सुर्यनारायण

|| श्री स्वामी समर्थ ||

आदित्यस्य नमस्कारं ये कुर्वन्ति दिने दिने। जन्मांतर सहस्त्रेषु दारिद्रयं नोपजायते।।

अकाल मृत्यूहरणं सर्वव्याधी,विनाशनं। सूर्यपादोदकं तीर्थं जठरे धारम्यांमहं।।

        रात्रीच्या अंधकाराला दूर करून सर्व विश्वाला , चराचराला प्रकाशमान करणारा रवी म्हणजेच सूर्य ज्याला आपण आदित्य , भास्कर अश्या विविध नावांनी विभूषित केले आहे. सूर्य हा भारीच वक्तशीर आहे , ठरलेल्या वेळी सूर्योदय आणि सूर्यास्त होणारच , निसर्ग ह्याबाबत आजवर कधीच चुकला नाही. एखादे वेळी पृथ्वीचे सूर्याभोवतीचे भ्रमण थांबले तर काय होईल ? विचार करण्यासारखीच गोष्ट आहे नाही का? सूर्याचे आपल्या जीवनात अनन्य साधरण महत्व आहे. चराचर सृष्टीचा चालक ,मालक ,पालक हा सूर्यच आहे. 

एखादी गोष्ट आपल्या नजरेला दिसते म्हणजे नेमके काय होते ? एखादी गोष्ट आपल्या चक्षुना दिसते ती सूर्याच्या किरणांमुळे.हि प्रभावी सूर्य किरणे आपल्याला प्रत्येक गोष्टीचा साक्षात्कार दाखवतात . आपण नेहमी म्हणतो , डोक्यात प्रकाश पडला का ? किंवा सत्य हे सूर्य प्रकाशासारखे  आहे ...हीच  ह्या रवी किरणांची असामान्य , अद्भुत प्रतिभा आहे जी आपल्याला सत्य आणि असत्याच्या मधील फरक सहज उलगडून दाखवते. 

सूर्य हि एक चैतन्य शक्ती आहे . सूर्योदय झाला कि मरगळलेल्या मनास सुद्धा उभारी येते , पुनःश्च हरिओम करून जगावेसे वाटते , आशा , विश्वास पल्लवित  करणारी सूर्यकिरणे आपल्याला जगायची उभारी देतात .अंधकाराकडून प्रकाशाकडे नेणारा आणि असत्याकडून सत्याकडे नेणारा हा सूर्य आहे जो शिस्तबद्ध , विवेकी आहे, भेदभाव जणू त्याला माहीतच नाही , तो सर्वांचा आहे आणि सर्वत्र आहे. 

सूर्य म्हणजेच सवितृ जी दिवसाला जन्म देणारी आहे , अरुणोदय झाला म्हणजेच दिवसाची सुरवात झाली .वेदांमध्ये सूर्याचा उल्लेख सवितृ असाच केला आहे. सवितृ हाच आपल्या विश्वाचा निर्माता आहे आणि त्याचा मंत्र म्हणजेच गायत्री मंत्र आहे. काय आहे हा मंत्र ? त्याचा नेमका अर्थ जाणून घेवूया . आपण ह्या शक्तीसमोर नतमस्तक होऊन प्रार्थना करतो कि मला विलक्षण बुद्धिमत्ता प्राप्त होऊ दे ज्यायोगे मला बुद्धी (बुद्धिमत्ता ), शुद्धी ( पवित्रता ) , वृद्धी ( समृद्धी आणि वाढ ), सिद्धी ( पूर्णत्व ) प्राप्त होऊ देत.

गायत्री मंत्राच्या नित्य आराधानेमुळे आपला मेंदू अश्या प्रकारे कार्यरत होतो कि आपल्या जीवनाचे चार महत्वाचे पिलर्स ज्यावर आपले संपूर्ण आयुष्य आहे म्हणजे बुद्धी शुद्धी वृद्धी आणि सिद्धी मजबूत होतात आणि आपले आयुष्य पूर्णत्वाला गेल्याचे जाणवते. आपल्या आयुष्यात कितीही स्थित्यंतरे , गंडांतरे आली , काहीही असो सगळे अडथळे दूर करून आयुष्य एका वेगळ्याच उंचीवर नेण्याचे दैवी सामर्थ्य गायत्री मंत्रात सामावलेले आहे. सवितृ  म्हणजेच सूर्य जो प्रत्येक जीवाला जन्माला घालतो . प्रातःसमयीचा सूर्य हा ब्रम्हाचे प्रतिनिधित्व करतो , मध्यान्हीचा  विष्णूचे तर सूर्यास्ताचा  महादेवाचे .

संपूर्ण आकाशमंडल सूर्याभोवतीच फिरत आहे. पृथ्वीचे सूर्याभोवतीचे भ्रमण काही क्षणासाठी जरी थांबले तरी चराचर सृष्टी नष्ट होईल. पृथ्वी असो कि सूर्य कि इतर ग्रह ,प्रत्येक जण क्रांतीवृतातून धर्माचे पालन करत अखंड भ्रमण करत आहेत .म्हणूनच भूलोकाचे अस्तित्त्व सूर्यामुळेच अबाधित आहे , स्वर्गलोक इंद्रामुळे . अग्नी सूर्य आणि इंद्र हे कंट्रोलर आहेत . 

आपल्या पहिल्या 4 राशी अग्नी ,पुढील 4 सूर्य आणि शेवटच्या 4 स्वर्ग अशी विभागणी केली तर त्यांचे महत्व लक्ष्यात येते. 

सात घोड्यांच्या रथातून सूर्य आकाशातून भ्रमण करत असतो . हे सात सूर्य म्हणजे इंद्रधनुष्याची सात किरणे आहेत. अरुणा हा सूर्याच्या रथाचे सारथ्य करत आहे. अरुणा म्हणजेच वरुण. व म्हणजे पाणी .अरुणा सूर्याचा रथ महासागरावरून घेऊन जातो ,सागरातील पाणी घेऊन ते पृथ्वीवर पावसाच्या रुपात नेऊन सोडतो . अश्याप्रकारे वरुणा मधील व जावून अरुणा राहते . वरुणा आणि अरुणा ह्यांचा पावसाशी संबंध आहे.  अरुणाला पाय नाहीत . त्याला गरजच नाही ,त्याला सारथ्य करायचे आहे ,त्याला कुठेच जायचे नाही . 12 आदित्याचे दर्शन आपल्याला 12 महिन्यातून घडत असते. 

ब्रिटीशांच्या राज्यात सूर्य कधीच मावळत नसे कारण ते 12 नंबर चा उपयोग करत असत . सगळ्या गोष्टी डझनात मोजत पण ज्यावेळेपासून डेसिमल सिस्टीम आली तेव्हापासून त्यांनी सूर्याला सोडले आणि त्यांच्या प्रगतीवर ,ब्रिटीश साम्राज्यावर अवकळा आली. 

सूर्याबद्दल जाणून घ्यावे तितके कमीच आहे. पण सारांश एकच आहे कि सूर्य आपल्या जीवनाचा अविभाज्य घटक आहे, आपल्या आयुष्याचा अखंड प्रवास त्याच्यासमवेत आहे त्यामुळे प्रत्येक दिवसाची सुरवात त्याच्या स्मरणाने केली तर दिवसच नाही तर संपूर्ण आयुष्य सुद्धा प्रकाशमान राहील ह्यात शंका नसावी .

जप : “ॐ सवितृ सूर्यनारायणाय नमः। ” 

 अस्मिता

संपर्क            : 8104639230

फेसबुक पेज : @yashasweejyotish

स्वागत 2022 चे

 || श्री स्वामी समर्थ ||

 

“ अंतर्नाद “ च्या सर्व वाचकांना 2022 ह्या नववर्षासाठी  मनापासून खूप खूप शुभेछ्या. नवीन वर्ष सुख समृद्धीचे , नवीन संकल्पनांचे , संशोधनाचे , नवीन विषय शिकण्याकडे कल असणारे असुदे . सर्वाना उत्तम आयु आरोग्याचा लाभ होऊन इच्छित फलप्राप्ती होवूदे हीच स्वामींच्या चरणी प्रार्थना .

अस्मिता

संपर्क : 8104639230

फेसबुक पेज : @yashasweejyotish

ज्योतिष कथन करताना तारतम्य हवेच .

 || श्री स्वामी समर्थ ||

आपण सगळेच ह्या दैवी शास्त्राचे उपासक आहोत ह्याचे भान विसरून चालणार नाही . नुसतीच शास्त्राची तोंडओळख असताना आपण एखाद्याच्या पत्रिकेबद्दल भाष्य करणे कितपत उचित ठरेल ? तर त्याचे उत्तर अर्थातच नाही असे आहे. हि विद्या अवगत करण्यासाठी अपार कष्ट , संयम , वाचन , मनन आणि चिंतन तर लागतेच पण त्यासोबत उपासनेची , साधनेची बैठक सुद्धा तितकीच भक्कम लागते . ज्योतिष कथन करणार्याच्या मुखात सरस्वतीचा वास असतो त्यामुळे त्याने भाकीत अभ्यासपूर्वक करावे.

आपल्यासमोरील जातक काय प्रश्न घेऊन आला आहे ते शांतपणे ऐकून घ्यावे. जातक नेहमी त्याचे उत्तर सुद्धा सोबत घेऊन येतो. 

पत्रिकेवर एक कटाक्ष टाकला तर आपल्याला अनेक गोष्टी ज्ञात होतात . जातकाशी साधलेल्या  सुसंवादातून  त्याच्या पत्रिकेबद्दलचे  आपले अंदाज बरोबर आहेत कि नाही ह्याची खात्री पटत जाते. 

जातकाच्या प्रश्नावर आपले लक्ष पूर्ण केंद्रित केले तर उत्तर अचूक मिळेल , जसे नोकरीचा प्रश्न असेल तर त्याच्या विवाहासंबंधी किंवा त्याला वारसाहक्काने धन मिळेल कि नाही ह्याचा विचार सुद्धा करायचा नाही . फक्त आणि फक्त त्याची जी आजची समस्या आहे ती दर्शवणाऱ्या पत्रिकेतील स्थानावर लक्ष्य केंद्रित करणे हितावह ठरते.

जातकाचा प्रश्न नीट समजून घेणे हि पहिली पायरी .नाहीतर  आपण पटकन ह्यांचा विवाहयोग अगदी नक्कीच आहे असे अविचाराने म्हणू आणि जातक म्हणेल कि हि माझ्या 79 वर्षाच्या आजीची पत्रिका आहे . आपल्यावर खजील होण्याची वेळ येऊ नये म्हणून प्रसंगावधान आणि परिस्थितीचे तारतम्य बाळगणे अत्यावश्यक आहे. अथवा असे मजेशीर प्रसंग घडू शकतील. 

