आहे म्हंटले तर वावगे ठरू नये. लेखन हे हृदयस्पर्शी  असले पाहिजे. शब्दांची योग्य मांडणी , योग्य वेळी परिच्छेद ,अवघड शब्द न घेता सहज सुलभ ओघवती भाषा समोरच्याला चटकन समजते. लेखात रोजच्या जीवनातील उदाहरणे असावीत , फार क्लिष्ट आणि अलंकारित भाषा कंटाळवाणी असते. आजकाल लोकांना वेळ कमी असतो त्यामुळे पटकन प्रवासात , चहा घेताना किंवा अगदी बस ची वाट पाहत असताना सुद्धा एखादा लेख पटकन वाचून होईल अश्याप्रकारे त्याची रचना असेल तर लोकांना वाचायला नक्कीच आवडेल. थोडक्यात लेखाचा मुख्य विषय मांडताना तो व्यवस्थित मांडलाही पाहिजे पण लेखाची लांबी रुंदी लक्ष्यात घेवून.

अनेक लोक माईक हातात आला कि सोडतच नाहीत शेवटी लोक टाळ्या वाजवायला लागतात तसेच लेखणी हातात आली आहे म्हणून काय आणि किती लिहायचे ह्याचे भान हवे. लेख मोठा असेल तर “ क्रमशः .. “ असलेला बरा. मुळात ज्या विषयावर आपल्याला लेखन करायचे आहे त्या विषयाची उत्तम जाण असली पाहिजे . लेखातून आपल्याला काय संदेश द्यायचा आहे आणि त्याच्याशी आपण स्वतः सहमत आहोत ना ह्याची खात्री असली पाहिजे . हा लेख कुठल्या वयोगटातील लोकांसाठी आहे हेही माहित हवे. थोडक्यात आपल्या लेखाचा वाचक वर्ग कोण असणार आहे ? लेखांवरती येणाऱ्या सर्व प्रतिक्रिया मग त्या काहीही असोत , मोठ्या मनाने स्वीकारता आल्या पाहिजेत . फक्त आपल्यालाच अक्कल आहे असे नाही तर लोक आज चोखंदळ आहेत , उत्तम लेखक कोण निर्माण करतात तर उत्तम वाचक त्यामुळे वाचकांच्या मतांचा योग्य आदर सन्मान करून त्यांच्या सूचनांचा विचार सुद्धा झाला पाहिजे.  सोशल मिडियावर अनेकदा कुणी काही व्यर्थ , अर्थहीन किंवा त्रास द्यायला सुद्धा कॉमेंट करू शकतात त्यामुळे काय घ्यायचे आणि काय सोडायचे , कुठे दुर्लक्ष करायचे तेही माहिती हवे अर्थात अनुभवाने ह्या सर्वच गोष्टी येतात .

सर्वात महत्वाचे आहे ते लेखाचे “ शीर्षक “ . आजकालच्या भाषेत सांगायचे तर ते “Catchy “ म्हणजेच आकर्षक असले पाहिजे त्यातून लेखाचा विषय समजला पाहिजे . शीर्षक वाचून लेख वाचायची उत्सुकता निर्माण होईल इतके ते मर्म भेदक असले पाहिजे . लेखकाच्या शीर्षकातच लेखाचे गुपित आणि विषय दडलेला आणि लेखाचे यश असते. 

लेखन हे एक प्रभावी माध्यम आहे. समाजाची विचारधारा संपूर्णपणे बदलण्याची ताकद ह्या लेखणीत आहे त्यामुळे सर्वप्रथम ह्या लेखणीला तसेच आपल्या सद्गुरुना वंदन करूनच लिहावे . मनात विषयाची समज पक्की हवी . मूळ मुद्दे हवे तर लिहून काढावे आणि त्यानुसार परिच्छेद करून लिहावे. विषय कुठेही भरकटत जाणार नाही ह्याचे भान असावे. आपले म्हणणे वाचकांच्या  हृदयाचा ठाव घेणारे असेल तरच त्याची पोचपावती आपल्याला मिळेल. अनेकांचे अनेक विचार असू शकतात , म्हंटले आहे ना  व्यक्ती तितक्या प्रकृती त्यामुळे आपले विचार दुसर्याच्या गळी मारू नये किबहुना तसा अट्टाहास अजिबात नसावा , प्रत्येकच दृष्टीकोण अर्थात वेगळा असणारच आहे . लेखन हे फक्त “ Likes “ मिळवण्यासाठी नसावे तर समाजाला वाचकांना त्यातून काहीतरी मिळाले पाहिजे . काहीतरी देणारे , बुद्धीला खाद्य आणि विचार मंथन , जनजागृती करणारे लेखन असावे . 

आजवर मी केलेलं लेखन मला अतीव समाधान देऊन गेले आहे. माणसाने तेच काम करावे ज्यात त्याला आनंद मिळतो आणि समाधान. अध्यात्मिक लेख लिहिताना मला अनेकदा ईश्वरी अनुभूती सुद्धा आली आणि तीच माझ्या लेखनाला प्रेरणा ठरली असावी . लेखन हे सकारत्मक असले पाहिजे, विचार मंथन करायला लावणारे असले पाहिजे . दुसर्याला आणि स्वतःलाही जगायला लावणारे असले पाहिजे . जगण्याची उमेद निर्माण करणारे आणि आपल्या मनातील प्रश्नांची उत्तरे देणारे असावे.  उत्तम लेख म्हणजे ज्ञानमय ज्योत आणि त्या  ज्योतीच्या प्रकाशात  स्वतःचे आत्मचिंतन आणि स्वतःतील 

“ मी “ शोधता आला तर लेखन प्रपंच फळास आला असे समजायला हरकत नाही .

ज्योतिषीय दृष्टीकोनातून लेखन कौशल्य अभ्यासताना मी माऊलींच्या पत्रिकेचा अभ्यास करीन . ज्ञानेश्वर माऊली ह्यांनी लिहिलेली ओं नमोजी आज्ञा , मोगरा फुलाला , अजी सोनियाचा दिनू हि काव्ये अजरामर झालेली आहेत . लेखनाचा मुख्य ग्रह बुध आणि ज्ञानाशिवाय लेखणी उजळणार नाही त्यामुळे ज्ञानाचा सागर गुरु. बुध ला योग्य रीतीने वळवायचे काम गुरूकडे आहे. लेखन हाताने लिहिले जातात म्हणून हात , बाहु महत्वाचे . बुध आणि गुरु सोबत नेप हा लेखनासाठी अंतस्फुर्ती  देणारा ग्रह तसेच मनाचा कारक चंद्र सुद्धा तितकाच महत्वाचा . ज्ञानेश्वर माऊलींचे बुद्धीसामार्थ्य अचाट आणि विस्मय चकित करणारे होते . इतक्या लहान वयातील त्यांची समज वाखाणण्याजोगी होती. वयाच्या 16 व्या वर्षी ज्ञानेश्वरी सारखा ज्ञानाने भरलेला अमृतासारखा ग्रंथ त्यांनी रचला जो आज पुढील कित्येक पिढ्यांना मार्गदर्शक ठरत आहे. कुंडलीच्या लाभ ते तृतीय भावापर्यंत त्यांच्या कुंडलीत गुरु चंद्र शुक्र राहू बुध ह्यासारख्या बलाढ्य ग्रहांचे अधिष्ठान आहे खांद्याचा वरचा भागात हे सर्व ग्रह आहेत . खांद्याचा वरील भाग म्हणजे जिथे मेदू आहे म्हणजेच बुद्धी मन विचारप्रणाली . बुद्धीचा कारक गुरु लाभेश लाभात , लग्नात उच्चीचा चंद्र जो तृतीयेश सुद्धा आहे ,चंद्र स्थिर राशीत ,  बुध गुरु नवपंचम , शुक्र बुधाच्या राशीत , चंद्र बुध लाभ , लग्नेश शुक्रवार व्ययेश मंगळाची दृष्टी , कीर्ती सातासमुद्रापलीकडे गेली , तृतीय स्थान आणि चंद्र शुक्र गुरु ह्यामुळे जनमानसात प्रसिद्धी मिळाली . त्यांच्या लिखाणात तरलता आणि अपार सौंदर्य होते.

लेखन हि एक कला आहे आणि अनेकदा ती उपजत असायला लागते हा माझा अभ्यास सांगतो . ठरवून काहीही लिहिता येत नाही पण अभ्यास पूर्ण लेखन लेखनाचा दर्जा उंचावते . ओघवती आणि सहज सोपी भाषा वाचकांशी जवळचे नाते जोडते. सरतेशेवटी सर्वात मुख्य म्हणजे सद्गुरूंचा आशीर्वाद . स्वतःची साधना , उपासना , वाचन , संशोधन , विचार मंथन , अंतर्स्फुर्ती , योग्य वेळी योग्य विषयाची निवड करून केलेल्या लेखांची निर्मिती आत्यंतिक समाधान देते आणि वाचकांना अंतर्मुख होण्यास कारणीभूत ठरते.

लेखन कौशल्य हा गुरूंचा आशीर्वाद . लेखन करणे हे खचितच सोपे नाही त्यालाही कष्ट आहेत , आपला जीव ओतावा लागतो . लेखन हि गुरुकृपा आहे त्याचा योग्य मान ठेवावा ,  इतरांचे लेख चोरून साहित्य चोरी करून आपण सद्गुरूंच्या रोषास कारणीभूत होणार ह्याचे भान ठेवावे कारण आजकाल साहित्य चोरी हा प्रकार सर्रास आढळतो . तसेही लेख चोरून लेखकाची प्रतिभा तर नाही चोरता येणार हेही तितकेच खरे आहे. विचार व्हावा .  

आज ह्या लेखाच्या निम्मित्ताने सर्व वाचकांना माझा सादर प्रणाम , आपल्या वेळोवेळी मिळालेल्या अभिप्रायांमुळे लिहिण्यास प्रोत्साहन मिळाले त्यामुळे मी आपली सर्वांची मनापासून ऋणी आहे. आपल्या सर्वांच्या सूचना अनमोल आहेत आणि आपले आशीर्वाद सुद्धा ते असेच पाठीशी असुदेत .श्री स्वामी समर्थ . 

सौ. अस्मिता दीक्षित

संपर्क : 8104639230 

निस्सीम भक्ती

|| श्री स्वामी समर्थ ||

लहान मुले घरात खेळत असतात , खेळतात खेळता भांडतात , कधी भूक लागते मग आईला हाक मारतात . आई स्वयपाक घरातूनच ओरडते “ थांब जरा आले हातातले काम झाले कि येते “ . पण जेव्हा मुलाला कुठेतरी लागते तेव्हा तो जोरात आईला हाक मारतो आणि तेव्हा मात्र क्षणाचाही विलंब न लावता आई धावत येते. 

आपलेही तसेच आहे. आपण रोज आपल्याला जमेल तशी भगवंताची , आपल्या महाराजांची सेवा करत असतो . पूजा , नामस्मरण , प्रदक्षिणा  , पोथी वाचन माध्यम काहीही असो पण आपली तोडकी मोडकी भक्ती त्यांच्यापर्यंत पोहोचत असते. अनेकवेळा आयुष्यात चढ उतार येतात आणि अश्यावेळी आपण आपल्या महाराजांच्या चरणाशी धाव घेतो. खरतर काहीतरी मिळवण्यासाठी भक्ती करू नये. जे हवे आहे ते महाराज न मागताच देणार आहेत तेही भरभरून . गजानन रुपी जमिनीत जेजे पेराल ते ते बहुत करून मिळे तुम्हा हे दासगणुनी लिहिले आहे आणि त्याची प्रत्येक क्षणी प्रचीती भक्तांना येतेच आहे. 