अस्मिता

संपर्क : 8104639230

फेसबुक पेज : @yashasweejyotish

निसर्गकुंडली –अवघे ब्रम्हांड

 || श्री स्वामी समर्थ ||

निसर्ग कुंडली म्हणजेच कालपुरुषाची कुंडली किंवा ज्याला आपण ठोकळा कुंडली म्हणतो. त्यावरून अनेक गोष्टींचा विचार केला जातो. इथे असणारे  १२ भाव आणि त्यातील ग्रह, राशी आणि नक्षत्रे आपल्या गत जन्माशी संधान साधतात . हि कुंडली आपल्या संपूर्ण आयुष्याचा ,कर्माचा लेखाजोखा मांडते. आपला जन्म कुठल्या कुटुंबात झाला , त्यातील गुणदोष , आपल्या जन्माचे रहस्य ,आपली कर्तव्ये, आपली भावंडे ,आप्त स्वकीय , शेजारी त्यांच्याशी असणारे आपले भावनिक संबंध ह्यातून व्यक्त होतात. 

आपला शैक्षणिक दर्जा ,बुद्धिमत्ता , विद्वत्ता , ज्ञान ग्रहण करण्याची आणि देण्याची क्षमता , अध्यात्मिक ओढ , साधनेची बैठक , समाजातील वावर , मानसन्मान , पद प्रतिष्ठा ,अर्थार्जन  ह्याचा परामर्श इथे आहे. आपले सहजीवन , त्यातील ओलावा , प्रेम ,मुलांचे सुख ,आजारपण , कर्ज ,वृद्धापकाळ एक ना दोन अगदी सगळ्या सगळ्याचा मागोवा घेणारी हि निसर्ग कुंडली खरच अद्भुत म्हंटली पाहिजे. 

एका कुंडलीवरून माणसाच्या टाळूपासून ते पावलापर्यंत च्या शरीराचा तसेच त्याच्या आवडीनिवडी , जगाकडे बघण्याचा दृष्टीकोन , विचारांचा वेग , संकटांवर मात करण्याची क्षमता , शत्रुत्व आणि मित्र अनेक गोष्टींवर दृष्टीक्षेप टाकता येतो. मनुष्याची नाळ निसर्गाशी किती घट्ट जुळली आहे हेच जणू हा अभ्यास  दाखवत असतो आणि म्हणूनच प्रत्येक कुंडलीचे विवेचन करताना लग्न कुंडलीचा  वरवरचा नाही तर सखोल अभ्यास महत्वाचा आहे.  कुंडलीचा  अभ्यास करताना आपण स्वतःच्याच कुंडलीकडे त्रयस्थाच्या ( जमणे अवघड, पण जमवायचे ) दृष्टीने बघितले तर त्यातील मर्म लवकर  उमगेल . एखादा ग्रह फलीतापर्यंत नेणार नाही त्यासाठी अनेक ग्रहयोग , भाव ,दशा अश्या अनेक गोष्टींचा एकत्रित विचार व्हावा लागतो. म्हणूनच वाटते कि निसर्ग कुंडली म्हणजे ब्रम्हांडच आहे. ज्यात पंचमहाभूते सामावली आहेत .

ज्योतिष शास्त्र क्षणभर बाजूला ठेवून आपण आपल्याच आयुष्याकडे वेगळ्या दृष्टीकोनातून पहिले तर अनेक प्रश्नांच्या उत्तरापर्यंत आपण स्वतःच पोहोचू शकतो. आपल्या मुलांपासून सुख नाही  ह्याचे उत्तर आपण आपल्या आई वडिलांशी कसे वागलो आहोत ह्यात दडलेले आहे. येतंय ना लक्ष्यात .सहज सोपे आहे अगदी. 

अस्मिता

संपर्क : 8104639230

फेसबुक पेज : @yashasweejyotish

अपत्यसुख

 || श्री स्वामी समर्थ ||

आपल्या आयुष्यात आपल्या मुलांपासून आपल्याला सुख मिळणार का ? हा विचार प्रत्येक दांपत्य त्यांच्याही नकळत करतच असते. मुले आपल्याला अक्षता घेवून आम्हाला जन्माला घाला असे सांगायला आली म्हणून आपण त्यांना जन्माला घातले नाही तर तो आपल्या प्रेमातून फुललेल्या नवनिर्मितीचा आनंद आहे. आपल्या मुलांकडे आपल्या म्हातारपणाची काठी म्हणून न पाहता आपल्याला त्यांना उत्तम माणूस म्हणून घडवायचे आहे हाच सदविचार असला पाहिजे. काय वाटते ? 

म्हातारपणी मुले सुना परदेशी निघून जातील मग आम्ही एकटे राहू हा विचार करून नका ,उलट परदेशी जावून तुम्ही दिलेल्या शिक्षणाचे मुलांनी चीज केले असा विचार करून त्यांचे पंखही कापू नका. इतकी उंच गरुड भरारी त्यांनी घ्यावी ह्यासाठी  आपण आपल्या जीवाचे रान केले , आयुष्यभर झिजलो आपल्या अनेक इच्छा आकांक्षांना मुरड घातली .वेळप्रसंगी  व्यक्तिगत आनंदसुद्धा बाजूला ठेवला आहे.  मग आपणच लावलेले लहानसे रोपटे फुलताना बहरताना पाहताना शंका कुशंका कश्यासाठी मन कश्याला अधीर होत आहे आपले ?  आपण आपले इतिकर्तव्य पूर्ण केले आणि त्याचा परमोच्च आनंद अनुभवता येणे हे तर आपले परम भाग्यच म्हंटले पाहिजे. असो विषयांतर नको.

आजकाल  पालकांना मुलांचे  प्रश्न भेडसावत असतात जसे मुले ऐकत नाहीत , व्यसनाधीनता , नोकरीत धरसोड , कुठे कसलीच बैठक नाही , घरात दुरावा , मनमोकळे वागणे बोलणे नाही . मुलांच्या मनात काय चालू आहे हे समजत नाही असाही सूर अनेकांचा असतो. 

ह्या सगळ्यांची उत्तरे शोधण्यासाठी पालक आपल्याकडे  त्यांच्या मुलांची पत्रिका घेवून येतात . पण ह्या सर्व प्रश्नांची उत्तरे मुलांच्या नाही तर पालकांच्या  स्वतःच्याच  पत्रिकेत असतात . पालकांचे पंचम स्थान बिघडले असेल तर नक्कीच अपत्यसुखात कमतरता येते. पंचमेश चतुर्थात ,पंचमात राहूसारखा ग्रह ,अपत्यकारक गुरु पत्रिकेत बिघडलेला असेल तर, अश्या अनेक ग्रहयोगामुळे अपत्य सुख प्राप्त होत नाही .

मंडळी पंचमाचे भाग्य स्थान म्हणजे लग्न स्थान . पर्यायाने मुलांना घडवण्याचे महान कार्य नव्हे तर जबाबदारी आपलीच असते. येतंय ना लक्ष्यात ? सुज्ञास सांगणे न लगे.

अस्मिता

संपर्क : 8104639230

फेसबुक पेज : @yashasweejyotish

जानेवारी 2022 ची पहिली “ हसत खेळत ज्योतिष शिकूया “ हि कार्यशाळा.

 || श्री स्वामी समर्थ ||

वर्ष बघता बघता संपेल आणि 2022 कधी सुरु होईल समजणार सुद्धा नाही. नवीन वर्ष नवीन संकल्प , योजना घेऊन सज्ज असणारच आहे.  आपले आयुष्य हळूहळू पूर्ववत  होत आहे ,तेव्हा काहीतरी नवीन शिकण्याचा निश्चय करुया . ज्योतिष आणि आपले आयुष्य ह्या एकाच नाण्याच्या दोन बाजू आहेत तेव्हा ह्या शास्त्राचा अभ्यास आपल्याला निश्चित आपल्या स्वतःकडे बघण्याचा नवीन दृष्टीकोन देईल ह्यात शंकाच नाही. 8 जानेवारी 2022 ह्या दिवशी वर्षातील  पहिली कार्यशाळा सुरु होत आहे .ज्योतिष शास्त्र ह्या विषयाची पाटी अगदी कोरी असणार्या पण हे शास्त्र शिकण्याची इच्छा असणार्या सर्वांसाठी हि कार्यशाळा आहे .  ह्या कार्यशाळेत  प्रवेश घ्यायचा असेल त्यांनी खालील क्रमांकावर whastapp मेसेज करावा , पुढील माहिती देण्यात येईल. 6 दिवसांची हि कार्यशाळा असली तरी whatsapp ग्रुप दोन आठवडे शंकांचे समाधान करण्यासाठी  असतोच ह्याची नोंद घ्यावी .धन्यवाद.

अस्मिता 

संपर्क : 8104639230

फेसबुक पेज : @yashasweejyotish

गुरू बदल कि स्वतः मधील बदल ?

 || श्री स्वामी समर्थ ||

गुरु परमात्मा परेषु

२० नोव्हेंबर ,२०२१ रोजी गुरु महाराज आपली मकर  राशी सोडून कुंभ राशीत संक्रमित होत आहेत. ग्रहमालिकेत प्रत्येक ग्रहाला काहीना काही विशेष असे कारकत्व बहाल केलेले आहे. जसे बुध हा बुद्धीचा तर गुरु हा ज्ञानाचा कारक आहे. कुंभ राशी हि शनीची आवडती राशी आहे. ह्या राशीत ज्ञानाने भरलेला कुंभ आहे.  

गुरुचे आपल्या जीवनातील स्थान हे अनन्यसाधारण आहे. गुरुविणा जीवन व्यर्थ आहे . ज्यांना गुरु लाभले त्यांच्या जीवनाला गुरुंचा परीसस्पर्श जाणवल्याशिवाय राहणार नाही . गुरु आपल्याला राजमार्गाने चालायला शिकवतात . आपल्याला जे दिसत नाही ते त्यांच्या ज्ञानाच्या दिव्य चक्षुंनी दाखवण्याचा ,अनुभवण्याचा प्रयत्न करतात . प्रपंच आणि परमार्थातील दुवा म्हणजे गुरु . प्रपंच करत असताना पारमार्थिक जगतात फेरफटका मारणे  हे केवळ त्यांच्या अस्तित्वाने शक्य होते. शेवटी आपण सर्वच मोक्षाच्या मार्गावर चालत आपले जीवन कंठीत असतो. शेवटचा क्षण गोड होण्यासाठी गुरूंचे बोट घट्ट पकडून मार्गक्रमण करत असतो. गुरु आपल्यासाठी जे जे काही उत्तम आणि योग्य आहे तेच घडवतात ह्यावर आपली निस्सीम श्रद्धा असली पाहिजे ,ती असेल तर त्यांच्या इच्छेत आपली इच्छा विलीन करणे हे उत्तम कारण त्यातच आपले हित असते.

गुरु हा आकाश तत्वाचा ग्रह आहे. अग्नी ,पृथ्वी , वायू आणि जल ह्या सर्व तत्वांना सामावून घेणारा आहे. गुरु हा विशाल आहे , आपली दृष्टी जाते त्याहीपलीकडे त्याचे अस्तित्व आहे आणि ते चराचरात व्यापून उरलेले आहे . आकाश  हे आपल्या डोक्यावर आहे म्हणजेच गुरूंचा वरदहस्त सुद्धा आपल्या डोक्यावर आहे असे म्हंटले तर वावगे ठरायला नको. 

गुरु महाराज अंदाजे १२ महिन्यांनी आपली राशी बदलून पुढील राशीत मार्गस्थ होतात . त्यालाच आपण गुरुचे गोचर भ्रमण म्हणतो आणि गुरु ज्या भावात ज्या राशीत पदार्पण करतात त्यानुसार त्याचा फलादेश असतो. जसे सप्तमस्थानात गुरुचे गोचर भ्रमण भावंडांशी असलेले संबंध अधिक दृढ करेल. इच्छापूर्ती करेल .  प्रत्येक वेळा गुरु बदलताना आपण उत्सुक असतो कि आता हा गुरूबद्दल मला काय देयील माझ्या आयुष्यात कुठल्या आनंदाची बरसात होईल . 

आज ह्या सर्व गोष्टींचे मनन चिंतन करताना मनात अनेक विचार येऊ लागतात .जन्मस्थ पत्रिकेत  आपल्या पूर्व कर्मानुसार गुरु स्थान ग्रहण करतात आणि मग दर वर्षी त्याच्या पुढील स्थानात संक्रमित होतात . गुरूंचे आपल्या आयुष्यातील स्थान अढळ आहे त्यांची पूजा , जप , नामस्मरण ,पारायण ह्या सर्व गोष्टी तसेच आपली नित्य उपासना आपण करतच असतो . ह्या सततच्या उपासनेमुळे आपला गुरूंच्या वरचा विश्वास आणि श्रद्धा वृद्धिंगत होत असते. मग कितीही कठीण प्रसंग आले तरी शेवटच्या क्षणी गुरु धावून येतात आणि संकटाचे हरण करतात ह्याचाही अनुभव कळतनकळत येऊ लागतो. शेवटी भक्तिविना प्रचीती नाही हेच खरे .

प्रत्येकाचे गुरु वेगळे असू शकतात जसे कुणी आपल्या आईवडिलांना गुरु मानतील तर कुणी शेगावच्या श्री गजानन महाराजांना , कुणी साईबाबा , अक्कलकोट स्वामींच्या चरणी आपल्या निष्ठा वाहतील. पण गुरूंची रूपे अनेक असली तरी गुरुतत्व एकच आहे आणि आपण गुरुतत्वाचे पूजन केले पाहिजे. 

कुठल्याही गुरूची निर्भत्सना , टिंगल अशोभनीय आहे कारण प्रत्यक्ष ती आपल्या गुरुना सुद्धा रुचणार नाही. 

प्रत्येकाच्या श्रद्धेचा आदर करणे हीच सर्वश्रेष्ठ पूजा आहे.  माणसाने माणसाशी माणुसकीच्या नात्याने वागावे , प्रपंच करूनच परमार्थ साधावा , आपल्या कर्तव्यापासून तसूभर सुद्धा परावृत्त होऊ नये हेच तर गुरुतत्व आपल्याला शिकवत असते.  प्रत्येक वेळा होणार्या गुरु बदलाच्या वेळी आता आपल्या आयुष्यात काय बदल होणार ह्यापेक्षा आपण स्वताहून आपल्या आयुष्यात किती बदल केले ,आपला स्वभाव आपली वागणूक किती बदलली ? आपण किती सकारात्मक झालो ? आपण आपल्या कुटुंबाच्या जबाबदार्या नीट पार पाडल्या का ? ह्या अश्या अनके प्रश्नांची उत्तरे आपल्यालाच शोधायची आहेत .

मनुष्य हा स्वार्थीच आहे , प्रपंचात अनेक कठीण प्रसंगांनी तो घेरला जातो त्रस्त होतो , अंधारात चाचपडत राहतो आणि मग निराश होवून शेवटी गुरूंच्या चरणी आश्रय घेतो . आपण आजवर केलेली उपासना आणि श्रद्धा फळास नक्कीच येते आणि त्या मिट्ट अंधारात आशेचा किरण दिसू लागतो. गुरु पुन्हा एकदा त्यांचे अस्तित्व आणि भक्तावरील प्रेम त्यांच्या प्रचीती च्या रुपात देतात आणि आपण निशःब्द होतो, नतमस्तक होतो.

म्हणूनच वाटते कि गुरूंची भेट होण्याची वेळ आपल्या आयुष्यात लिहून ठेवलेली असते .ज्या क्षणी गुरु चरणाशी आपण स्वतःला अनन्यभावे समर्पित करतो त्याच क्षणी त्यांचे अस्तित्व जाणवू लागते . आपली भक्ती श्रद्धा त्यांना आपल्यापर्यंत अक्षरश खेचून आणते आणि तोच आपल्या आयुष्यातील अत्युच्य आनंदाचा क्षण असतो .

गुरुबदल आपल्याला काय देयील त्यापेक्षा आपण गुरूना आपल्यातील बदलेल्या किती गोष्टी दाखवू शकतो ? किती अवगुणांचे गुणात रुपांतर झालेले आहे? आयुष्यात गुरुंमुळे किती अमुलाग्र बदल झाले आहेत ? ह्या सर्वाचा  विचार व्हायला पाहिजे. 

गुरु कुणाचेच वाईट करत नाहीत . म्हणूनच त्याला आकाशतत्व बहाल केले आहे. आकाश जसे सर्वाना सामावून घेते अगदी तसेच आपलेही आचरण असले पाहिजे हेच तर सुचवायचे नाही ना गुरूना .

मी असा मी तसा मी हे केले मी ते केले ,जसे काही निसर्ग चक्र आपल्यामुळेच अस्तित्वात आहे अश्या अविर्भात असणारे आपण किती क्षणभंगुर आयुष्य जगात असतो ज्याची जाणीव आपल्याला गुरुसेवा करताना घडते . पराकोटीला पोहोचलेला अहंकार क्षणात नेस्तनाबूत करणाऱ्या आपल्या गुरूचा सन्मान प्रत्येकाने केला पाहिजे. 

प्रत्येक कृती करत असताना ती त्यांना आवडेल का असा क्षणभर विचार केला तर चुकीची कर्मे हातून कमी होतील नाही का? गोचरीने गुरु महाराज आपल्या अष्टम स्थानात आले तरीही ते काहीच वाईट करत नाहीत कारण ते साधनेचे स्थान आहेच. प्रत्येक वेळी गुरु स्थान परिवर्तन करतील तेव्हा आपणही कात टाकल्यासारखे नवीन रुपात त्यांना सामोरे गेलो तर त्यानाही ते नक्कीच आवडेल , काय वाटते ?

शेवटी एकच वाटते ग्रहांना आपले काम करुदे आपण आपले काम करत राहूया .

अस्मिता

संपर्क : 8104639230

फेसबुक पेज : @yashasweejyotish

शुक्राची चांदणी

 ||श्री स्वामी समर्थ ||

नवग्रहातील महत्वाचा ग्रह म्हणजे “ शुक्र “ . आयुष्य – शुक्र = निरस ,उदास ,अरसिक आयुष्य असे म्हंटले तर वावगे ठरणार नाही . शुक्राचार्य हे दैत्यांचे गुरु .त्यांचा मानही तितकाच मोठा. आपल्या आयुष्यातील आनंदाचा सौख्याचा आणि सगळ्या भौतिक, ऐहीक सुखाचा कारक म्हणजे शुक्र . शुक्र हा रसिक ग्रह आहे. जिथे जिथे आनंद आहे तिथे शुक्र आहेच . 

शुक्र आपल्याला दैनंदिन जीवनात सुद्धा सतत भेटत राहतो .बघुया   

१ गालावरची खळी म्हणजे शुक्र 

२. प्रणयाचा कारक 

३. काळ्याभोर केसांचा केशसंभार 

४. उंची पेहराव , दागदागिने , वस्त्रे 

५. अत्तरे 

६.  पार्टी , क्लब ,मॉल 

७ ब्युटी पार्लर 

८ वैवाहिक सुखाचा कारक ग्रह 

९ पर्यटन 

१० कला 

लक्ष्यात येतेय का? बघा किती साध सोप्प आहे शुक्र समजणे , हो ना? रोज आपल्या अवतीभवती फिरणारा हा ग्रह शुभ ग्रह आहे. तसा प्रत्येक ग्रह हा पूर्णतः शुभ किंवा अशुभ नसतोच.  शुक्र बिघडला तर वाईटच.  कुठल्याही गोष्टी एका मर्यादेत असल्या तरच त्या चांगल्या असतात .

आज शुक्राचेच पूर्वाषाढा नक्षत्र चालू आहे. 

चला तर तुम्हालाही शुक्र कुठेकुठे भेटू शकेल ते लिहा ..आपण अभ्यास करतोय त्यामुळे विचारांचे आदान प्रदान झालेच पाहिजे .

अस्मिता

संपर्क : 8104639230

फेसबुक पेज :  @yashasweejyotish 

गैरसमजाचे वारे – राहू

 || श्री स्वामी समर्थ ||

आपल्या सगळ्यांनाच कधीना कधीतरी  आयुष्यात  समज गैरसमजाला  तोंड द्यावे लागते. गोष्ट अगदी शुल्लक असते पण त्यावेळी अशी काही परिस्थिती निर्माण होते कि समोरच्याचा आपल्याबद्दल गैरसमज होतो . हा गैरसमजुतीचा घोटाळा आहे हे आपल्याला समजले असते आणि आपण तो दूर करण्याचा प्रयत्न सुद्धा करतो. समोरचा सुज्ञ असेल तर प्रकरण मिटते अन्यथा आयुष्यभर त्या गैरसमजाच्या वादळाला सामोरे जायला लागते . अश्यामुळे मनस्ताप तर होतोच पण नाती तुटतात आणि संबंध दुरावतात ते कायमचेच .