आपल्या भक्तीत सातत्य हवे , निर्मळ मनाने फक्त महाराजांच्यावर असलेल्या प्रेमापोटी त्यांच्या नामाचा ध्यास हवा , श्वासात त्यांना विराजमान केले आणि त्यांचे गुणगान गायले तर आयुष्य किती उंचीवर जायील हे सांगणे नको. 

आज हजारो लोक श्री गजानन विजय ग्रंथाचे पठन करत आहेत , नामस्मरण करत आहेत पण तरीही आम्ही इतके करूनही आमची संकटे विघ्ने दूर होत नाहीत असा तक्रारीचा सूर असतो.  ह्याचे कारण म्हणजे वर दिलेले उदा. अंतर्मनापासून महाराजांना साद घातली तर आई जशी सर्व कामे सोडून मुलासाठी धाव घेयील अगदी तसेच महाराज सुद्धा येणार ह्याची खात्री बाळगा. वरवरची भक्ती उपयोगाची नाही. त्यातील आर्त भाव , त्यातील भाव आणि भक्ती त्यांच्या पर्यंत त्यांच्या हृदयापर्यंत पोहोचली पाहिजे . ती कळकळ त्यांना जाणवली पाहिजे . तारा अथवा मारा हि भावना त्यांना आपल्यापर्यंत आणल्याशिवाय राहणार नाही.  

अध्यात्म सोपे नाही तिथे समर्पण पाहिजे. आई आणि मुलाचे जे नाते तेच आपले आणि आपल्या गुरूंचे आहे . नुसतेच घरात फोटो लावून आणि नेवेद्य करून होणार नाही . देवाचिये द्वारी उभा क्षणभरी ...पण निदान तो क्षण तरी तू आणि मी दोघेच असू त्यात तुझी भौतिक सुखे आणि आजूबाजूचे जग नको इतकेच मागणे आहे त्या भगवंताचे आपल्याकडे .पण आपण तो क्षण सुद्धा त्याचे होऊ शकत नाही मग तो तरी आपला कसा होणार सांगा बर . पटतय का?

ज्याच्यासाठी एक क्षण आपण समर्पित करू शकत नाही तो आपल्यासाठी वाटेल त्या वेळी हाकेला धावून येयील अशी वेडी आशा का ठेवावी आपण. मुळात उठ सुठ त्यांना हाक मारू नये. आपले भोग आपणच भोगून संपवायचे आहेत . जन्म मृत्युच्या फेर्यात ते काहीही करणार नाहीत पण आपल्या आतला आवाज ते ऐकल्याशिवाय राहणार नाहीत हेही खरे.

भक्तीत समर्पण पाहिजे. बापूना काळे ला जेव्हा महाराजांनी दर्शन दिले तेव्हा त्यांनी हेच सांगितले कि त्याच्यासारखी भक्ती करा . महाराज त्याच्या सोळा आणे भक्तीनेच तर प्रसन्न झाले. आपण पुरणपोळीचा नेवैद्य दाखवतो पण जप करताना कुकरच्या शिट्या किती होतात ह्या कडे लक्ष्य असते . संपूर्ण ब्रम्हांडात महाराज आणि आपण दोघेच आहोत असे समजून ध्यान करा , जेव्हा पोथी वाचाल नाम घ्याल तेव्हा ते समोर बसले आहेत अगदी सगुण रुपात असे मनी ठेवा आणि मग बघा काय सेवा होईल तुमच्याकडून . मानसपूजा हि सर्वश्रेष्ठ आहे त्यात नक्कीच दर्शन देतील ते आपल्याला. 

सेवा भाव सर्व श्रद्धेच्या खोलीवर आहे. जितकी आपल्या श्रद्धेची खोली अधिक समर्पणाची शक्ती अधिक तितके फळ अधिक. मी माझा लेख त्यांच्याचरणी ठेवते आणि नतमस्तक होते पुढे तो कुणी वाचायचे हे तेच ठरवतात ह्यावर माझा विश्वास आहे.  

आपला जन्मच मुळी मोक्षाला जाण्यासाठी आहे पण आपण धर्म अर्थ काम ह्यात अडकून जीवनाचा खरा अर्थ समजून घेण्यापासून परे राहतो . हजारो लोक रस्त्याने जात होते पण बंकटलाल आणि पितांबरलाच महाराज कसे दिसले. किती दिव्य दृष्टी असेल त्यांची . आपणही कान नाक डोळे उघडे ठेवले तर निसर्ग आपल्या प्रश्नांची उत्तरे प्रत्येक क्षणी आपल्याला देत असतो . 

बंकटलाल , बापुना काळे , साळूबाई , पितांबर , गणू जवर्या , खंडू पाटील ह्यासारखे भक्तांचे जीवन महाराजांच्या सेवेमुळे सार्थकी लागले. आपण नको त्या गोष्टींचे अनुकरण करण्यापेक्षा ह्यातील एखाद्या भक्ताचे , त्यांनी केलेल्या भक्तीचे आणि समर्पणाचे , सेवेचे अनुकरण केले तर आपलेही जीवन कृतार्थ झाल्याशिवाय राहणार नाही.

सौ. अस्मिता दीक्षित
संपर्क : 8104639230 

 

 

भवसागरातील राहू ( राहू चा राशी बदल )

 || श्री स्वामी समर्थ ||

राहू आता राशी बदल करत आहे . राहूला सुद्धा  शनी सारखे सर्वांनी व्हिलन करून टाकले आहे . राहू दशा आली आता आपले बारा तेरा वाजणार असे आपण गृहीतच धरतो. ज्योतिष शास्त्राला राहू केतुनी जणू काही ग्लामर प्राप्त करून दिले आहे. राहू केतूचे लेख आज सोशल मिडीयावर वाजत गाजत येताना दिसतात . त्याला कारणही तसेच आहे राहूची जनसामान्यांच्या मनात असलेली अनामिक भीती . ती खरच खरी आहे का? बघुया .

राहू आणि केतू दर 18 महिन्यांनी राशी परिवर्तन करतात . त्यांना स्वतःची राशी नाही त्यामुळे ते राशी स्वामीचे  फळ प्रदान करण्यास बांधील आहेत तसेच त्यांच्या नक्षत्रस्वामी प्रमाणे सुद्धा फळ देतात. कृष्णमुर्ती मध्ये राहू आणि केतू ह्यांना अनन्य साधारण महत्व दिले आहे. तसेही कुंडलीत असलेला राहू सर्वप्रथम लक्ष्य वेधून घेतोच . पण प्रत्येक वेळी तो वाईट करेल असे निदान करणे म्हणजे आपल्या तोकड्या अर्धवट ज्ञानावर शिक्कामोर्तब आहे. 

राहू  सुद्धा अध्यात्माचा ग्रह आहे आणि मीन राशीसारख्या मोक्ष दायी राशीत येणारा ग्रह आपल्या सर्वाना स्वतःच्या बद्दल विचार करायला अंतर्मुख होण्यास भाग पाडणार आहे. आपल्या आतमध्ये आपले अस्तीत्व  शोधायला लावणार आहे. त्यामुळे योगा , साधना , आत्मचिंतन ह्यात आता मानवजात प्रगती करेल आणि एका उच्चतम अश्या अध्यात्मिक जगताची निर्मिती होईल.  आजच्या स्पर्धात्मक जगतातील प्रत्येकाला जो घड्याळ्याच्या काट्यावर आपले जीवन व्यतीत करत आहे, प्रचंड स्पर्धेला तोंड देताना ज्याची दमछाक होत आहे अश्या प्रत्येकाला आज थोड्या शांततेची आवश्यकता आहे ती मीनेतील राहू नक्कीच देणार आहे. 

राहुला  स्वतःची रास नाही त्यामुळे आता मीन राशीच्या स्वामीप्रमाणे तो फळ देयील म्हणजेच गुरूप्रमाणे फळ देणार आहे. 

गुरु हा नैसर्गिक शुभ आणि आत्मिक उन्नती करणारा पारमार्थिक प्रवासाची आस असणारा ग्रह आहे. गुरु ब्राम्हण आहे संन्यस्थ आहे. प्रापंचिक जबाबदार्या पूर्ण करून परमार्थाकडे चला हे आत्म प्रबोधन करणारा आहे .त्यामुळे आता राहूची पाऊले गुरूच्या आदर्श मार्गावर चालणार आहेत .

मीन रास म्हणजे आता समुद्रमंथनाची पुनरावृत्ती होणार . स्वरभानू राक्षस हा समुद्र मंथनाच्या वेळी देवतांच्या वेशात देवतांच्याच मध्ये जाऊन बसला होता . त्यामुळे आता पुढील दीड वर्ष आपण सर्वांनी आपल्याला भेटणारी माणसे हि सज्जन आहेत कि दुर्जन असून सज्जनांच्या मुखवटा धारण केलेली आहेत . आपल्याला भेटणारी प्रत्येक व्यक्ती देव आहे कि दानवांच्या रूपातील देव ह्याची खात्री करूनच पुढे पाऊल टाकायचे आहे. आपल्याला मिळालेली माहिती खरी आहे कि नाही हे पुन्हा पुन्हा तपासून बघणे आवश्यक होणार आहे. 

गुरूच्या रुपात राहू तर नाही ? चुकीच्या गोष्टींपासुन दूर राहण्यासाठी सावकाश निर्णय घेणे आवश्यक आहे. मीन हि मोक्षाची राशी आहे आणि इथे भक्ती समर्पण आहे. पण राहू भरकटायला लावणार आहे तेव्हा आपण भक्ती नेमकी कश्याची करत आहोत आणि आहारी कश्याच्या जात आहोत ते महत्वाचे आहे. सागर सर्व काही वाहून नेणारा आहे पण वाहवत जाण्यासाठी भक्ती करायची नाही तर आयुष्यात स्थिरता येण्यासाठी भक्तीचे प्रयोजन असले पाहिजे . कुठल्याच गोष्टीत राहू आपल्याला वाहवत तर नाही ना नेत त्याचे आत्मचिंतन झाले पाहिजे. आपण गुरु चरणांवर समर्पित होत आहोत कि चुकीच्या मार्गाने जात आहोत हे समजण्यासाठी ध्यान धारणा , शांतपणे निर्णय घेणे आवश्यक आहेत . जीवनाचा  संपूर्ण प्रवास बदलण्याची ताकद ह्या मीनेतील राहुमध्ये आहे  ज्याला आपण परिवर्तन म्हणतो. एका नवीन रूपातील तुमचा प्रवास सुरु करण्याचे काम राहू करणार . मद्य सेवनात मदमस्त होऊन समुद्रातील भोवर्यात अडकायचे कि उच्च कोटीची साधना करून अध्यात्माची कास धरायची ते प्रत्येकाने ठरवायचे . 

राहू हर्षलची साथ सोडून स्वतंत्र होणार. शनि आणि हर्षलच्या कर्तरीत येणार. तेव्हा नव्या-जुन्याचा संघर्ष अटळ आहे. पण शनिमहाराज कुंभेत आहेत. ते न्यायाधीशाच्या भूमिकेतून न्याय करणार. तेव्हा राहूच्या प्रभावाखालील बॉलीवूडने आणि राजकारण्यांनीही न्यायाधीशांचा सामना करण्याची तयारी ठेवावी. गुरु सुद्धा राहूच्या कचाट्यातून मुक्त होणार आहे त्यामुळे गुरु आणि शनी उत्तम काम करतील. कुठलेही ग्रह आपले शत्रू नाहीत , एखादी घटना आयुष्यात घडणे हे सर्वस्वी आपल्या केलेल्या कर्मावर अवलंबून आहेत . आपण आपली कर्म शुद्ध ठेवावीत हे उत्तम , उठसुठ ग्रहांवर खापर फोडणे बंद करावे. ग्रह आपल्या कल्याणासाठी आहेत त्यांना दुषणे का लावायची , पटतय का? आज पाकशास्त्र असो अथवा ज्योतिष , विज्ञान . गेल्या काही वर्षात youtube सारखे माध्यम जनमानसात फार वेगाने प्रचलित झाले आणि आज अनेक लोकांच्या कर्तुत्वाला youtube च्या माध्यमातून प्रसिद्धी मिळाली ती कुणामुळे ? अर्थात राहूमुळे . आपल्या विचारांना ,  कलेला लाखो लोकांपर्यंत नेणारा राहू हा आधुनिक जगतातील दूत आहे आणि त्यामुळेच गेल्या काही वर्षात प्रसिद्धी मिळालेल्या अनेकांचे  हजारो फोलोअर झपाट्याने वाढत गेले हे यश राहुचेच आहे. प्रगत युगाचा आणि पर्यायाने सोशल मिडीयाचा राहू हा “ कणा “ आहे.