कधीकधी हे गैरसमज आपल्याही नकळत होतात , आपली एखादी कृती किंवा बोललेला शब्द गैरसमज निर्माण करण्यासाठी  पुरेसा असतो. आपला हेतू तसा नसतोहि पण घडायचे ते घडतेच .  बरेचदा तिथे असणारी तिसरी व्यक्ती सुद्धा आपल्यातील झालेला गैरसमज सहज मिटवू शकते कारण त्यांच्याचमुळे गैरसमज झालेला असतो ,पण तसे न करता ती सगळे प्रकरण दुरून बघून आनंद घेत असते . त्यामुळे ह्या झालेल्या गैरसमजामुळे आपल्याला आपल्याच जवळच्या व्यक्तींचा नव्याने परिचय होतो असे म्हंटले तर वावगे ठरू नये. 

कधी कधी समोरचा आपल्याबद्दल मुद्दाम गैरसमज निर्माण करून देतो पण दोष त्याचा असतो का ?  तर नाही. समंजस , साधक बाधक विचार करणाऱ्या व्यक्ती गैरसमज करून घेत नाहीत . कधीकधी एखाद्या प्रकरणात आपण नको तितका पुढाकार घ्यायला जातो आणि फसतो. त्याचा खरा सूत्रधार बाजूलाच राहतो. पण गोम अशी आहे कि त्याच्याच मुळे आपण मात्र गैरसमजाच्या चक्रात गुरफटतो . सूत्रधाराच्या लक्ष्यात आलेले असते कि आपल्यामुळे नाहक दुसर्याबद्दल अकारण गैरसमज होत आहे पण तो दूर न करता तो दूर उभे राहून गंमत बघत असतो. 

गेल्या काही दिवसात मी स्वतः असा एक अनुभव घेतला . झालेला गैरसमज दूर करण्यासाठी मी बोलले सुद्धा पण ती व्यक्ती इतकी निर्ढावलेली आहे कि लक्ष्यात आणून दिल्यानंतर सुद्धा तिने गैरसमज दूर करण्यासाठी पाऊल उचलले नाही. अश्यामुळे आजवरच्या चांगल्या केलेल्या गोष्टींवर सुद्धा पाणी पडले. चांगल्या केलेल्या १०० गोष्टी लक्ष्यात राहात नाहीत पण आपण केलेली एक चूक लक्ष्यात राहते हा मनुष्य स्वभाव आहे, कुणीही त्याला अपवाद नाही . मीही शेवटी ते सोडून दिले ,अर्थात मनातून ते जाणे अशक्य आहे कारण तुमच्यामुळे गैरसमज झाला आहे आणि तो दूर करा हे सांगून सुद्धा  त्या व्यक्तीने काहीच केले नाही .आता ह्या प्रसंगातून घडलेल्या घटनेचा काय अर्थ  घ्यायचा तो मी घेतलेला आहे. नकळत घडतो तो गुन्हा पण समजून सवरून केलेल्या गोष्टी म्हणजे पाप.

बरेचवेळा दोन व्यक्तितला गैरसमज हा घडवून आणला जातो आणि तो तसाच कसा राहील ह्यासाठी सुद्धा प्रयत्न केला जातो. असो परमेश्वर आहे आणि तोही हे सगळे बघत आहे . मी सुद्धा अभ्यास केला तेव्हा अश्या व्यक्तींचे आर्थिक मानसिक कौटुंबिक स्वास्थ्य किती बिघडलेले असते ह्याचा प्रत्यय आला. 

दुरून गम्मत बघत बसताना मजा येते पण त्यांच्या ह्या दुष्कृत्याचे  दूरगामी पडसाद त्यांना भोगायला लागतात . ज्योतिष अभ्यासकांना अश्या आणि तत्सम घटनांचा कारक राहू आहे हे माहितच आहे. राहू हा गैरसमज ,छल कपट , फसवणूक, धूसर चित्र निर्माण करणारा, म्हणजेच आपल्याला वाटते  दुध आहे पण असते ताक , धूर्त , लबाड असा पापग्रह आहे. अवकाशात लाखो मैल दूर असणारा एक अगदी लहानसा ठिपका आहे पण त्याच्या करामती बघा .

अश्या घटना घडतात किंवा फसवणूक होते तेव्हा आपल्या पत्रिकेत कुठे ना कुठे म्हणजे महादशा , अंतर्दशा , विदशा किंवा गोचर भ्रमणातून राहू active झालेला असतो . म्हणूनच राहू दशेत शब्द कमी आणि मौन अधिक . राहू दशेत समाजात सुद्धा अधिक मिसळू नये . अधिकाधिक नामस्मरण करावे आणि सतर्क राहावे. राहू महादशा हि 18 वर्षांची असते. कधी कधी पहिली 9 वर्षे चांगली जातात आणि पुढील 9 वर्षे  रात्रंदिन आम्हा युद्धाचा प्रसंग अशी जातात . प्रत्येकाचा अनुभव वेगळा असतो. पण भल्याभल्यांची झोप  हा राहू निसंशय उडवतो हे अनुभवास येतेच .

प्रत्येक ग्रह हा संपूर्णतः  शुभ किंवा अशुभ नसतो . ह्याच राहूमुळे जग जवळ आले आहे आणि आपण माझा लेख सुद्धा वाचू शकत आहात . राहू चांगला त्यांचे नेट चांगले .काय पटतय ना?  राहू दशेत दुर्गेची आणि महादेवाची आराधना फलद्रूप होते. अश्या ह्या राहुसमोर मी नतमस्तक आहे.

अस्मिता

संपर्क 8104639230
फेसबुक पेज : @yashasweejyotish

ग्रहांचा खेळ आणि मेळ ( हसत खेळत ज्योतिष कार्यशाळा 20 नोव्हेंबर ,2021)

 || श्री स्वामी समर्थ ||

ग्रहांचा खेळ आणि मेळ ( हसत खेळत ज्योतिष कार्यशाळा  20 नोव्हेंबर ,2021)

आपली खूप स्वप्ने असतात .  शेअर मार्केट मध्ये मोठी झेप घ्यायची असते . पण हजारांचे लाख होणार कि लाखांचे हजार हे जाणून घेण्यासाठी आपली स्वतःची पत्रिका समजणे खूप महत्वाचे असते . मी नक्की कुठला व्यवसाय करू ? कुठल्या शाखेचे अध्ययन करू ? आपल्या पत्रिकेवरून आपल्याला बरेच आराखडे बांधता येतात , भविष्याची चाहूल समजते , दिशा मिळते , आयुष्यातील पुढे घडणाऱ्या घटनांचा मागोवा घेता येतो. 

आज प्रत्येक मुलाला परदेशी जावून स्थायिक व्हायचे आहे. मुलापेक्षाही त्याच्या पालकांना त्याचे वेध जास्ती लागलेले असतात . मग तसे योग मुलाच्या पत्रिकेत आहेत का? असतील तर सोन्याहून पिवळे पण नसतील तर ? प्रत्येकाच्या पदरात देवाने त्याच्या पूर्व सुकृताप्रमाणे दान टाकले आहे. त्याप्रमाणे सुख दुक्खाचा खेळ , आशा निराशेचा खेळ आपल्या आयुष्यात होतच असतो . 

अवकाशातील हे सगळे ग्रह आणि तारे आपल्याला काहीतरी देण्यासाठीच तर आले आहेत , त्यांच्याशी मैत्री करून ,त्यांना समजून घेवून  आयुष्याचा निर्भेळ आनंद लुटण्यासाठी  ज्योतिष शास्त्राच्या अभ्यासाची नितांत गरज आहे.  आजच्या तरुण पिढीने तर नक्कीच ह्या शास्त्राचे अध्ययन करावे .

दिवाळीचा आनंद लुटून आता ह्या ग्रहांच्या विश्वात पाऊल टाकायला तुम्हाला नक्कीच आवडेल. आपल्या स्वतःच्या अस्तित्वाची जाणीव करून घेण्यासाठी  नक्कीच “ हसत खेळत ज्योतिष शिकूया “ ह्या कार्यशाळेत सहभागी व्हा . खालील क्रमांकावर whatsapp मेसेज करा म्हणजे पुढील माहिती मिळेल. 

अस्मिता

संपर्क : 8104639230

फेसबुक पेज : @yashasweejyotish 

शुभ दीपावली 2021

 || श्री स्वामी समर्थ ||

दीपावली हा आपला सर्वात मोठा सण आहे. दिवाळी हा दिव्यांचा उत्सव आहे. लक्ष लक्ष दिवे लावून अंधकार दूर करून आयुष्यात नव चैतन्य निर्माण करणारा आणि आपल्याला आयुष्य नव्याने जगण्याची प्रेरणा देणारा हा आनंदाचा उत्सव .

दिवाळीचा फराळ, उटणे , फटाक्यांची आतषबाजी , रांगोळ्या , रोषणाई , आकाश कंदील , रंगीबेरंगी पणत्या आणि ज्ञानप्राप्ती करून देणाऱ्या दिवाळी अंकांची मेजवानी ,दिवाळीचा आनंद वृद्धिंगत करते .

सर्वाना हि दीपावली अत्यंत सुखासमाधानाची ,  मनातील सर्व इच्छा फलद्रूप करणारी , आपल्या ध्येयाकडे वाटचाल करणारी , नवीन योजनांना दिशा देणारी , सकारात्मकतेची , उत्तम आरोग्याची आणि स्वतःला सिद्ध करणारी असुदे हीच स्वामींच्या चरणी प्रार्थना .

शुभ दीपावली

अस्मिता

संपर्क : 8104639230

फेसबुक पेज : @yashasweejyotish

अजि सोनियाचा दिन

 || श्री स्वामी समर्थ ||

आज गुरुपुष्यामृत आहे. गुरु हा आकाश तत्वाचा ग्रह आहे. आकाश जसे सर्वाना सामावून घेते तसेच गुरु प्रधान व्यक्ती ह्या सुद्धा तुही माझा तीही माझी असे करत प्रत्येकाला आपल्यात सामावून घेत आयुष्याचा प्रवास करत असतात . निसर्ग कुंडलीत सुद्धा गुरूच्या राशी ह्या आपल्या उत्तर आयुष्यात येतात म्हणजेच भाग्य स्थानात आणि व्यय भावात . आपले भाग्य घडवण्याची ताकद आपल्या गुरूंमध्येच आहे हेच तर नवम भाव आपल्याला सुचवत असतो. तसेच व्यय भाव हा आपल्याला मोक्षप्राप्ती करून देणारा आहे. आपल्या प्रापंचिक जीवनातून जगताना पारमार्थिक जीवनाची चव चाखायला लावणारा हा गुरु  ह्या जन्माचा नाही तर जन्मोजन्मीचा आपला सखा आहे. 

गुरुप्रधान व्यक्ती नेहमी सकारात्मक विचार करणाऱ्या आणि आपल्या ध्येयाकडे वाटचाल  करणाऱ्या असतात .परोपकार ,दया ,परमेश्वरावरील निस्सीम श्रद्धा  ह्या लोकात अगदी ठासून भरलेली असते. 

देव एकवेळ आपल्यावर रागवेल पण गुरु आपल्या भक्तांवर रागावणे केवळ अशक्य . त्यांचा हात जेव्हा आपल्या मस्तकावर असतो तेव्हा कितीही मोठ्या संकटातून आपली नाव पैलतीराला जाते.

आज गुरूंप्रती समर्पित होण्याचा दिवस आहे. श्री दासगणू महाराजांनी सुद्धा श्री गजानन विजय ग्रंथात लिहिले आहे कि गुरुपुष्य योगावर जो ह्या ग्रंथाचे भावभक्तीने पारायण करेल त्याच्या घरी अनुपम भाग्य येयील. आज पारायण , नामस्मरण , ध्यानधारणा , साधना  ह्यात आपल्याला झोकून देवूया .

whatsapp , instagram आणि सोशल मिडिया हि भुते काहीकाळ बाजूला ठेवून पारमार्थिक आनद लुटुया .

अस्मिता

फेसबुक पेज : @yashasweejyotish

   

संत सेवाच मत परिवर्तन करू शकते

 || श्री स्वामी समर्थ ||

एकदा एक भक्त महाराजांकडे गेला आणि त्याने स्वतःची अमुक अमुक इच्छा पूर्ण व्हावी म्हणून आग्रह केला. महाराज मी आपल्या सेवेत निरंतर आहे त्यामुळे प्रसाद म्हणून माझी हि एव्हडी इच्छा आपण पूर्ण करावी असा हट्टच तो धरून बसला. महाराज धर्मसंकटात पडले कारण त्याची इच्छा हि त्या भक्ताच्या  हिताची अजिबात नव्हती.
संत हे त्रिकालज्ञानी आहेत पण त्याला आत्ता काहीही सांगण्यात अर्थ नाही हे महाराजांनी जाणले. 

महाराज म्हणाले हात्तीच्या इतकच ना ,करू कि तुझ्या मना सारखे पण एक गोष्ट तुला करावी लागेल. ह्या जगात प्रत्येक गोष्टीची एक किंमत असते तेव्हा तू तुझ्या इच्छा पूर्तीसाठी एक लक्ष जप कर आणि मग माझ्याकडे ये. त्या भक्ताला अतिशय आनंद झाला आणि महाराजांना नमस्कार करून तो निघून गेला. पुढे काही काळ लोटल्यावर तो पुन्हा महाराजांकडे आला. महाराजांना मनोभावे चरणस्पर्श केल्यावर महाराज म्हणाले अरे झाला का जप पूर्ण . त्याने होकारार्थी मान डोलावली . त्यावर महाराज हसून उद्गारले चला तर आता तुझी इच्छा बोलल्या प्रमाणे मला पूर्ण करायला हवी. मी वचनबद्ध आहे. त्यावर भक्त ढसाढसा रडू लागला आणि महाराजांच्या चरणांवर त्याने लोटांगण घातले. 

महाराजांनी त्याला उठवून काय झाले असे विचारल्यावर भक्त म्हणाला . महाराज आपली लीला अपरंपार आहे. माझी मनोकामना मलाही फळणारी नव्हती हे आपण अंतर्मनाने कधीच ओळखले होते पण तरीही मला वचन दिलेत . मी जपाला सुरवात केल्यापासून मला क्षणोक्षणी आपण मनात धरलेली इच्छा किती चुकीची आहे ह्याची प्रचीती येत गेली , तरीही मी जप पूर्ण केला. महाराज ह्या जपाने मला चांगल्या आणि वाईटातील फरक कसा ओळखायचा ते शिकवले. आपल्या गुरूंकडे असा हट्ट करून त्यांना  धर्म संकटात टाकण्याचे पाप माझ्या हातून झाले आहे  ह्याची मला शरम वाटते. 

नामस्मरणात गेलेला हा काळ मला खूप काही शिकवून गेला आणि म्हणूनच मला आता काहीही नको . फक्त आपल्या चरणापाशी मला थोडी जागा असुदे इतकच मागीन.

महाराजांनी त्याला प्रेमाने जवळ घेतले आणि म्हणाले अरे वेड्या आपल्या भाग्याप्रमाणे आणि कर्माप्रमाणे योग्य वेळी आपल्याला त्याचे फळ मिळतच असते. आपण काहीच मागू नये कारण मागणे म्हणजे भिक आणि जे न मागता मिळते तो आशीर्वाद असतो. आपण आशीर्वादाचे अभिलाषी असावे . संत आपल्या सर्व इच्छा नक्कीच पूर्ण करतात पण त्या आपल्याला पेलणार्या आणि आपल्या हिताच्या असतील तरच .उठसुठ काहीही मागाल तर महाराजांच्या हातात सोटा आहेच . 

संत आपल्या वाणीला कधीही बट्टा लावून देत नाहीत . आपल्या विचारांचे परिवर्तन करण्याची ताकद भक्तिरसात निश्चित आहे.

एका संतावाचून विचारांचे परिवर्तन कोणी न करू शके आण, सत्य एक त्यांनाच कळे.

संकलन : अस्मिता
संपर्क : 8104639230

@yashasweejyotish फेसबुक पेज चे अनावरण

 || श्री स्वामी समर्थ ||

नमस्कार ,

सद्गुरू श्री स्वामी समर्थ आणि श्री गजानन महाराज ह्यांच्या कृपेने आज माझ्या सर्व ज्योतिष विषयक कार्यशाळांची माहिती देणारे तसेच ज्योतिष शास्त्राची सखोल माहिती देणारे @yashasweejyotish ह्या फेसबुक पेज चे अनावरण करताना मला आनंद होत आहे. आपण सर्वांनी आजवर माझ्या ब्लॉग ला तसेच कार्यशाळांना उत्तम प्रतिसाद दिलात तसाच भविष्यातही द्याल अशी अपेक्षा करते. आपली सर्वांची माझ्या ह्या पेज वरील उपस्थिती माझ्यासाठी अनमोल आहे तेव्हा @yashasweejyotish ह्या पेज ला जॉईन करावे हि विनंती.

आपल्या सूचना नेहमीच स्वागतार्ह आहेत.

अस्मिता

संपर्क : 8104639230

@yashasweejyotish

तेजोमय सूर्य ( रवी )

|| श्री स्वामी समर्थ ||

सूर्योदय निसर्गाचा अविष्कार 

ग्रहमालिकेतील महत्वाचा पिवळाधमक तारा म्हणजेच  “सूर्य” . सुर्यमालीकेत मध्यभागी सूर्य असून त्याभोवती पृथ्वीसकट सर्व ग्रह फिरत असतात .सूर्य स्थिर असतो आणि पृथ्वी फिरत असते म्हणून  सूर्य उगवला , सूर्यास्त झाला असे म्हंटले जाते. सूर्य प्रत्येक राशीत महिनाभर असतो. १४ जानेवारीला सूर्य सर्व राशीतून भ्रमण करून म्हणजेच  संक्रमण करून मकरेत येतो ती मकर संक्रांत .सूर्यामुळे आपल्याला ऋतू आणि दिवस , वार ,वर्ष ह्याचे ज्ञान होते . सूर्याचा अंमल पाठीच्या कण्यावर आहे.  सूर्याची रास सिंह असून मेष राशीत तो उच्चीचा आणि तूळ राशीत निचीची फळे देतो. सूर्य आपला आत्मा आहे. सृष्टीमधील सजीवतेचा  कारक सूर्य आहे. विचार करा एक दिवस सूर्योदय झालाच नाही तर? असा हा सूर्य एक तप्त गोळा आहे. सूर्य हा ब्रम्हांडाचा आत्मा आहे.सूर्य म्हणजेच राजा .सूर्य चांगला असेल तर व्यक्ती पराक्रमी असते आणि राजकारणात यश मिळवते.

सूर्य पत्रिकेत अशुभ असल्यास शरिर कमजोर असते . शारीरिक उर्जा , स्फूर्ती कमी असते . वडिलांशी न पटणे किंवा त्यांचे छत्र हरपणे म्हणजे रवी बिघडल्याचे लक्षण कायम आळस भरलेला असतो. इच्छाशक्ती कमी असते, तसेच धैर्य , निर्णयक्षमता नसते. आत्मसन्मान आणि आत्मविश्वास ह्यामध्ये सुद्धा सूर्य कमजोर असेल तर कमतरता असते. स्वतःला व्यक्त करू शकत नाहीत महत्वाकांक्षा नसणे , खोटा अहंकार असणे. आपल्या करिअर साठी महत्वाचा ग्रह सूर्य आहे . नोकरीवर वरिष्ठांशी न पटणे तसेच केलेल्या कामाचे चीज न होणे , पद प्रतिष्ठा अधिकार न मिळणे हे सूर्य बलहीन असल्याची लक्षणे आहेत .सूर्य कमकुवत असेल तेव्हा प्रचंड अहंकार असतो आणि अश्या व्यक्ती स्वतःची चूक कधीच मान्य करत नाहीत .

आपली  त्वचा सूर्याच्या किरणांमुळे चांगली राहते . परदेशात जवळ जवळ ८ महिने सूर्य दर्शन नसते ,बर्फ पडत असतो त्यामुळे सूर्य किरणांचा अभाव असतो . त्यामुळे त्यांची त्वचा  शुष्क असते. विटामिन D हे सूर्यामुळेच मिळते.

सूर्य कमकुवत असेल तर हृद्य रोग , शरीरातील हाडे ठिसूळ असणे ,बिपी च्या तक्रारी , डोके दुखणे ,पित्ताचे विकार ,ज्वर ,डोके दुखणे हे आजार संभवतात. कुठल्याही कामात यश नाही आणि सतत चिडचिड होते. रक्तासंबंधी समस्या , विटामिन D ची कमतरता , कल्शियम ची कमतरता. डोळ्यांची समस्या ,रोगप्रतिकारक शक्ती कमी ,प्रोटीन ची कमतरता  निर्माण होते.

सूर्य शुभ असेल तर जीवनशक्ती उत्तम असते. राजमान्यता ,लोकमान्यता मिळते. स्त्रियांच्या पत्रिकेत पतीचा कारक सूर्य. सरकारी नोकरी मिळते .नेतृत्व गुण असतात .आत्मविश्वास , जिद्द ह्याची कमी नसते. रवी शुभ असल्यास वक्तशीरपणा ,चालीरीती मानणारा , मानी ,उद्दात्त विचार , धर्म रूढी मानणारा ,मातृपितृ भक्त , विद्येचा व्यासंग असणारा ,मदत करणारा असतो. – शुभ सूर्य असलेल्या व्यक्ती आपल्यापेक्षा हलक्या दर्जाच्या लोकांमध्ये मिसळत नाहीत . सूर्य उत्तम असणार्या व्यक्ती मंत्री ,गावाकडचे मामलेदार , पाटील ,जमीनदार , खंडणी प्रतिष्ठित अश्या असतात.