प्रत्येक शुभ ग्रह हा संपूर्ण शुभ नाही आणि पापग्रह हा संपूर्ण पापग्रह नाही. आपली सोच आणि विचार , संशोधन ,अभ्यास आपल्याला ह्या ग्रहांच्या खर्या तत्वांची ओळख करून द्यायला सक्षम आहेत . सोशल मिडीया द्वारे आणि इंटरनेट च्या माध्यमातून आज राहुने जग जवळ आणले आहे. माझा हा लेख तुम्हा सर्वांपर्यंत पोहोचवणाऱ्या राहुला सलाम .

भवसागराच्या राशीतील राहू आपल्याला अध्यात्माची गोडी लावेल आणि मोक्षाची द्वारे खुले करून देण्यास उत्सुक आहे , आपण किती समर्पित आहोत ह्यावर सर्व काही अवलंबून आहे. 

सौ. अस्मिता दीक्षित

संपर्क : 8104639230

शुक्राचे अध्यात्म

 || श्री स्वामी समर्थ ||

जिथे आनंद तिथे शुक्र . शुक्र हा भौतिक सुखाचा मेरुमणी आहे.  माणसाला सुखासीन आयुष्य जगायला लागणाऱ्या सर्व गोष्टींचा कारक शुक्र आहे. मग अलिशान वाहन असो कि पर्यटन , उंची वस्त्रे असो कि मौल्यवान दागिने , मधुर वाणी असो कि अत्तर किंवा सुमधुर संगीत...सर्वांवर हक्क शुक्रचाच . शुक्र हा कन्या राशीत  नीच फळे देतो तर मीन राशीत उच्च . मीन राशीच त्याने उच्च होण्यासाठी का निवडली असावी हा प्रश्न अभ्यासकांना पडला पाहिजे कारण जितके प्रश्न अधिक तितका अभ्यास सखोल .

मीन हि कुंडलीतील व्यय भावात येणारी राशी , ह्या राशीला मोक्षाची राशी सुद्धा म्हंटले जाते . इथे शरीराची पाऊले येतात. मीन हि अथांग महासागराची रास आहे. सागर सर्वांनाच समाविष्ट करणारा त्यामुळे हि लोक सर्वाना हृदयात सामावून घेणारी , सदाचारी , सहानुभूती , भूतदया असणारी असतात . इथे संवेदनशीलता , प्रेम आहे. ह्याचे बोध चिन्ह पाहिले तर उलट सुलट मासे म्हणजे जणू काही आत्मा आणि परमात्म्याचे मिलन करणारी हि राशी .व्यव भाव हा मोक्ष त्रिकोणातील अखेरचा भाव . 

ह्या महासागरात जीवनातील सगळे चढ उतार , सुख दुक्ख सामावलेली आहेत .मीन राशीत आपल्या आयुष्याची यात्रा संपते आणि पुन्हा जेव्हा आपण मेषेत प्रवेश करतो तेव्हा आपल्या आत्म्याचा नवीन प्रवास सुरु झालेला असतो . आपला आत्मा म्हणजेच रवी , सूर्य . म्हणूनच मीन राशीतून सूर्य जेव्हा मेष राशीत प्रवेश करतो तेव्हा तो उच्चीची वस्त्रे परीधान करतो. 

ह्या भावापर्यंत यायला व्यक्तीला आधीच्या अकरा भावातून प्रवास करावा लागतो तेव्हा कुठे तो मोक्षाला पोहोचतो. आयुष्य सर्वार्थाने म्हणजेच धर्म अर्थ काम ह्या त्रिकोणांचा पुरेपूर अनुभव घेतल्याशिवाय मोक्षाचा खरा आनंद दुर्मिळ आहे. 

सूर्य आणि चंद्र हे प्रकाश देणारे आहेत . आपल्याला मार्ग दाखवणारे आहेत . पण प्रकाशासोबत सावली सुद्धा येते त्यामुळे त्याचाही विचार असला पाहिजे . असो .

मी नामस्मरण करतेय पण मन शांत नाही कारण काही ना काही इच्छा अजून अपूर्ण आहे. सर्व इच्छा पूर्ण होतात तेव्हाच मन परमेश्वराच्या चरणाशी खर्या अर्थाने रमते . आयुष्याची अखेरच आपल्याला खरे ज्ञान देत असते. आणि ते देणारा दुसरा तिसरा कुणी नाही तर सगुण भक्तीचा कारक “ शुक्र “ आहे. अनेक संतांच्या पत्रिकातून आपल्याला हा मीनेतील शुक्र भेटतो . शुक्र हा फक्त विलासी ग्रह नाही . असे असेल तर शुक्राचा अभ्यास अपूर्ण आहे असे म्हंटले पाहिजे. मीन रास हि मोक्षाची आहे आणि तिथे गुंतवणूक आहे ती फक्त पैशाचीच नाही तर भावनांची सुद्धा . आपले सर्वस्व परमेश्वराच्या चरणावर वाहताना भक्ताच्या डोळ्यातून ज्या अश्रुधारा वाहतात त्या म्हणजेच “ शुक्र “ . हे संवेदना वाहून नेणारे जल आहे. हा शेवटचा क्षण  तेव्हा काहीच आठवत नाही , आठवते ते फक्त त्याचे रूप , निर्गुण आणि निराकार . शेवटच्या प्रवासात जेव्हा सर्व बंधने तुटली जातात , सर्व सोडून जातात तेव्हा त्याचे आपल्याभोवतीचे अस्तित्व जाणवू लागते आणि तोच खरा सर्वार्थाने आनंद देणारा क्षण फक्त “ शुक्र “ आपल्याला देऊ शकतो. जितक्या आनंदाने संपूर्ण आयुष्य जगलो त्याही पेक्षा स्वतःला परमेश्वराच्या स्वाधीन करणारा तो क्षण किती सुखद , परमोच्च आनंदाचा असेल नाही आणि त्या क्षणाचे प्रतिक म्हणूनच ह्या शुक्राने ह्या सागरा सारख्या विशाल मनाच्या मीन राशीत स्वतःला उच्च होण्याचा मान दिला असावा. मीन राशी खोल अथांग सागराची असल्यामुळे इथे गूढत्व , सखोल ज्ञान आहे. 

व्यय म्हणजेच मोक्षाच्या भावापर्यंत पोहोचण्यासाठी आत्म्याला अकरा भावांचा प्रवास करायला लागतो तेव्हा परमेश्वर प्राप्ती होते आणि त्याच्या अस्तित्वाची अनुभूती मिळते . अगदी तसेच शुक्राला सुद्धा अकरा राशीतून प्रवास केल्यावरच मोक्ष्याच्या राशीत उच्च होता येते . सर्व सुखांचे आगर म्हणजे भगवंताचे चरण आहेत आणि आजवर अनुभवलेले सुख परमेश्वर सानिध्याच्या पुढे किती कवडीमोलाचे आहे हे मोक्षाच्या राशीतील हा आध्यात्मिक सगुण भक्तीच्या आनंदाचा आस्वाद घेतल्या शिवाय समजणार नाही. भौतिक सुखात गुरफटलेला हा आत्मा शेवटी भगवंताच्या चरणीच विलीन होतो तोच खरा “ शुक्र “ . सगुणभक्ती हि अनुभवायची असते , ज्याला आत्मिक मानसिक ओढ आहे त्यालाच ते चरण दिसतील आणि त्या चरणांना  आपल्या डोळ्यातील  अश्रूंनी भिजवून टाकताना जो परमानंद मिळतो तो जन्मोजन्मी टिकणारा असतो . मिनेतील शुक्र परमेश्वराच्या सान्निध्याची ओढ लावतो . जन्मल्यापासून आपण शुक्र जगात आहोत पण अखेरच्या काळातील मोक्षाच्या उबरठ्यावर नेणारा शुक्र आपल्या खर्या सामर्थ्याची जाणीव करून देतो. भक्ती आणि सेवा हेच खरे जीवन आहे हे पटवून देणारा शुक्र इथेच भेटतो . समाधानाच्या उच्च शिखरावर नेणारा आणि आपल्या शेवटच्या प्रवासात त्याचा हात आपल्या हातात देणारा हा शुक्रच आहे. शुक्राचे हे असीम अध्यात्मिक महत्व ज्याने जाणले त्याला मोक्षाचे द्वार खुले झालेच म्हणून समजा. . 

रेवतीच्या चतुर्थ चरणात 27 अंशावर उच्चत्व प्राप्त करणारा हा शुक्र असामान्य आत्मिक सुखाची परम अनुभूती देणार आहे.  हे सुख सहज नाही म्हणूनच 108 नक्षत्र चरणांचा प्रवास त्याला करावा लागला तेव्हा कुठे रेवतीचे चतुर्थ चरण त्याला दिसले. त्याच्या चरणाशी लीन होण्यासाठीच आपला जन्म आहे आणि त्याची सेवा म्हणजेच आपले आयुष्य आहे हेच तर जणू ह्या शुक्राला सांगायचे नसेल ना , म्हणूनच शुक्राने उच्च होण्यासाठी रेवती सारखे देवगणी नक्षत्र निवडले असावे . मीन रास म्हणजे वैकुंठ आहे आणि शुक्र स्वतः महालक्ष्मी चे प्रतिक आहे. शुक्र म्हणजे लक्ष्मी , अष्टलक्ष्मी . आयुष्यात उच्च शिखरावर जायचे असेल तर महालक्ष्मी आणि महा विष्णू ची उपासना फळ देयील. 

आजवर मिळवलेले सर्व काही शाश्वत नाही पण परमेश्वराच्या चरणाशी मिळालेला असीम आनंद खरोखरच शाश्वत आहे म्हणूनच तर तो सतचित आनंद आहे. 

क्षणभर विचार करा चंद्रभागेच्या काठाशी टाळ मृदुंगाच्या गजरात प्रत्यक्ष पांडुरंग जेव्हा देहभान विसरून गेलेल्या आपल्या वारकरया सोबत ज्ञानबा तुकाराम म्हणत टाळ धरतो त्याचे वर्णन कश्यात करणार आपण ? हे सर्व आपल्या आकलनाच्या बाहेर आहे , ह्या सर्वाचे शब्दात वर्णन होऊच शकत नाही,  हे फक्त अनुभवायचे असते . अगदी ह्याच प्रमाणे आपल्या आयुष्याची अखेर होताना त्याचा हात धरूनच त्याच्याच चरणाशी विलीन होतानाचा आनंद परमोच्च सुखाचा अविष्कार नाहीतर काय आहे . त्याची तुलना आयुष्यभर मिळवलेल्या कुठल्याच सुखाशी होऊ शकत नाही. 

मला लेखनाचा आनंद हा शुक्रच बहाल करत असावा. लिहिताना कुणीतरी आपल्याकडून लिहून घेत आहे असा भास मला अनेकदा होत असतो आणि माझ्याकडून तोच हे शब्दभांडार जणू खुले करत असावा . सांगायचे तात्पर्य असे कि ज्या सुखाच्या मागे आपण आयुष्यभर असतो ते शाश्वात सुख नसतेच . खर्या अर्थाने सुख हे आयुष्याच्या अंतिम क्षणी अनुभवायला मिळते ते मीन राशीत . कारण महाराजांच्या चरणाशी असणारा हा आनंद दुर्मिळ आहे आणि जेव्हा उमगते कि आयुष्यभर आपण ज्याला आनंद सुख म्हणत होतो तो सुखाचा निव्वळ भ्रम होता. खरे सुख तर भगवंताच्या चरणाशी आहे आणि हे चरण म्हणजेच पाउले जी मीन राशी दर्शवते . आपल्या महाराजंच्या चरणाशी विलीन होणे हे भाग्याचे लक्षण आहे.

सर्व अहंकार सोडून त्याच्या चरणावर नतमस्तक व्हा हे सांगणारा हा व्यय भाव आहे म्हणूनच इथे शरीराची पाउले आहेत .

नतमस्तक झाल्याशिवाय , आत्मसमर्पण केल्याशिवाय मोक्ष नाही. 

आज विजया दशमी ह्या साडेतीन मुहूर्तातील एक मुहूर्त असलेल्या अत्यंत पवित्र दिवशी आपण ह्या सगुण भक्तीचा आनंद लुटुया आणि हा शाश्वत आनंद टिकवण्याचा मनोमन निर्धार करुया , त्याच्या चरणी आपले संपूर्ण आयुष्य विलीन करुया कारण शेवटी तो त्याच्या अस्तित्वाची ग्वाही तुम्हाला तुमच्या अखेरच्या प्रवासात देतोच देतो. 

सौ. अस्मिता दीक्षित 

संपर्क : 8104639230

मनस्वी " छबी "

 || श्री स्वामी समर्थ ||

आपल्या मनासारखे काम करायला मिळणे हे एक भाग्याचेच लक्षण आहे. आपले छंद जोपासणे ह्यासारखा दुसरा आनंद नाही पण त्याहीपलीकडे आपल्याला आवडणारी गोष्ट नुसतीच एका छंदापुरती मर्यादित न ठेवता  त्याला व्यवसायाचे रूप देणे ह्यासाठी जिद्द , अभ्यासू वृत्ती , अपार कष्ट मेहनत लागते . 

साडी हा पेहराव सर्व स्त्रीवर्गाचा अत्यंत जिव्हाळ्याचा विषय आहे. वय कुठलेही असो साडी म्हणती कि कुठल्याही स्त्रीच्या चेहऱ्यावर लगेच स्मितरेषा उमटते . आजकालच्या आधुनिक जगात रोज आपल्याला वेगवेगळ्या फ्याशनचे कपडे बघायला मिळतात. ह्या सर्व स्पर्धेत टिकून राहणे हे एक आव्हान आहे . आज आपण अशाच एका मैत्रिणीची ओळख करून घेणार आहोत जिने हे आव्हान लीलया पेलले आहे. आपल्यातील कला आणि आधुनिकतेची जोड ह्याची सुरेख सांगड घालून वेगवेगळ्या प्रकारच्या साड्या तिने “ छबी “ ह्या ब्रांड मध्ये आपल्यासाठी आणल्या आहेत .चला तर गप्पा मारुया “ छबी “ ह्या ब्रांड च्या सर्वेसर्वा  सुप्रिया ढपाले पोवार सोबत.

आजकाल सगळ्यांना  काहीतरी “ हटके “ म्हणजेच काहीतरी वेगळे हवे असते . आजकाल विवाह , साखरपुडा , संगीत मेहेंदी ;अश्या अनेक सोहळ्यात वधू वेगवेगळ्या पेहरावात दिसते . आपण जग कितीही बदलले असे म्हंटले तरी जुने ते सोने हे खरे आहेच . विवाह सोहळा म्हंटला कि आपले सगळे पारंपारिक दागिने आणि साड्या डोळ्यासमोर रुंजी घालतात . अश्यावेळी “ हटके “ अश्या आणि वेगळेपणाचा ठसा असणार्या “ छबी “ ह्या सुप्रिया च्या ब्रांड च्या साड्या मन आकर्षित करतात . 

सुप्रिया मुळची कोल्हापूरची आणि राजाराम महाविद्यालयातून तिने आपले पदवी पर्यंतचे शिक्षण पूर्ण केले . पुढे MSc ( Environmental Science ) केल्यावर लगेच पुण्यात नोकरी मिळाली . सर्वसामान्य लोकात रमणारी सुप्रिया आजही आपल्या नोकरीतील सर्व सहकार्याशी उत्तम संपर्क ठेवुन आहे . 

नोकरी आणि व्यवसाय ह्यात खूप फरक असतो . व्यवसायात खूप चढ उतार असतात आणि त्यामुळे सर्व कुटुंबाचा पाठींबा असला तरच व्यवसाय यशस्वी होतो. सुप्रियाला तिच्या यजमानांनी आणि घरातील सर्वानीच खूप सहकार्य केले आणि त्यामुळेच आजचे सोन्याचे दिवस ती बघत आहे . नुसताच व्यवसाय नाही तर एक व्यक्ती म्हणून सर्वार्थाने त्यांनी मला घडवले आहे हे ती अभिमानाने सांगते . लग्नानंतर बाळाची चाहूल लागली आणि नोकरी ची मोहीम घराकडे वळली . माहेरी साड्यांचा व्यवसाय होता आणि अगदी कापड कसे विणले जाते ह्या लहान सहान गोष्टींची आणि त्यातील बारकाव्यांची तिला पहिल्यापासून माहिती होती . तिची आई सुद्धा फ्याशन डिझायनर आहे. पण हा व्यवसाय आजच्या प्रगत सोशल मिडीयावर आणण्याचे तिने ठरवले . Digital Marketing चा Course करून आपला व्यवसाय आणि आपले उत्पादन FB , Insta ह्या माध्यमातून लोकांपर्यंत कसे पोहोचवता येयील ह्यासाठी अहोरात्र मेहनत केली . सुप्रियाच्या प्रत्येक गोष्टीमागे अभ्यास असतो त्यामुळे त्याला एक खास असा प्रोफेशनल लुक असतो. आजच्या स्पर्धेला तोंड देताना ग्राहकाला काहीतरी वेगळे देण्याचा सततचा प्रयत्न आणि त्यातूनच निर्माण झालेला खास असा सुप्रिया टच असलेला “ छबी “ हा ब्रांड फार कमी वेळात लोकप्रिय झाला आहे. 

“ खण “ हि महाराष्ट्राची परंपरा , पारंपारिक वस्त्र आहे आणि ह्या परंपरेला आधुनिकतेची झालर लावून काहीतरी वेगळा साज चढवला तर सर्व वयोगटातील स्त्रियांना तो आवडेल हा विचार “ छबी “ तील प्रत्येक साडी करताना होता . “ खण “ ह्या पारंपारिक साडीच्या प्रकारातून काहीतरी वेगळे करण्याचे तिने ठरवले. आजकाल प्रत्येक कापड हे अगदी Authentic असतेच असे नाही त्यात इतरही धागे असतात . त्यामुळे आपण संपूर्णपणे “ Authentic खणाच्या “ साड्या त्याही वेगळ्या लुक मध्ये ग्राहकांना देण्याचा प्रयत्न करायचा असे मनोमनी ठरवले आणि सुप्रिया कामाला लागली. तिच्या छबी मधील प्रत्येक साडी वेगळी आहे आणि त्याची रंगसंगती तर मनाला भुरळ पाडणारी आहे. तिच्या studio मध्ये रेशमाच्या रंगांची जणू उधळण आहे आणि मनाला सुखावणार्या आणि मोहित करणाऱ्या वेगवेगळ्या साड्यांची दालने आहेत . 

छबी च्या साड्या वेगळेपणाचा ठसा उमटवतात . स्त्रियांना विचारले कि खरा खण ओळखायचा कसा ? तर त्याचे उत्तर कदाचित देता येयीलच असे नाही त्यामुळे सुप्रियाने खरा खण कसा ओळखायचा ह्याला प्राधान्य दिले आणि त्याबाबत आपल्या ग्राहकांची जनजागृती करण्यास सुरवात केली . खरा खण साड्यांमध्ये काठ हे अधिक पोलिश दिसत असतील तर त्यात polister mix असणार तेव्हा तो खरा खण नाही .  सुप्रियाने 80% कॉटन आणि उरलेले सिल्क म्हणजेच रेशमाचा वापर करून ह्या साड्या तयार केलेल्या आहेत . खण हा जरी पारंपारिक असला तरी आधुनिक फ्याशनची त्याला जोड देऊन सर्वच वयोगटात तो कसा आवडेल हा विचार करून तयार केलेल्या छबिच्या साड्या आज सगळ्यांचे लक्ष्य वेधून घेत आहेत . सध्याचा ट्रेंड हा मल्टीडिझायनर आहे म्हणून सुप्रियाने खण आणि इरकल ह्याचे फ्युजन करून एक वेगळाच लुक देणारी खणाची साडी तयार केली. साडी आकर्षक तर आहेच पण हलकी आहे . सहज नेसता येयील अशी आहे. ह्याव्यतिरिक्त फक्त सुती म्हणजे मल कॉटन साड्यांचे एक अप्रतिम दालन आहे. ज्यांना खण नको आहेत त्यांचे ह्या दालनात स्वागत आहे. सर्व प्रकारच्या हवामानात ह्या साड्या नेसता येतील असे सुप्रिया आवर्जून सांगते. 

“ छबी “ हे अगदी वेगळे पण ह्या व्यवसायाला अगदी साजेसे नाव कसे निवडलेस ह्यावर सुप्रिया म्हणाली ब्रांड जितका वेगळा तितके नाव सुद्धा हटकेच असले पाहिजे आणि तेही मराठमोळे . म्हणून तिने अनेक लावण्या ऐकल्या पण शब्द सुचत नव्हते . पण  “ छबीदार छबी “ हे गाणे सहज गुणगुणत असताना तिच्या डोक्यात “ छबी “ घट्ट रुजली . छबी म्हणजे प्रतिमा , एखाद्या स्त्रीची प्रतिमा , स्त्रीच्या सौंदर्याची , मनातील संसाराची प्रतिमा . आणि शेवटी “ छबी “ हे नाव सर्वांनाच आवडले आणि ते फायनल झाले. 

कोल्हापूर इथे सुरवात करत सुप्रियाने आता पुण्यापर्यंतची मजल गाठली आहे . कोल्हापूरचा studio आता अगदी कोल्हापूरच्या मध्यवर्ती भागात नव्याने साकारात आहे. आज प्रतिभा नगर कोल्हापूर मध्ये “ छबी “ अभिमानाने उभी आहे. 

मैत्रीणीनो , कुठलाही व्यवसाय सहज सोपा नसतोच . त्यात अपार कष्ट , मेहनत , यश अपयशाच्या पायर्या , कुटुंबाचा पाठींबा , भांडवलाची सोय अश्या एक ना दोन अनेक गोष्टी समाविष्ट असतात . असंख्य हात , अनेकांचे आशीर्वाद आणि आपल्या गुरूंचा वरदहस्त असेल तर काहीच अशक्य नसते . सुप्रियाने आपल्या मनातील स्वप्नांना मेहनतीचे पंख लावले आणि आज तिची छबी तुमच्या आमच्या मनातील खास कोपर्यात विराजमान झाली आहे. 

सोशल मिडीया वरचे , फेसबुक , इंस्टा वरील साड्यांचा लुक , रंगसंगती आपले लक्ष वेधून घेतल्या शिवाय रहात नाही. सुप्रिया आपल्यातीलच एक आहे. एक आई , एक गृहिणी आणि एक व्यावसयिक सुद्धा त्यामुळे प्रत्येक स्त्रीला नक्की काय हवे आहे हे तिला सहज समजते . त्यामुळे ग्राहकांना साडी खरेदी करताना तिच्या सूचनांचा नक्कीच उपयोग होतो . 