अस्मिता

antarnad18@gmail.com 

विजयादशमीच्या शुभेछ्या

 || श्री स्वामी समर्थ ||

विजया दशमीच्या  शुभेछ्या

नमस्कार , 

“ अंतर्नाद “ च्या सर्व वाचकांना विजयादशमीच्या मनापासून शुभेछ्या.  आपल्या सर्वाना पुढील वर्ष अत्यंत सुख समाधानाचे जाऊदे हीच स्वामींच्या चरणी प्रार्थना.

अस्मिता

संपर्क 8104639230

या सख्यांनो या....

 || श्री स्वामी समर्थ ||

सर्वत्र होणारे श्री गणरायाचे आगमन सुखाची आनंदाची बरसात करत आहे. लहान थोर सगळ्यांच्याच हृदयावर विराजमान असणारा लाडका  बाप्पा घराघरातून विराजमान होत असल्यामुळे एक मंगलमय वातावरण तयार झाले आहे.

ह्याच विनायकाचा आशीर्वाद घेऊन दुसरे महिला अधिवेशन १२ सप्टेंबर , २०२१ रोजी अनेक मान्यवरांच्या उपस्थितीत संपन्न झाले. हे अधिवेशन भालचंद्र ज्योतिर्विद्यालय आणि स्मार्ट Astrologer ह्या पुण्यातील नामांकित संस्थांनी आयोजित केले होते.

स्त्री म्हणजे दुर्गा ,स्त्री म्हणजेच सरस्वती ,स्त्री म्हणजे पार्वती आणि कालीसुद्धा. स्त्री हि आदिशक्ती जगन्माता आहे आणि वेगवेगळ्या रुपात ती आपल्याला भेटत असते.  भारतीय परंपरेतील  स्त्रीच्या कर्तुत्वाचा आलेख खूप मोठा आहे . झाशीची राणी , आई जिजामाता , रमाबाई रानडे , मदर तेरेसा आणि अलीकडच्या काळातील श्रीमती इंदिरा गांधी , श्रीमती प्रतिभाताई पाटील, श्रीमती सुषमा स्वराज, श्रीमती लता मंगेशकर ,अश्विनी भिडे ,कल्पना चावला अशी कित्येक नावे घेता येतील. असे कुठलेही क्षेत्र नाही जिथे स्त्रीने आपल्या ज्ञानाचा , विचारांचा आणि कर्तुत्वाचा ठसा उमटवला नाही. 

मन वढाय वढाय, उभ्या पीकातलं ढोर । किती हाकला हाकला, फिरी येतं पिकांवर ।। कवियत्री बहिणाबाई चौधरी

सणांचा उत्सवांचा माहोल असल्यामुळे चैतन्यमय वातावरणात अधिवेशनाची सुरवात झाली. माया ताईंनी सर्वांचे अभिवादन केले आणि स्वागताध्यक्षा सौ. पुष्पलताताई शेवाळे ह्यांचा अल्प परिचय करून देऊन स्वागत केले. काही व्यक्तिमत्व इतकी उत्तुंग असतात कि त्यांचा परिचय करून देताना आपणच निशब्द होतो त्यातील एक म्हणजे पुष्पाताई. त्यांनी आपल्या छोटेखानी भाषणात सर्वांचे स्वागत करून श्री व सौ केंजळे ह्यांच्या गौरीकैलास संस्थेला 3 वर्ष पूर्ण झाल्याबद्दल कौतुक केले आणि शुभेछ्या दिल्या.  सौ. ज्योती जोशी ह्यांनी दीप प्रज्वलन केलेली व्हीडीओ क्लिप पाठवून अधिवेशनाला “ Go ahead “  दिला. श्री व सौ केंजळे ,त्यांचे संपूर्ण कुटुंब आणि मान्यवरांच्या उपस्थितीत दीप प्रज्वलन झाले.

ह्या अधिवेशनाच्या उद्घाटक सौ . ज्योती ताई ह्यांचा सत्कार समारंभ पार पडला .  गौरीकैलास संस्थेच्या संस्थापक श्रीमती जयश्री पवार ह्यांचा सौ पुष्पलता शेवाळे ह्यांनी शाल श्रीफळ देऊन सत्कार केला. श्रीमती जयश्री ताई पवार ह्यांचे हि आशीर्वाद आपल्याला आणि  अधिवेशनाला लाभले  .तर अश्या ह्या थोरामोठ्यांच्या आशीर्वादाने कार्यक्रमास सुरवात झाली.

सौ. ज्योती ताई ह्यांचा अल्प परिचय मायाताई नी करून दिला. खरतर ज्योती ताईचे कार्य इतके मोठे आहे कि ते शब्दबद्ध करणे कठीण आहे.  आज Amazon वरती असलेली त्यांच्या पुस्तकाची प्रचंड मागणी हि आम्हा मराठी भाषिकांना अभिमानास्पद गोष्ट आहे. ज्योतीताई ह्यांच्या उद्बोधक भाषणानंतर मायाताई ह्यांनी सौ गौरी केंजळे ह्यांचा परिचय करून देताना त्यांनी त्यांच्या संस्थेबद्दल माहिती देण्याबद्दल विनंती केली. गौरी केंजळे ह्यांनी आपल्या संस्थेचे नामकरण आणि त्याचा आजवरचा प्रवास ह्याबद्दल विस्तृत माहिती दिली.

श्रीमती जयश्री पवार ह्यांचा सौ पुष्पाताई सत्कार करताना 

सौ. हीना ओझा आणि सौ . वैशाली अत्रे ह्यांची अधिवेशनाला शुभेछ्या दिल्या .स्त्रियांना व्यासपीठावर कधीच फारसा वाव दिला जात नाही हे नेहमी पाहण्यात येते म्हणून महिलांसाठी खास असे अधिवेशन असावे असे मला नेहमी वाटायचे आणि आज हि इच्छा पूर्ण झाल्याचे समाधान  सौ. हीना ओझा ह्यांनी बोलून दाखवले.  सौ. सुनिता ताई पागे ह्यांनी आपल्या सुश्राव्य  मधुर आवाजात सर्वांचे अभिवादन करताना अधिवेशनाला  शुभेछ्या दिल्या. सुनीताताई ह्या नुसत्या ज्योतिष शास्त्र , Taro Card ह्यातच प्रगत नाहीत तर त्या अत्यंत क्रिएटीव्ह आहेत हे त्यांच्या e magzine वरून लक्ष्यात येतेच . भावनाविवश झालेल्या श्री कैलास केंजळे ह्यांनी सत्काराला उत्तर देताना सर्वांचे आभार मानले. 

बुधवारीय व्याख्यानमालेचे अर्ध शतक पार केलेल्या सर्वेसर्वा आणि सर्वश्रुत सर्वांच्या आवडत्या 
सौ. जयश्रीताई बेलसरे  ह्यांनी त्यांच्या नेहमीच्या खास शैलीत मनोगत व्यक्त केले. गेली ३० वर्षे ज्योतिष विश्वात  कार्यरत आणि २५ वर्षे ज्योतिर्विद महासभेत  दर शनिवारी निःशुल्क व्याख्यानांचे आयोजन केले . ह्या संस्थे तर्फे 13 ज्योतिष भूषण पुरस्कार प्रदान केले.  सर्वात विशेष म्हणजे करोनाच्या अत्यंत वाईट काळात 2020 मध्ये त्यांनी zoom च्या माध्यमातून अधिवेशने घ्यायला सुरवात केली आणि जणू काही हे विश्वची माझे घर ह्या उक्तीला धरून ज्योतिष परिवार एकत्र आणला. 

जयश्री ताईंनी  संपूर्ण केंजळे परिवाराचे  स्वागत केले. आजच्या कार्यक्रमाला लाभलेल्या केंजळे कुटुंबियांच्या उपस्थितीमुळे अधिवेशनाला कौटुंबिक स्वरूप आले . ग्रह आणि त्यांचे व्यवसाय ह्यांची सुरेख सांगड घालताना जयश्री ताई म्हणाल्या  कि ज्योतिषाने आपला प्राण विषयात ओतला तर त्यातील गाभ्यापर्यंत नक्कीच जाता येयील. 

अधिवेशन ५ सत्रांमध्ये संपन्न झाले. आज आपल्याला वक्त्या म्हणून लाभलेल्या दिल्लीच्या आचार्य रेखा डागर ह्यांनी अनेक संस्थांची उच्च पदे भूषवली आहेत . लाल किताब च्या अनुषंगाने काय दान करावे अथवा न करावे ह्याबद्दल विशेष मार्गदर्शन त्यांनी केले.  . दलाई लामा ह्यांची भेट होण्याचे सौभाग्य प्राप्त झालेल्या , सौ. सुनीली जानी पवार(मुंबई)  ह्यांनी साडेसाती ,शनी ,कर्माचा सिद्धांत , गोचर शनीचे पत्रिकेतील भ्रमण , पत्रिकेतील चंद्राची स्थिती ह्याबद्दल त्यांनी आपले विचार मांडले.  

विद्याविभूषित आचार्य सौ. सर्वेश गुप्ता ह्यांनी  Taro Cards बद्दल माहिती दिली. ह्या सत्राच्या अध्यक्षा सौ. स्मिता गिरी ह्यांनी आभार प्रदर्शन केले. स्मिताताईंचा शापित कुंडली ह्या विषयाबद्दलचा अभ्यास खूप सखोल आहे. भारतातील अनेक ठिकाणाहून एकत्र आलेल्या सर्व महिला ज्योतिष अभ्यासकांना एकत्र आणण्याचे कार्य दादांनी केल्याबद्दल त्यांनी त्यांचे आभार मानले. ह्या सत्रात मोलाचे मार्गदर्शन करून ज्ञानदान दिलेल्या सर्वांचे त्यांनी अभिष्टचिंतन केले. 

अधिवेशनाच्या तिसऱ्या सूत्राचे संचालन सौ. श्वेता बोकील ह्यांनी केले. त्या गेल्या ५ वर्षापासून ज्योतिष शास्त्राची सेवा करत आहेत आणि अष्टकवर्गाचा अभ्यास तसेच आधुनिक पद्धतीने ग्रहमिलन , गुणमिलन हेही त्यांच्या अभ्यासाचे  विषय आहे.  मुंबईच्या डॉ. रिटाबेन गांधी ह्यांनी मोबाईल न्यूमेरोलॉजी ह्या विषयाबद्दल बद्दल आपले विचार मांडले . 