आपल्यातील अनेक मैत्रीणीना सुप्रियाचा हा प्रवास नक्कीच प्रेराणादायी ठरले ह्यात शंका नाही. तुमच्या आमच्यात दडलेल्या असंख्य सुप्रिया ह्यातून प्रेरणा घेवून आपापल्या स्वप्नांना फुलवतील तसेच उंच भरारी घेण्यास प्रयत्नशील राहतील अशी आशा आहे. 

सुप्रियाला तिच्या पुढील प्रवासासाठी मनापासून शुभेछ्या . “ छबी “ आम्हाला नेहमीच नवनवीन रुपात पाहायला मिळूदे हीच स्वामींच्या चरणी प्रार्थना .

सौ. अस्मिता दीक्षित 
संपर्क : 8104639230

  

 

सनई चौघडे

 || श्री स्वामी समर्थ ||

आप्तेष्ट किंवा नात्यात कुणाचा विवाह असेल तरी आपली त्यासाठी किती तयारी असते . आपलेही शॉपिंग आपल्याही नकळत सुरु होते . मग स्वतःचा विवाह असेल तर आपला उत्साह आसमंताला भिडला तर नवल वाटायला नको.

तुळशीचे लग्न झाले कि लग्न सराई सुरु होईल. दोन कुटुंबाना जोडणारा विवाह हा “ सेतू “ च आहे. आपल्या मुलाच्या डोक्यावर अक्षता पडताना पाहणे हे प्रत्येक आई वडिलांचे स्वप्न असते आणि ते डोळेभरून पाहता यावे ह्याची तिला आस असते. आजकालच्या काळात विवाहाच्या संज्ञा बदलल्या असल्या तरी शेवटी सप्तपदी करून सनईच्या मंगल सुरात  ते दोघे विवाहाच्या पवित्र बंधनात अडकले जातात , एकमेकांचे होतात आणि आयुष्यातील एका नाजूक हव्याहव्याश्या आणि मधुर सुरेल अश्या वाटेवर एकत्र वाटचाल करायला लागतात . 

हा सहजीवनाचा प्रवास सुखकारक आणि आनंददायी व्हावा हीच प्रत्येकाची इच्छा , मनीषा असते . योग्य जोडीदार मिळणे हे खरच भाग्याचेच लक्षण म्हंटले पाहिजे . असो . पत्रिकेत वैवाहिक सुख पाहताना प्रामुख्याने प्रणयाचा ,शृंगाराचा ग्रह  शुक्र ह्या ग्रहाचा कसून अभ्यास करावा लागतो . विवाह हा सप्तम्स्थानाशी निगडीत असल्यामुळे सप्तम स्थान आणि सप्तमेश तसेच त्यासंबंधी असणारी इतर ग्रहांची स्थिती अभ्यासावी लागते . विवाहासाठी पूरक महादशा सुद्धा लागते . विवाह ज्या जातकाचा आहे त्याची विवाह करण्यासाठी लागणारी इच्छाशक्ती महत्वाची . तसेच 2 4 5 8 11 12 हि स्थाने आणि त्याचे भावेश पाहावे लागतात . राशी कुंडली मध्ये चंद्राचा सप्तमेश कोण आहे ,चंद्राच्या सप्तमात कुठला ग्रह आहे. तसेच शुक्राच्या सप्तमात कुठला ग्रह आहे हेही पाहावे. दोघांपैकी एकाची दशा षष्ठ स्थानाशी निगडीत असेल तर दुसर्याची नाही ना हे सर्वात आधी पाहावे .

दोन्ही पत्रिकेतील चंद्र अभ्यासावा कारण विवाहानंतर गुलाबी दिवस संपले कि खरा संसार सुरु होतो आणि त्यात अनेक चढ उतार येतात तेव्हा एकमेकांना पडत्या काळात साथ सोबत करण्याची तयारी असली पाहिजे. मी हे लग्न स्वतःच्या मर्जीने केले आहे आणि मी ते टिकवणार आहे हि खुणगाठ मनात पक्की असली पाहिजे कारण लग्न होणे महत्वाचे नाही ते होतेच पण टिकते किती जणांचे ते महत्वाचे आहे . इथे पोकळ अहंकार कामाचा नाही . नुसते 25 गुण आणि 34 गुण जुळतात त्याच्या मागे न लागता ग्रह मिलन पुढील 25-30 वर्षाच्या महादशा , दोघांचे आरोग्य , मानसिकता , संतती योग , अर्थार्जन हे सर्व काही काळजीपूर्वक तपासावे कारण 36 गुण जुळून विवाह केलेली जोडपी घटस्फोटासाठी आज कोर्टाच्या पायर्या झिजवताना दिसत आहेत हे विदारक सत्य आहे. 

आज पूर्वीचा काळ आणि विचार लयास गेले आहेत . आज मुलामुलींचे  विचार आणि अपेक्षा बदलत चालल्या आहेत . विवाहाचे वय सुद्धा पुष्कळ पुढे गेले आहे. त्यामुळे वरील सर्व बाबींचा विचार करूनच निर्णय घ्यावा.

प्रत्येक गोष्टीचा योग असतो आणि नसतोही . अनेक वेळा पत्रिकेतील शापित योग , विष्टी करण जीवनात अडथळे निर्माण करते . गुण मिलन आणि ग्रह मिलन ह्या दोघानाही सारखेच महत्व आहे. नुसते घरच्या मंडळींसाठी विवाह नको कारण हे नाते तुमच्या हृदयाशी  निगडीत आहे आणि ते अनेक अपेक्षा घेवून येणार आहे . ते सर्वार्थाने पेलवणारे आहे कि नाही ह्याचा विवाहपूर्व नाही तर स्थळे पाहण्याआधीच विचार झाला पाहिजे .

सप्तमेश राक्षसगणी नक्षत्रात किंवा पापग्रहांच्या कुयोगात , निचीचा , दुर्बल असेल तर विवाह हे आयुष्यातील मोठे प्रश्नचिन्ह होते.  जातक हा वैचारिक आर्थिक शारीरिक मानसिक आणि लैंगिक दृष्टीने सक्षम असेल तर आणि तरच विवाहाच्या बाबत विचार करावा अन्यथा नाही. आपल्यातील शारीरिक किंवा मानसिक दुर्बलता वैवाहिक सुखात न्यूनता आणते त्यामुळे एखाद्याची फसवणूक करून पापाचे धनी होऊ नये. हे जन्मोजन्मीचे बंधन आहे .एकमेकांच्या मनाचा विचार इथे व्हायलाच हवा. पालकांनी सुद्धा एखादे स्थळ आपल्या अपत्यावर लादू नये. असे केल्यास हे बंधन पुढे जावून फार काळ टिकत नाही हे वेगळे सांगायला नको. 

विचारातील पारदर्शकता आणि खरेपणा हे नाते दीर्घकाळ टिकवेल. आज चंद्र शुक्राच्याच नक्षत्रात आहे. शुक्र हा वैवाहिक सुखाचा  , प्रणयाचा मुख्य कारक म्हणून आज विवाह ह्या विषयाबद्दल लेखन प्रपंच .

सौ. अस्मिता दीक्षित 

संपर्क : 8104639230 

ग्रहांचे नवमांश बळ

 || श्री स्वामी समर्थ ||

जन्मलग्न कुंडलीचे नवमांश हे स्मुक्ष रूप आहे त्यामुळे नवमांशात ग्रहांचे बळ पाहिल्याशिवाय ग्रह कसे फळणार हे सांगता येत नाही आणि म्हणूनच नवमांश अत्यंत महत्वाचे आहे. प्रत्येक राशीत सव्वा दोन नक्षत्रे आहेत आणि प्रत्येक नक्षत्राचे 4 चरण आहेत त्यामुळे 30 अंशात 9 चरणे म्हणजेच सवा दोन नक्षत्रे समाविष्ट केलेली आहेत . प्रत्येक चरण हे 3 अंश 20 कला चे आहे जो त्या राशीचा नवमांश आहे. आपला जन्मस्थ चंद्र कुठल्या नवमांशात आहे त्यावरून आपली अभिव्यक्ती समजते .

आज धनेशाचा संबंध नवमांशात कश्याप्रकारे येतो त्याबद्दल बघुया . धनस्थान हे तुमचे कुटुंब आणि धन प्राप्ती दर्शवते. 

धनेश जर चंद्राच्या नवमांशात असेल तर अत्यंत हळुवार लाघवी बोलणे असते . चंद्र म्हणजेच जल , जीवन , लक्ष्मी आहे त्यामुळे त्यांच्याकडे सदैव पैशाचा ओघ असतोच .चंद्र हा वनस्पतींचाही कारक आहे त्यामुळे पाणी , वनस्पती ह्या संबंधित व्यवसायातून धनप्राप्ती होते.  समाजिक संस्था किंवा सामाजिक जीवनाशी संबंधित कामातून धनप्राप्ती होते . रवीच्या म्हणजेच राजाच्या नवमांशातील ग्रह राजासारखीच फळे देतील. सन्मार्गाने राजमार्गाने मिळवलेले धन इथे दिसेल. तसेच उच्च अधिकार , रवी राजा आहे आणि विशाल हृदयी , सर्वांचा विचार करणारा , अधिकार असणारा आहे. शिक्षण क्षेत्र विशेष करून व्यवस्थापन क्षेत्रातून धनप्राप्ती आणि त्याच संबंधित शिक्षण असू शकते .

नवमांश मंगळ असेल तर उग्र वाणी नको तितके धाडसी आणि क्रूरपणा , टीकात्मक संवाद आणि त्यातून विसंवाद , अफाट खर्च , टोचून बोलणे , त्यासोबत राहू असेल तर जुगारी प्रवृत्ती आणि त्यातून अर्थार्जन  . मंगळ म्हणजे धाडस म्हणूनच पोलीस किंवा तीनही सेनादलातील नोकरीतून अर्थार्जन . उजवा डोळ्यातून पाणी येऊन उष्णतेचे विकार होतील.

धनेश बुधाच्या नवमांशात असेल तर ..बुध हा बुद्धीचा कारक , बिरबला सारखे चातुर्य , उत्तम गणिती , बुध हा वाणी आहे त्यामुळे पैशाच्या हिशोबात चोख , उत्तम तर्कशक्ती आणि त्याचे आपल्या संवादातून प्रदर्शन . डोळे मिचमिचे , बारीक .

शुक्रासारख्या रसिक ग्रहाच्या नवमांशामध्ये ग्रह असेल तर आनंद सौख्य प्राप्ती कारण शुक्र मनमिळाऊ माणसे जोडणारा गोडवा जपणारा आहे.कलेचा अविष्कार , स्त्रीकडून लाभ करून देणारा , बोलणे मधाळ , शुक्राच्या संबंधित व्यवसाय केले तर अर्थार्जन उत्तम होयील. शुक्र दुषित असेल तर जुगारी वृत्ती , व्यसनाधीनता हि फळे प्रकर्षाने मिळतील.

धनेश गुरु च्या नवमांशात असेल तर व्यक्ती आपल्या उत्तम वाणीतून पैसा मिळवेल. गुरु हा ज्ञानाचा महासागर आहे . वायफळ बोलणे नाही आणि त्याला तितका वेळ सुद्धा नाही . तर्कशुद्ध , ज्ञानात भर पडणारे आणि विचारमंथन करायला लावणारे असे उत्तम विचार त्याला मिळतील आणि त्यातून अर्थार्जनाचे मार्ग व्यक्ती शोधेल. गुरु अध्ययन दर्शवतो त्यामुळे शिक्षकी पेशा , महाविद्यालयात नोकरी .लोकांना मदत करण्याची वृत्ती आणि परोपकार त्यामुळे समाजात मनाचे स्थान आणि त्यातून लोकसंग्रह हा व्यवसायाला पूरक ठरतो. अनेकदा गुरु कफ पण देतो. मूळ पत्रिकेतील गुरु बिघडला असेल तर पोकळ डामडौल असतो . 

शनी असल्यास कमी बोलणारा शांत प्रवृत्तीचा ,निरस पण बोलेल तेव्हा कदाचित मोजक्याच शब्दात बोलणारा . शनी       कष्टकरी वर्गाचा कारक असल्यामुळे अथक परिश्रमातून अर्थार्जन होयील. सहज सोपे काहीच मिळणार नाही . आर्थिक स्थिती हळूहळू उंचावेल एका रात्रीत श्रीमंती कधीच नाही .बोलण्यात संथपणा , आणि दोष असू शकेल.  शनी वक्री असेल तर अचानक धन लाभ करून देयील आणि धन टिकणार सुद्धा नाही . 

नवमांश कुंडली आणि जन्मलग्न कुंडलीचा अभ्यास परिपूर्ण असावा . 

सौ. अस्मिता दीक्षित 

संपर्क : 8104639230

अध्यात्म योग

 ||श्री स्वामी समर्थ ||

ईश्वर हा आपल्या अवतीभवतीच असतो . आपल्या अध्यात्मिक प्रवासातील गुरु हे ईश्वराचेच सगुण रूप असतात . संतानी समाज सुधारण्यासाठी मनुष्य रूप धारण केले ,लोक निंदा सहन केली त्यांच्यात सुद्धा ईश्वराचा अंश असतोच . संत हे परमेश्वरी शक्तीचा अविष्कार आहे. आपली ईश्वरभक्ती खरी असेल तर त्याचे दर्शन अनेक माध्यमातून रूपातून आपल्याला झाल्याशिवाय राहत नाही .

एखाद्या व्यक्तीच्या पत्रिकेतील अध्यात्मिक साधना मनाचा कारक चंद्र ,पंचमेश , पंचम स्थान , भाग्य स्थान , व्ययेश व्ययस्थान गुरु शनी नेप केतू ह्यांच्यावर असते. पत्रिकेतील मोक्ष आणि धर्म त्रिकोण सुद्धा ह्याबाबत संकेत देत असतो. 

उपासना , ध्यानधारणा ह्याचा कारक गुरु हा अध्यात्मिक मार्गातील एकेक वीट ठेवण्यास कारणीभूत होतो . चंद्र हा मनातील भावनांचा कारक ग्रह असून नेप गुरु ह्यांच्यासोबत होणार्या शुभ योगात उच्च कोटीची अध्यात्मिक साधना प्रदान करतो. भोग भोगून मुक्त व्हा हे सांगणारा शनी पूर्व सुकृताचे दर्शन घडवतो आणि मोक्षाकडे नेतो तर नेप अंत स्फूर्ती देतो.

अध्यात्मातील रुची देणारा गुरु तर भक्तीचा कळस गाठणारा शनी आणि केतू . अग्नितत्वाच्या राशी पारमार्थिक प्रगतीत अग्रेसर मानल्या आहेत.  प्रपंच करताना केलेला परमार्थ हाच सर्वश्रेष्ठ असतो . म्हणूनच म्हंटले आहे ..देवाचिये द्वारी उभा क्षणभरी .अध्यात्मात येण्याचेही योग असतात . एकदा ह्या वाटेवरून प्रवास सुरु झाला कि कश्याचेच भय वाटत नाही. सुख दुक्खाच्या पलीकडे नेणारा आणि मनाची शांतता संतुलित ठेवणारा हा योग आहे.  अध्यात्मिक आनंद लुटता आला पाहिजे . 

आपल्या आराध्याच्या सेवेत मन प्रसन्न करणारा हा योग प्राप्त होणे हे सौभाग्य आहे. 

साधारणतः गुरू च्या राशींचे लग्न वा कुंभ लग्न या लग्नावर जन्मलेल्या या संतांच्या कुंडलीत बहुतेक गुरू ,शनी सोबत  बुधाशी नवपंचम योग,  चंद्र गुरू  नवपंचम योग, वर्गोत्तम गुरू,लग्नेश व पंचमेश यांचे अन्योन्य योग, लग्नेश पंचमात, भाग्येश पंचमात,लग्नेश भाग्यात उच्च राशीला, पंचमेश पंचमात, रवि हर्षल युती हे योग ठळकपणे दिसतात.

पंचमस्थान व पंचमेश यांचा परमार्थातील उपासना, जपजाप्य, दैनिक व नित्य उपासना यांचा अत्यंत जवळचा संबंध आहे

श्रद्धा भक्ति व उपासना यांचा विचार पंचम स्थानावरून केला जातो. पंचम स्थानी शुभ ग्रह, पंचमेश पंचमात, पंचम स्थानाचा शुभ ग्रहाचा योग आला असता व्यक्तीच्या जीवनात  नित्य उपासना , नामस्मरण व जप जाप्य यांना विशेष स्थान मिळते. शुक्र म्हणजे भक्ती गुरू म्हणजे ज्ञान आणि केतू व शनी म्हणजे वैराग्य यातच जर रवि हर्षल युती, चंद्र नेपचून युती वा बुधप्लुटो युती या तिन्ही युती अनुक्रमे शरीर ,मन आणि बुद्धी या तिन्ही पातळीवर अध्यात्मिक ज्ञानास प्रगतिकारक ठरतात

रवि हर्षल,रवि नेपचून, चंद्र हर्षल,गुरू नेपचून व बुध नेपचून या ग्रहांतील अंशात्मक  युती योग मंत्र शास्त्र व योगाभ्यास या साठी अत्यन्त परिणामकारक ठरतात.

लग्नी गुरू व्यक्तीला धर्म परायण,सांस्कृतिक प्रेम,समाजप्रेम हे गुण दर्शवतो. मंगळ गुरूच्या धनु व मीन राशीत धर्म अभिमान, उपासना, सांप्रदायिकता,अशी फळे देतो. शनी व गुरू यांच्यातील लाभ, नवपंचम हे शुभ योग व्यक्तीला वैराग्य, वेदांत अभ्यास व तत्त्वचिंतन या साठी सर्वोत्तम योग आहेत

संकलन : सौ. अस्मिता दीक्षित

संपर्क : 8104639230

प्रेम प्रणय विद्या संतती

 || श्री स्वामी समर्थ ||

पत्रिकेतील पंचम स्थान हे अति महत्वपूर्ण स्थान आहे . आपल्या संपूर्ण आयुष्यात आपण घेतलेले निर्णय ,मग तो निर्णय शिक्षणाचा असो नोकरीचा किंवा विवाहाचा , आपण आपल्या बुद्धीने घेत असतो . हि बुद्धी कशी काम करणार आहे हे सांगणारे हे पंचम स्थान ज्याबद्दल आज जाणून घेवूया . एखादा निर्णय चुकला तर आयुष्यभर पस्तावायला लागते आणि बरोबर आला तर आयुष्य प्रगतीपथावर जाते . आपले विचार , कृती आणि दृष्टीकोण आपल्या बुद्धीवर अवलंबून असतो आणि हि बुद्धी भ्रष्ट किंवा तिरकस असेल तर मग कुसंगत , पापी विचार , चुकीचे निर्णय , नको तिथे पैशाची गुंतवणूक करून व्यक्ती स्वतःची  आणि पर्यायाने आपल्या कुटुंबाची वाताहत करतो. हीच बुद्धी चांगली असेल तर संशोधक वृत्ती , जिज्ञासू पणा , चातुर्य , प्रामाणिकपणा , मनाचा मोठेपणा , बुद्धीचे तेज दिसून येते . बुद्धी चांगली असेल तर विद्या प्राप्त होते आणि त्यामुळेच मनुष्याची सर्वांगीण प्रगती सुद्धा होते. सर्वार्थाने प्रगती करणारे “ शिक्षण  “ हे प्रभावी शस्त्र आणि माध्यम आहे .

अनेक प्रतिभावान , विद्वान लोकांच्या पत्रिकेत ज्यांना मानसन्मान लाभला आहे , कीर्ती ,  मिळाली आहे त्यांचे पंचमस्थान उत्तम रीतीने फलित देताना दिसते . आपली मनोवृत्ती हे संपूर्णपणे आपल्या विचारधारेवर आहे आणि विचारांचा दिशा देण्याचे काम  बुद्धीतून होत असते म्हणूनच पंचम भाव आणि पंचमेश महत्वाचा आहे. पंचम सुस्थितीत असेल तर व्यक्तीकडे अलौकिक बुद्धिमत्ता तर असतेच पण दूरदृष्टी असते , योग्य वेळी योग्य निर्णय घेण्याची क्षमता असते आणि ह्यासर्वाचा उत्तम मेळ घालून आयुष्य प्रगतीपथावर नेण्यास मदत होते . बुद्धी आणि मन ह्यांचाही जवळचा संबंध आहेच . बुद्धी ठिकाणावर नसेल तर मन निराशेच्या गर्तेत जाते कारण योग्य मार्गच सापडत नाही . संकटांनी त्रस्त आणि दिशाहीन सैरभैर होते . कमकुवत मन विकृतीकडे व्यसनांकडे वळते आणि मग पुढे सर्वच चुकत जाते . 

पंचम भाव हा विद्येचा आहे त्यामुळे शैक्षणिक प्रगती आणि शिक्षणाचा आलेख ह्या भावावरून समजतो . लेखक, कवी , प्रतिभावान नाटककार , कलाक्षेत्र अभिनय क्षेत्रातील समीक्षक , बुद्धिप्रधान सर्वच व्यक्तींचे पंचमस्थान अभ्यासावे . संतती सौख्य पंचमावरून पहिले जाते . प्राणापलीकडे जपलेली आपली संतती आपल्याला सुखकारक आहे कि त्यांच्यापासून आपल्याला काडीचेही सुख नाही ह्याचा उहापोह पंचम भाव आणि पंचमेश ह्यावरून होतो . मुलांचे आरोग्य , शिक्षण , एकंदरीत सफलता , त्यांच्याबद्दल असणार्या चिंता , व्यंग , यश पंचमाची देण आहे. 

पंचम भावावरून इतरही अनेक गोष्टी ज्ञात होतात जसे खेळ , क्रीडा , तंत्र मंत्र साधना , तपश्चर्या , पूर्व संचित , दैवी उपासना , ईश्वरी अनुसंधान भक्ती आणि एकूणच अध्यात्मिक प्रगती , शेअर मार्केट , रेस , सट्टा , लॉटरी , कला . ह्यासोबत प्रेमाला   दिला जाणारा आणि मिळणारा प्रतिसाद , इंद्रिय सुख आणि सुख उपभोगण्याची क्षमता , तसेच नैतिक अनैतिक आचरण , ऐहिक सुखाची लालसा ,प्रणयाचे रंग खर्या अर्थाने खुलवणारे हे स्थान आहे . पंचम हे धर्म त्रिकोणातील महत्वाचे स्थान आहे. प्रत्येक भावाचा सखोल अभ्यास असेल तर त्या भावाची महादशा काय काय फळ देयील ह्याचे ठोकताळे मांडता येतील. 

आपल्या प्रत्येक प्रश्नाचे उत्तर ह्या बारा भावातच म्हणजेच आपल्या कुंडलीतील ग्रहस्थितीत दडलेले आहे ...आपला अभ्यास सखोल असेल तर आपल्या कुठल्याही प्रश्नाच्या उत्तरापर्यंत आपण नक्कीच पोहोचू शकतो . 