ह्या सत्राची सांगता मुंबईच्या डॉ. सौ अरुणा जानी ह्यांच्या वक्री ग्रह त्यांच्यात कशी फळे देतात त्याचे सुंदर विश्लेषण केले. ग्रहांच्या मार्गी,  स्तंभी आणि वक्री अवस्थातून त्यांनी आपल्याला प्रवास घडवला. पत्रिकेतून मुळच्या वक्री असलेल्या ग्रहावरून गोचरीचा वक्री ग्रह भ्रमण करताना राजयोगाची फळे मिळतात असे अनेक अनुभव सिद्ध नियम सर्वांच्याच ज्ञानात भर टाकणारे ,चिंतनशील बनवणारे होते. वक्री ग्रहाचा गत जन्माशी कसा संबंध असतो हे  विषद करताना त्यांनी प्रत्येकाला ह्याबद्दलचा एक वेगळा दृष्टीकोण, विचार दिला. जीवनात गुरुचे अनन्यसाधारण महत्व विषद करताना त्यांनी  गुरूच्या वक्री स्थितीवर सुद्धा भाष्य केले . गुरूबद्दल चर्चा चालू असताना  ह्या २ ओळी आठवल्या .

गुरुविणा जीवनात कोण येयील कामी , खडतर पुढे रस्ता पण पाठीशी स्वामी |
जीवनाच्या वाटेवर नको मना भ्रांती , गुरुपदी घेऊ चला क्षणभर विश्रांती ||

व्यासपीठावरील आणि उपस्थित सर्व गुरुतुल्य व्यक्तींना माझा साष्टांग नमस्कार .

दिल्लीच्या आचार्य भावना भाटिया ह्यांनी लाल किताब प्रमाणे ग्रहांचा आयुष्य मर्यादेवर होणारा प्रभाव विषद केला .आपल्या विचारांचे आदान प्रदान करणारा सुंदर मंच ,हे व्यासपीठ दादांनी दिले त्यामुळे वर्षातून एकदोनदा सर्व जण भेटत राहतात ह्यासाठी त्यांनी दादांबद्दल कृतज्ञता व्यक्त केली. पुण्यातील आचार्य गीतू मिरपुरी ह्यांनी क्रिस्टल थेरपी बद्दल माहिती दिली. आचार्य प्रीती दवे ह्यांनी वास्तुशास्त्राची माहिती देताना आपल्याला ज्योतिषशास्त्राची सखोल माहिती नसली तरी विषय आवडीचा आहे हे सांगताना वास्तूचे काही उपाय सांगितले. ह्या सत्राची पूर्तता सौ संजीवनी मुळे ह्यांनी आपल्या सुश्राव्य व्याख्यानाने केली. सर्व व्याख्यात्यांचे आभार मानून त्या म्हणाल्या आज आम्हाला अनेक विषयातील ज्ञानप्राप्ती झाली आणि त्याबद्दल आनंदच वाटतो.

मुंगी उडाली आकाशी | तिने गिळिले सूर्याशी || संत मुक्ताबाई

चौथ्या सत्राची सुरवात रायपुर च्या प्रज्ञा त्रिवेदी ह्यांनी  मानसिक समस्या आणि ग्रहयोग ह्या विषयावरील विवेचनाने केली. मुंबईच्या मनीषा किणी ह्यांनी फुलांच्या फ्रिक्वेन्सीचा आपल्या मानसिकतेशी कसा संबंध आहे आणि त्यांचा वापर करून आपण मानसिक समस्यांना तिलांजली कशी देऊ शकतो ह्याची माहिती दिली. हा एक वेगळाच विषय आणि त्याची माहिती आज मिळाली त्याबद्दल त्यांचे आभार .

पुण्याच्या अंजली पोतदार “ मृत्यू पुत्र – केतू “ हा एक हटके विषय सर्वांसमोर  मांडला . केतूचे पत्रिकेतील प्रत्येक स्थानातील अभ्यासपूर्वक भ्रमण त्यांनी घडवले . केतूचे व्यक्तिमत्व समोर उभे केले. ह्या सत्राची सांगता अध्यक्षा सौ.  सुनिता साने ह्यांनी केली.  हे सत्र विशिष्ठ्य पूर्ण झाले हे सांगताना त्या खरच  निशब्द झाल्या होत्या. त्यांनी सर्व आयोजकांचे आभार मानले. 

अधिवेशनाच्या अखेरच्या सत्राने खास रंगत भरली.  डॉ सौ. सविता महाडिक आणि सौ. मालती शर्मा ह्या विशेष सत्राच्या परीक्षक आणि अध्यक्षाही होत्या.  

ह्या सत्रात “ उपयुक्त ज्योतिष सूत्र “ ह्या विषयावर चार मिनिटात आपले विचार मांडायचे होते . अनेक ज्योतिष प्रेमींनी ह्यात सहभाग घेतला. ह्या स्पर्धेत प्रथम पारितोषिक रुपये 1000 , द्वितीय रुपये 750 आणि तृतीय  रुपये 500 असे जाहीर झाले.

राजनंदा वर्तक ह्यांनी प्रथम पारितोषिकाचा मान पटकावला . द्वितीय पारितोषिक  मुग्धा पत्की आणि हर्षदा देशपांडे  ह्यांच्यात विभागून देण्यात आले. तृतीय पारितोषिक योजना गायकवाड ह्यांना देण्यात आले.  सर्व विजेत्यांचे कौतुक आणि अभिनंदन.

अधिवेशन नेहमीप्रमाणेच  शिस्तबद्ध झाले. सौ गौरी केंजळे ह्यांनी सर्वांचे आभार मानून ह्या कार्यक्रमाची सांगता केली. कितीही दमली तरी सुरवातीपासून अधिवेशनाच्या शेवटपर्यंत असलेला टवटवीत चेहरा म्हणजेच  गौरी . श्री दादा शेवाळे ह्यांनीही सर्वांचे अभिवादन केले . सर्वांच्या उपस्थितीमुळे हे अधिवेशन आठवणीत राहील हे आवर्जून सांगितले.

आज ह्या अधिवेशनाने आम्हाला माहेरी आल्याचा फील दिला. सगळ्या नणंदा , भावजया , लेकी सुना एकत्र  येऊन सद्गुणांची देवाणघेवाण करताना दिसल्या. स्त्रियांनी स्त्रियांसाठी उभारलेल्या ह्या व्यासपीठाने प्रत्येक स्त्रीमधील सुप्तगुणांना व्यक्त होण्याची संधी दिली. आज उपस्थित सर्वच व्याख्यात्या इतक्या महान आहेत कि त्यांचे वर्णन करायला माझी शब्दसंपदा कमीच पडेल.

रोजचे जीवन जगताना ,संसारिक जबाबदाऱ्या पेलताना आपल्या आवडत्या छंदांना आत्मविश्वासाचे पंख लावून मुक्त विहार करायला देणाऱ्या ह्या व्यासपीठासमोर आणि सर्व आयोजकांसमोर मी नतमस्तक. 

माझ्यातील लेखिकेला आपले विचार लेखनाच्या माध्यमातून  मांडण्याची हि संधी दिल्याबद्दल मी आपल्या सर्वांच्या लाडक्या दादांचे मनापासून आभार मानते. आपल्यासारखे दर्दी वाचक आहेत म्हणून लेखकाच्या लेखनाला न्याय मिळतो. एकमेकांचे पाय खेचणे हे चित्रच नेहमी समाजात दिसते. पण प्रत्येकातील सुप्त गुण ओळखून त्यांना पुढे आणण्यासाठी  धडपड करणारे हे जगावेगळे ,अत्यंत प्रेमळ ,निरपेक्षपणे आपले काम करत राहणारे व्यक्तिमत्व म्हणजे “ दादा शेवाळे “. सगळ्यांना बरोबर घेऊन जाणारी माणसे आज विरळाच आहेत . पण दादा मात्र प्रत्येकाच्या मागे खंबीर उभे राहतात  आणि त्यांच्याच आशीर्वादाने आजचा हा सोहळा पार पडला. 

मोत्याच्या माळेतून एकेक मोती ओघळत जावा तसे आजचे एकेक व्याख्यान होत होते. अनेकविध विषयांचे ज्ञान एका छताखाली देऊ पाहणारे हे गुरुकुल आहे.  सर्व कार्यकारी मंडळाचे आणि आयोजकांचे मनापासून कौतुक. ज्योतिष ह्या विषयापुरते मर्यादित न राहता इतर अनेक क्षेत्रात दैदिप्यमान यश मिळवणाऱ्या आपल्या मैत्रीणीना इथे आमंत्रित करावे असे आयोजकांना सुचवावेसे वाटते.  

आजच्या अधिवेशनाला मायेचा सुगंध निश्चित होता . प्रत्येकाचा विषयाकडे बघण्याचा दृष्टीकोन वाखाणण्याजोगा होता.  आपलेपणाची झालर असलेले हे अधिवेशन खूप काही देऊन गेले.  प्रत्येक यशस्वी पुरुषाच्या मागे एक स्त्रीच असते  पण प्रत्येक स्त्री सुद्धा आपल्या सखीच्या मागे उभी राहून तिला यशाची शिखरे पादाक्रांत करायला मदत करू शकते  हेच बाळकडू आज मिळाले . अत्यंत सुरेल , शिस्तबद्ध आयोजन ह्या गोष्टी नजरेतून सुटणार नाहीत . अभ्यासू सख्यांच्या ज्ञानगंगेत मने चिंब भिजून गेली.  एकाच व्यासपीठावर व्यासंगी ,उत्तुंग व्यक्तिमत्व एकत्रित असल्यामुळे व्यासपीठ “ गुरुकुल “ झाले होते.  दिवस भुर्रकन उडून गेला आणि सांगतेचा क्षण जवळ आला.  

आजचे अधिवेशन स्त्री शक्तीचा जागर करणारे, स्त्री च्या कर्तुत्वाला सलाम करणारे ,स्त्रीयांच्या  एकजुटीचे महत्व सांगणारे ठरले. स्त्री हि क्षणाची पत्नी आणि अनंत काळची माता असतेच पण त्याहीपलीकडे प्रत्येक स्त्रीने आपले अस्तित्व सिद्ध केले पाहिजे ,आपल्यातील कलागुणांना आपणच हेरले पाहिजे आणि स्वतःला सिद्ध केले पाहिजे. थायलंड ,सिंगापूर आणि अन्य देशात ९०% पेक्षा अधिक स्त्रिया विविध क्षेत्रात कार्यरत आहेत . जी स्त्री एका जीवाला जन्म देऊ शकते ती यशाची अगणित दालने उघडू शकते ,तिला काहीच अशक्य नाही. आजच्या सगळ्या आठवणी पुढील अधिवेशनापर्यंत चिरकाल स्मृतीत दरवळत राहतील.