सौ. अस्मिता दीक्षित 

संपर्क : 8104639230

पुन्हा सारीपाट मांडताना - ज्योतिषीय दृष्टीकोण

 || श्री स्वामी समर्थ ||

आधुनिक जगतात जिथे सर्वच काळानुरूप बदलत आहे तिथे विवाह संस्था कशी अपवाद ठरेल ? विवाह संस्थेचे रूप झपाट्याने बदलत आहे आणि त्याला कारण बदलणारी सामाजिक व्यवस्था आणि मानसिकता . अनेकदा आपला वैवाहिक जोडीदार आपला संसार अर्धवट सोडून जातो अश्यावेळी आयुष्यात भयाण पोकळी निर्माण होते . मग एकटेपणा आणि इतर गोष्टींमुळे पुनर्विवाह  करावा असे विचार मनात रुंजी घालू लागतात . पूर्वीच्या काळी पुनर्विवाह हा शब्द फक्त पुरुषांच्या साठीच अस्तित्वात  होता . स्त्रियांना पुनर्विवाह दूर राहिला प्रथम वर शोधण्यासाठी सुद्धा मत विचारात घेतले जात नव्हते . घरात 10 12 लेकरे त्यात 5 मुली म्हंटल्यावर त्या कधी एकदा उजवल्या जातील ह्याचीच भ्रांत माता पित्यांना असे. त्यामुळे एखादे स्थळ आले कि पुढचा मागचा विचार न करता मुलीचे लग्न उरकून,  हो हो उरकून टाकले जात असे.  मुलीचे मत नगण्य असे किबहुना तिला मत आणि मन सुद्धा आहे ह्याची जाणीव सुद्धा नसे . 

दुर्दैवाने एखाद्या पुरुषाची पत्नी दिवंगत झाली कि तिचे दिवसवार व्हायची खोटी त्याला लगेच पुन्हा लग्न वेदीवर उभे केले  जात असे. मुली पाहून विवाह लगेच होणे आवश्यक कारण घरातील मंडळी, मुले ह्यांच्याकडे पाहण्यासाठी बाई माणूस घरात असणे अत्यावश्यक होते . पुन्हा त्या पत्नीपासून ढीगभर मुले होणे हेही क्रमप्राप्त होतेच.  असो. 

पण हेच एखाद्या मुलीच्या बाबत झाले तर तिला लाल लुगडे नेसवून जगण्याचे सर्व हक्क जणू काढून घेवून कायमचे अंधारात ढकलले जात असे . त्यामुळे त्या काळात स्त्रीच्या द्वितीय विवाहाचा प्रश्नच नव्हता  कारण जिथे तिला माणूस म्हणून सुद्धा वागवले जात नसते तिथे तिच्या मनाचा विचार करणार कोण ? माहेरची दारेही त्यांच्यासाठी बंद असत त्यामुळे सासरीच विधवेचे भयानक जिणे त्यांच्या पदरी येत असे.

आता काळानुरूप सर्वच बदलले आहे. आता स्त्री पुरुष दोघांचेही आयुष्य शिक्षण ,अपेक्षा आणि जीवनाकडे बघण्याचा दृष्टीकोण झपाट्याने बदलत असल्यामुळे विचारात आधुनिकतेचा प्रभाव दिसतोच . जुन्या चालीरीतीना आता बगल देवून द्वितीय विवाह हा दोघांचाही होताना आपण आता बघतो. आज त्याविषयी ज्योतिषीय विश्लेषण करुया .

प्रत्येक वेळेस पटले नाही म्हणूनच नाही तर एखाद्या गंभीर आजाराने सुद्धा व्यक्ती जोडीदारास गमावून बसते आणि त्यातून द्वितीय विवाहाची गरज निर्माण होते . स्त्रीला दुसरा विवाह करण्याची गरज का भासते ? त्यालाही अनेक करणे असू शकतात . जग कितीही पुढे गेले असले तरी शेवटी स्त्रीलाही आधाराची गरज भासते हा आधार मानसिक , आर्थिक, सुरक्षितता अश्या  सर्वार्थाने असतो. कधीकधी आयुष्याच्या मध्यावर अचानक जोडीदाराची साथ सुटते मुलांची शिक्षणे चालू असतात , राहत्या घराचा प्रश्न , घेतलेले कर्ज सुद्धा तसेच मानसिकता कोलमडते आणि एकटेपणा . अश्या वेळी हि घडी पूर्ववत करण्यासाठी पुनर्विवाह करावा असे मनात येते .

आज 21 व्या शतकात विलंबाने विवाह हि जशी समस्या आहे तशीच घटस्फोट हि सुद्धा एक ज्वलंत समस्या आहे. घटस्फोट झाल्यानंतर पुढील जीवन एकट्याने व्यतीत करायचे का ? हा प्रश्न पडतो आणि त्यावेळी पुनर्विवाहाचा विचार पुढे येतो. स्त्री आता घराबाहेर पडत आहे आणि स्वतःचे करिअर करत आहे. स्वतःच्या पायावर उभी आहे. आजच्या काळात पुनर्विवाहाची कारणे म्हणजे वैचारिक मतभेद , विवाहबाह्य संबंध हीसुद्धा आहेत . पुनर्विवाहासाठी जातक आल्यास त्याला ह्यापुढे उत्तम वैवाहिक सुख मिळणार कि नाही हे पाहावे लागते .

पुरुषांच्या बाबत तर अधिकच घालमेल होते कारण स्वयपाकघर कोण सांभाळणार , मुलांचे भावविश्व कमकुवत झालेले असते कारण त्यांची आई हेच त्यांचे विश्व असते त्यातून आलेले एकटेपण ह्यासाठी पुनर्विवाह करावासा वाटतो. ह्याला कित्येक अपवाद सुद्धा आहेत , बाईचा हात घरात फिरल्या शिवाय घराला घरपण येत नाही असे म्हंटले तरी अनेक उदा आहेत जिथे पुरुषाने दुसरा विवाह न करता आपले आणि मुलांचे आयुष्य यशस्वीपणे पुढे नेले आहे . पण आज आपण ह्याच्या दुसर्या बाजूचा म्हणजेच पुनर्विवाहा बद्दल चर्चा करत आहोत.

स्त्री असो अथवा पुरुष आयुष्याच्या संध्याकाळी जोडीदाराची साथ आणि उणीव खर्या अर्थाने वाटते आणि त्यातून निर्माण होणारा भयाण एकटेपणा अनेक आजारांना सुद्धा निमंत्रित करतो आणि म्हणून द्वितीय विवाहा करण्याची मानसिकता निर्माण होते. अनेकदा मुले हा महत्वाचा प्रश्न दोघांपुढे सारखाच असतो. माणूस एकटा नाही राहू शकत त्याला आपली काळजी घ्यायला आणि करायला , मनातील भावना व्यक्त करायला आपले माणूस लागतेच लागते आणि ह्या सर्वाचा विचार करता पुनर्विवाह करणे हि गरज निर्माण होते. 

पण नुसताच पुनर्विवाह केला म्हणजे संपले का अनेकदा दुसर्या विवाहाने आगीतून फुफाट्यात अशी अवस्था होते . त्यामुळे अनेक गोष्टींचा विचार आधीच करावा हे उत्तम . आता पत्नी आली आहे तिच्या गळ्यात मुले घालीन , ती मला वाफाळलेला चहा हातात आणून देयील आणि माझी ग्रहस्थी सांभाळेल ,हुश्श सुटलो एकदाचा ..अशी भावना पुन्हा विवाह करताना असेल तर ह्याही विवाहाचे कडबोळे होईल तेही अधिक तीव्रतेने .अनेकदा तिलाही आधीच्या नवर्यापासून मुल असेल ते आपण स्वीकारणार का ? तितक्याच प्रेमाने त्याचेही करणार का हा विचार आधी करायला पाहिजे नाहीतर तुमच्या आणि तिच्याही मुलांची  फरफट होईल.

द्वितीय विवाह करण्याची नक्की गरज काय आहे ? ह्याचा विचार खरतर ज्याचा त्याने केला पाहिजे आणि त्या गोष्टींशी मुळात व्यक्ती स्वतः सहमत असली पाहिजे. आपली पत्नी निवर्तली आणि घरातील मंडळी मागे लागत आहेत म्हणून मी पुन्हा लग्न करावे कि ते करणे सर्वार्थाने मला स्वतःला पटले आहे हे आधी निदान स्वतःपुरते स्पष्ट झाले पाहिजे. द्वितीय विवाह करताना आपले वयही पुढे गेलेले असते तसेच प्रथम वर किंवा कन्या मिळेल असे नाही , समोरच्या व्यक्तीचा सुद्धा हा पुनर्विवाह असू शकतो त्यामुळे आता ह्या वयात पुन्हा हा सारीपाट मांडताना समोरच्याला समजून घेण्याची  मानसिकता आपली खरच आहे का? त्या व्यक्तीला सुद्धा अपत्य असू शकते आणि ते नाते अधिक नाजूक असते तिच्या आणि आपल्या मुलांना आपण समान वागणूक देऊ शकू का? दोघांचीही आर्थिक बाजू ह्यात असलेला फरक ह्याचा समतोल राखता येणार आहे का? 

पहिल्या विवाहात केलेल्या तडजोडी पेक्षा कित्येक पटीने अधिक तडजोडी करण्याची आणि तेही ह्या पुढे गेलेल्या वयात क्षमता आहे का? कि फक्त स्वतःची जबाबदारी आपण घेवू शकत नाही ती कुणीतरी घ्यावी म्हणून पुन्हा लग्न करायचे आहे ?

समाज आता प्रगत विचारांचा आहे त्यामुळे उलट पुनर्विवाहाला सगळेच आज खुल्या दिलाने सपोर्ट करताना दिसतात . पण इतरांना काय वाटते त्यापेक्षा स्वतःला काय वाटते ? मला पुनर्विवाह करायचा आहे आणि नक्की ह्या कारणासाठी ती कारणे  स्वतः स्वीकारली मनाला स्पष्ट झाली तर जरूर करावा. पण फक्त कुणीतरी सांगत आहे म्हणून करू नये. शेवटी संसार तुम्हालाच करायचा आहे सल्ला देणार्यांना नाही .

ज्योतिषीय दृष्टीकोनांतून प्रथम विवाह सप्तम स्थानावरून आपण पाहतो त्याच सोबत 2 5 8 11 हि स्थाने सुद्धा विचारात घेतो. द्वितीय विवाह हा 2 भावावरून पाहावा लागतो म्हणजेच धनेश कारण ते प्रथम विवाहाचे अष्टम स्थान आहे. धनेश कुठल्या भावात आहे आणि त्याची स्थिती काय आहे. सध्या चालू असणारी दशा तसेच शुक्राची स्थिती  आणि अर्थात पुढील येणार्या दशा सुद्धा . सर्वात महत्वाचा अर्थात लग्नेश आणि चंद्र . स्त्रीच्या पत्रिकेत रवी हा पतीचा कारक तसेच पुरुषांच्या पत्रिकेत चंद्र हा स्त्रीचा कारक आहे. ह्या सर्व गोष्टी आपल्याला आपल्या उत्तरापर्यंत पोहोचवतात . 

अनेकदा प्रथम विवाह हा सुखकारक होत नाही पण द्वितीय विवाह आयुष्याची गाडी रुळावर आणणारा ठरतो . प्रथम विवाहापेक्षा द्वितीय विवाहात आपल्या अपेक्षा बर्याच अंशी कमी होऊन तडजोड करण्याची मानसिकता आपोआप  तयार होत असते कारण हा विवाह आता काहीही करून टिकवायचा असतो . आपली मनमानी प्रत्येक वेळी करून नातीच टिकत नसतील तर मग कितीही विवाह केले तरी त्याची परिणीती आनंदात सौख्यात होणार नाही.

मनुष्य हा समाजप्रिय प्राणी आहे अनेकदा एकटेपणामुळे घर खायला उठते . आयुष्याच्या संध्याकाळी तर जोडीदाराची आवश्यकता खर्या अर्थाने भासते . आजकाल जेष्ठ नागरिकांमध्ये सुद्धा द्वितीय विवाह होताना दिसतात आणि ती आनंददायी बाब आहे . अनेकदा जोडीदार नसतो आणि मुले परदेशी असतात किंवा दूर असतात . अश्यावेळी एकटे राहणे व्यावहारिक मानसिक सर्वच दृष्टीने कठीण जाते . विवाह केला तर सर्वप्रथम एकटेपणा जातो आणि सोबत मिळते . मानसिकता सुधारते त्यामुळे तो जरूर करावा. आज बदलत्या समाज व्यवस्थेत ती सर्वांची गरज आहे पण तो करताना सर्वार्थाने तडजोड करण्याची तयारी ठेवली तर तो आयुष्याचे नवीन आणि सुखद वळण सुरु करेल ह्यात दुमत नाही. आयुष्य पुन्हा नव्याने जगावेसे वाटेल कारण आयुष्याने दिलेली हि एक संधी आहे त्याचे सोने करणे आपल्याच हाती आहे. पुनर्विवाह हा फक्त आपल्याला आधार मिळावा म्हणून नाही तर दुसर्यालाही आधाराची तितकीच गरज आहे आणि ती आपल्याला पूर्ण करायची आहे ह्या भावनेतून केला तर सौख्य प्राप्त होईल.

प्रत्येक व्यक्ती हि स्वतंत्र आहे , प्रत्येकाचे विचार आणि दृष्टीकोण आणि आयुष्य जगण्याची समीकरणे आणि पुनर्विवाह करण्याची कारणे वेगवेगळी आहेत . आपले निर्णय मग ते कुटुंबातील मंडळीना किंवा समाजाला पटो अथवा न पटो ,तो घेण्याचे  संपूर्ण व्यक्तिस्वातंत्र सुद्धा प्रत्येकाला आहे. ऐकावे जनाचे करावे मनाचे त्याप्रमाणे आपल्या आतला आवाज प्रत्येकाने ऐकून निर्णय घ्यावा तो सहसा चुकणार नाही . आपला एकटेपणा घालवायला कुणीही येणार नाही त्यावर उपाय आपल्यालाच करायचा आहे . आजची  जीवनशैली बघता  संसाराचा सारीपाट पुन्हा मांडणे हि बाब सर्वार्थाने विशेष राहिलेली नाही , उलट आजकालची विवाह मंडळे सुद्धा आपला जोडीदार पुन्हा शोधण्यासाठी मदतीचा हात देताना दिसतात . फक्त पुनर्विवाहाचा सारीपाट मांडताना तो प्रथमच मांडत आहोत अश्या तळमळीने तसेच त्यातील संभाव्य धोके , कराव्या लागणाऱ्या तडजोडी आणि पूर्वी केलेल्या चुका लक्ष्यात घेवून मांडला तर यशदायी नक्कीच होईल .

संकलन : सौ. अस्मिता दीक्षित 

संपर्क : 8104639230  

ज्योतिष शास्त्रा बद्दल कुतूहल , आदर कि भीती ?

 || श्री स्वामी समर्थ ||

ज्योतिष हे प्राचीन आणि दैवी शास्त्र आहे . अवकाशातील हे ग्रह तारे मानवी कल्याणासाठी तत्पर आहेत . आपण योग्य वेळी त्यांचे मार्गदर्शन घेवून आपले आयुष्य मार्गस्थ करू शकतो . दिवसागणिक जगभरात ह्या विषयावरील संशोधन चालू आहे आणि असंख्य शोध आणि सूत्रे त्यांची परिभाषा आपल्याला नव्याने उलगडत आहे. आजही अवकाशात ह्या असंख्य लुकलुकणाऱ्या तारकात असेही काही ग्रह असतील ज्यांचा शोध आपल्याला लागलेला नाही जो भविष्यात काळानुसार लागेलही पण त्यांचा परिणाम मात्र मानवी जीवनावर होत आहे . पण हा परिणाम करणारे ग्रह अजून आपल्याला ज्ञात नाहीत . सागरासारखे खोल आणि विशाल असे हे शास्त्र त्याचे असंख्य पदर त्यामुळे संशोधनास वाव आहेच .

माणूस रोजच्या आयुष्यात संकटांनी त्रस्त झाला कि दिशाहीन होतो आणि मग ह्या शास्त्राचा आधार घेण्यासाठी ज्योतिष मंडळींकडे मोर्चा वळतो . ज्योतिष ह्या विषयाबद्दल मानवाच्या मनात पूर्वापार कुतूहल आहेच. पण अनेकदा आपल्याला ह्या शास्त्राबद्दल खरच आदर आहे कि नुसतेच कुतूहल कि कुठेतरी मनात भीती सुद्धा ह्याचा शोध आपण स्वतःच घेतला पाहिजे. खरतर उठसुठ ज्योतिषाकडे जात राहतात . 

समस्या निर्माण झाल्याशिवाय प्रश्न बघू नये हा नियम ज्योतिषांनी सुद्धा तंतोतंत पाळला पाहिजे . उगीच कुणी पैसे देत आहे म्हणून उत्तर द्यायचे हा शास्त्राचा अवमान ठरेल. हे दैवी शास्त्र आहे ,  विक्रीला ठेवलेली वस्तू नाही . असो.

ज्योतिष हे परिपूर्ण नाही , देवाने काही पत्ते त्याच्याच हाती ठेवले आहेत . सगळेच दिले तर किंमत राहणार नाही . अनेकांना शास्त्राबद्दल काडीचाही आदर नसतो पण बघू बघूया म्हणून पत्रिका दाखवायला येतात . प्रश्न विचारताना सुद्धा ते जाणवते . काही जणांना पत्रिका दाखवायची भीती वाटते . आपली गुपिते ज्योतिषाला कळतील हि भीती त्यांच्या मनात असते. काही जणांना ज्योतिषाने काही सांगितले तर ते मानसिक दृष्टीने पेलायची ताकद नसते म्हणून ते जाणे टाळतात . तर काही खरोखर अभ्यासू असतात आणि शास्त्राबद्दल आदर त्यामुळे मार्गदर्शन घेऊन आपले आयुष्य समृद्ध करावे ह्या उदात्त विचाराने ते ह्या शास्त्राचा आधार घेतात .

मनुष्य हा स्तुतीप्रिय आहे त्यामुळे त्यांना जे हवे ते उत्तर ज्योतिषाने दिले कि त्याचे समाधान होते आणि ज्योतिषी लग्गेच त्यांच्या so called Good Book मध्ये जाऊन बसतो . पण ज्योतिषी हा तुमचा मित्र हि नाही आणि शत्रू तर अजिबात नाही , त्याला हे शास्त्र अवगत आहे आणि त्याने केलेल्या तुमच्या कुंडलीच्या अभ्यासातून निघालेला निष्कर्ष उत्तरा च्या रुपात तो तुमच्या समोर ठेवतो इतकच. मग एखाद्याला नोकरी मिळणार कि नाही किंवा असलेली नोकरी राहणार कि जाणार , विसा मिळणार कि नाही , आजार बरा होणार कि नाही , संतती होणार कि नाही , संतती सुख कसे मिळेल ? तसेच परदेशगमन , कर्ज , व्यसनाधीनता ह्या असंख्य रोजच्या जीवनातील प्रश्नांची उत्तरे तुमच्या पत्रिकेतील ग्रह देणार आहेत , ज्योतिषी नाही देत हे आधी मनात खोलवर बिंबवून ठेवले पाहिजेत. 

त्यामुळे तुम्हाला विसा मिळणार नाही वेळ लागेल हे सांगितले तर ज्योतिषी वाईट होत नाही लगेच , तो तुमच्या ग्रहांचा संदेश तुमच्या पर्यंत पोहोचवत आहे इतकच. आपल्या कानाला सगळ्या प्रश्नांची आपल्याला हवी तशी उत्तरे मिळत नाहीत . आपल्या संचित कार्माचीही फळे असतात आणि ती सर्वस्वी तुमच्या कर्मावर अवलंबून असतात हे त्रिवार सत्य आहे.

एखादा अतिशय वेदना देणारा आजार एखाद्या जातकाला झाला तर सर्वांनाच वाईट वाटते पण हे माणुसकीच्या नात्यातून , त्याच्या पत्रिकेचा अभ्यास केला तर त्याने इतकी वाईट कृत्ये केलेली दिसतील कि असे लक्ष्यात येयील कि आता भोगत असलेली शिक्षा कमीच आहे कि काय .

ज्योतिषी स्वतःच्या डोक्याने काहीच सांगत नाही तर तो फक्त ग्रहांचा संदेश तुम्हाला सांगत असतो .एक मिडिएटर म्हणून काम करत असतो इतकच ,त्यामुळे त्याच्यावर रागावून काहीही उपयोग नाही असे करून आपण आपल्या कोत्या मनोवृत्तीचे आणि अर्धवट शिक्षणाचे मात्र प्रदर्शन करतो. आपल्याला परिस्थिती स्वीकारण्याचे धैर्य नसेल तर ह्या शास्त्राचा आधार घेवूच नये . अनेकदा सर्व संपले असे वाटून गलीतमात्र झालेला जातक ज्योतिषाच्या , 3 महिन्यात सर्व व्यवस्थित मार्गी लागेल ह्या शब्दांनी सुखावतो आणि संजीवनी मिळाल्यासारखा ताजातावानाही होतो. आयुष्यात एकच वेळ सारखी राहत नसते , आयुष्य सतत बदलत असते , आपली परीक्षा पाहत असते फक्त एखादी वाईट वेळ कधी जाणार हे समजले तर आपण खूप निराश न होता वेळ बदलण्याची वाट बघू . 

एखाद्या व्यक्तीची पहिल्या दुसर्याही विवाहात फसवणूक होऊ शकते पण हे त्याला आधीच समजले तर बरे नाही का. फसवणूक होणे हे त्याचे प्राक्तन आहे त्यामुळे त्याला असेच फसवणारे स्थळ येयील आणि तो फसेल. तुमचे गतजन्मीचे हे कर्म बोलत आहे असे समजा आणि त्यातून शिका. 

अनेकदा ज्योतिषाने जातकाला पुढील घटनांसाठी सावध केले तरी जातकाला वाटते ज्योतिषी आपल्याला इतके स्पष्ट सांगत आहे ,आपल्याला घाबरवत आहे. पण असे वाटत आहे म्हणजेच तुमचा कुठेतरी खोलवर त्याच्यावर विश्वास आहे किंवा तो सांगत असलेली घटना घडण्याचे संकेत तुम्हालाही मिळत आहेत . मग ते स्वीकारा निदान पुढील नको त्या गोष्टी टळतील .

ज्योतिषी हा जादुगार नाही कि  बुद्धिबळ खेळणारा हि नाही. पटावरील सोंगट्या हलवता येतात पण पत्रिकेतील ग्रह नाही . ते तुमच्या कर्माचे फळ देण्यास बांधील आहेत आणि म्हणून ते तुमच्या जन्माच्याच वेळेला त्या त्या भावात ठाण मांडून बसले आहेत ते कायमचेच . ते फळ देणार मग ते चांगले कि वाईट हे सर्वस्वी तुमच्या संचीताशी निगडीत आहेत . मी मकर राशीतला शुक्र वृषभेत नाही आणू शकत ,किबहुना मी तो आहे तसाच स्वीकारण्यात माझे भलेच आहे .

आपली मानसिकता , शारीरिक आर्थिक कुवत , आयुष्याचा नेमका प्रवास आणि संध्याकाळ कशी असेल ह्या गोष्टी जाणून घ्यायच्या असतील तर नक्कीच हे शास्त्र तुमच्या मदतीला आहे पण तुमच्या कानाला सुखावणारी उत्तरे मिळतीलच असे नाही हे मनात पक्के लक्ष्यात ठेवावे .

आपल्याला स्वतःला जाणून घेण्यासाठी ज्योतिष हे एक उत्तम माध्यम आहे आणि त्याचा योग्य वापर आपले आयुष्य नक्कीच सुखी करेल. श्री स्वामी समर्थ.

सौ. अस्मिता दीक्षित 

संपर्क : 8104639230