आज सणासुदीच्या दिवसामुळे अनेक सख्या  ह्या कार्यक्रमाला हजेरी लाऊ शकल्या नाहीत , त्यांच्यासाठी खास हा “ आंखो देखा हाल “ जेणेकरून मी काहीतरी गमावले “  ह्याची हुरहूर त्यांना वाटायला नको. अधिवेशनाची सांगता होताना सगळेच सद्गदित झाले.  

आपल्या सर्व सख्यांचे हे  व्यासपीठ आपले हक्काचेच आहे म्हणूनच एक क्षण मानत आले कि  उपस्थित आणि अनुपस्थित सर्व सख्यांना जणू हे व्यासपीठ “ या सख्यानो या “ असेच तर म्हणत नसेल...

आपण सर्वच पुन्हापुन्हा असेच भेटत राहणार आहोत आणि प्रत्येक वेळी इथून जाताना आयुष्य एक वेगळ्याच उंचीवर नेणार आहोत . 

संकलन : सौ.अस्मिता दीक्षित 

संपर्क    : 8104639230

antarnad18@gmail.com

तेथे कर माझे जुळती

 || श्री स्वामी समर्थ ||

आज शिक्षक दिन.  माझ्या आयुष्यातील सर्व गुरुतुल्य व्यक्तींना ,माझ्या सर्व गुरूना माझा साष्टांग नमस्कार . शाळेत असताना आजच्या दिवशी आम्ही वर्गासमोर उभे राहून शिक्षकांच्या बद्दल भरभरून बोलत असू त्या आठवणी आज जाग्या झाल्या .त्या लहान वयात फारसे समजत नसले तरी शाळेतल्या शिक्षिका  म्हणजे  आईसमान हि भावना मात्र मनात रुजलेली असायची.

माझ्या आयुष्यात मला ज्योतिष शास्त्र शिकण्याचा योग आला आणि त्यानिम्मित्ताने अनेकांशी परिचय तर अनेकांच्या कडून हि विद्या प्राप्त करण्याचे सौभाग्य लाभले म्हणून मी स्वतःला भाग्यवान समजते.

आज माझ्या ब्लॉग वरील “ मला भावलेली व्यक्तिमत्व “ ह्या सदरात माझ्या गुरुंबद्दल लिहिताना मला खरच खूप भरून आले आहे. त्यांच्याविषयी लिहिण्याची खरतर माझी पात्रता नाही तरी माझ्या त्यांच्याबद्दल असणार्या भावना व्यक्त करण्यासाठी आजच्या सारखा योग्य दिवस असूच शकत नाही . त्यांचे माझे नाते म्हणजे द्रोणाचार्य आणि एकलव्य . नुसती त्यांची व्याख्याने ऐकून सुद्धा मी खूप काही शिकले आहे त्यांच्या आणि माझ्याही नकळत . त्या माझ्या गुरु हि आहेत आणि एक मैत्रीण सुद्धा .आपल्या सर्वांच्या लाडक्या “ डॉ.सौ. शिल्पाताई अग्निहोत्री “ ह्यांच्या सोबत आज आपल्या गप्पा रंगणार आहेत .

एका क्षणात समोरच्या व्यक्तीला “ मी तुझ्यासोबत आहे “ हा दिलासा आपल्या प्रेमळ लाघवी शब्दांनी देणाऱ्या शिल्पाताई खरच असामान्य व्यक्तिमत्व आहे. त्या स्वतःच एक ज्ञानाचे परिपूर्ण विद्यापीठ आहेत . सर्व विद्यार्थ्यांमध्ये आणि जनमानसात आपलेसे वाटणाऱ्या ह्या व्यक्तीमत्वाचा सर्वात विशेष भाव म्हणजे कुठल्याही प्रकारचा अहंकार ,मीपणाचा लवलेश  नसणे , हा असल्यामुळे त्या नेहमीच कौतुकास्पद ठरतात .

त्यांचे मृदू  आणि आश्वासक बोलणे समोरच्याला क्षणात आपलेसे करते. आपल्यापुढे आज त्यांच्या व्यक्तिमत्वाचे अनेक पदर उलगडण्याचा माझा हा लहानसा प्रयत्न आहे. 

शिल्पाताई ह्या ज्योतिष शास्त्राच्या उत्तम सखोल अभ्यासक आहेत . त्यांनी ह्या शास्त्राचे अध्ययन पुण्यातील भालचंद्र ज्योतिष विद्यालय , श्री.व. दा.भट सर ,श्री.मारटकर सर ,श्री श्रीराम भट सर ,श्री.एम.कटककर सर , श्री. अष्टेकर सर ,सौ. बेलसरे अश्या अनेक गुरुंकडे घेतले आहे. अजूनही असंख्य गुरु आहेत ज्यांच्या विचारांनी त्या प्रेरित आहेत . शिल्पाताई स्वतःला कधीच परिपूर्ण समजत नाहीत . हे शास्त्र शिकण्यास उभा जन्म अपुरा पडेल म्हणून त्या स्वतःला नेहमीच अभ्यासक म्हणवून घेणे अधिक पसंत करतात . उत्तम लेखनशैली तर आहेच पण त्या सोबत वाकचातुर्य , प्रसंगावधान सुद्धा आहे. मुलाखतीत नेमके प्रश्न विचारून समोरच्याच्या व्यक्तिमत्वाचा ठाव कसा घ्यायचा, त्याला कसे बोलते करायचे हा गुण खरच मुलाखत घेणार्यांनी त्यांच्याकडून शिकण्यासारखा आहे. ह्या सर्व गुणांमुळेच शिल्पाताई असलेल्या व्यासपीठाला नक्कीच एक वेगळा रंग चढतो.

ज्या क्षणी आपण स्वतःला परिपूर्ण समजतो तिथेच ज्ञान खुंटते हे अगदी खरे आहे. शिल्पाताईना विविध विषय शिकण्याची आवड असल्यामुळे त्या ह्या शास्त्राकडे आकर्षित झाल्या आणि ह्या शास्त्राच्या माध्यमातून लोकांना आपल्याला काहीतरी चांगले देता येयील , त्यांना त्यांच्या दुक्खातून बाहेर काढता येयील असा विश्वास सुद्धा त्यांना वाटला. 

ह्या शास्त्राचा अभ्यास करण्यासाठी नवोदितांना काय मार्गदर्शन कराल ह्यावर त्या म्हणाल्या ,अग हे शास्त्र म्हणजे अथांग महासागर आहे, जितके खोल जाल तितके मोती हाती येतील. त्यामुळे नवोदितांनी हे शास्त्र शिकताना संयम ठेवला पाहिजे . 

शास्त्राची तोंडओळख झाली कि त्यानंतर स्वतःचे संशोधन सर्वात महत्वाचे आहे. ह्या शास्त्राचा अभ्यास करताना त्यांनी अनेक परीक्षा दिल्या आणि त्यात मिळालेल्या अद्वितीय अश्या यशाने त्यांना शिकण्याचा हुरूप आला. पूर्वी त्या अनेक कला शिकवत असत पण पुढे त्यांनी ह्याच क्षेत्रात करिअर करायची हा विचार पक्का केला.

शिल्पाताईंशी बोलताना त्यांचा संयम ,भाषेवरील पकड , सवांद शैली ,समोरच्याला अत्यंत मान देणे ह्या गोष्टी सहज लक्ष्यात येत होत्या. शास्त्री परीक्षेत महाराष्ट्रात  त्यांनी तिसरा आणि पुण्यात दुसरा क्रमांक मिळवला . “ व्हर्टिगो “  ह्या विषयावरील सादर केलेल्या प्रबंधात  त्यांनी महाराष्ट्रात प्रथम क्रमांक मिळवला.. विवाह आणि अंकशास्त्र ह्या विषयावर सखोल अभ्यास त्यांनी केलेला आहे. 

शिल्पाताईंशी गप्पा म्हणजे एक बौद्धिक मेजवानीच असते. वेळ कसा जातो ते समजत नाही. त्यांचा प्रत्येक शब्द काहीतरी देऊन जातोच. मेडिकल astrology आणि करिअर ,संतती ह्या विषयावरील त्यांचे संशोधन अजूनही चालूच आहे.  “ शोध अनुवंशिकतेचा ” ह्या त्यांच्या पुस्तकात त्यांनी ज्योतिष शास्त्राच्या अनुषंगाने अनुवंशिकता ह्या विषयावर प्रकाश टाकण्याचा प्रयत्न केलाय. 

त्यांचे पुढचे पाऊल म्हणजे 2011 साली त्यांनी शास्त्राच्या प्रसारासाठी स्थापन केलेली “ आदिशक्ती ज्योतीर्विद्यालय “ हि संस्था. 

ह्या संस्थेत कुंडली शास्त्राचा ,पंडित , विशारद तसेच  शास्त्री परीक्षेसाठीचा अभ्यासक्रम घेतला जातो. 

कुंडलीचा फलादेश सांगणे हा अत्यंत महत्वाचा भाग असतो. हस्तशास्त्र , वास्तुशास्त्र ह्याचेही शिक्षण इथे दिले जाते. शिल्पाताई म्हणाल्या मला फारसे टेक्निकल ज्ञान ,अनुभव नाही पण माझा विद्यार्थी “ सौरभ नाफडे “ ह्याने मला Online साठी लागणारा सर्व सेटप करून दिला त्यामुळे मला सोपे झाले. 

प्रत्येक महिन्याच्या पहिल्या शनिवारी संस्थेतर्फे निशुल्क व्याख्यान घेतले जाते ज्यात ह्या क्षेत्रातील अनेक मान्यवर हेजेरी लावतात .

शिल्पाताईंची हि संस्था ज्ञानगंगेची धुरा समर्थपणे पेलत आहे. गेल्या काही दिवसात त्यांनी Youtube च्या माध्यमातून एखादा विषय घेऊन त्यावर व्याख्याने द्यायलाही सुरवात केली आहे. हे शास्त्र प्रगत आहे, रोज ह्यात नवनवीन बदल घडताना दिसतात ,संशोधन होत असते . म्हणूनच काळासोबत चालणे , वाचन वाढवणे आवश्यक आहे असे त्यांनी नमूद केले आणि ह्या सर्वासाठी  संस्था अनेकविध उपक्रम राबवत आहे. 

ह्या शास्त्राच्या अभ्यासाचा त्यांचा प्रवास वाखाणण्याजोगा आहे. ह्या शास्त्राने त्यांना खूप काही दिले आहे. जीवन कसे जगायचे त्याचे महत्व समजले, मानसिक समाधान दिले , अध्यात्माची अनेक दालने उघडून दिली आणि त्यातील बैठक पक्की झाली. जातकाच्या प्रश्नांची उकल केल्यावर लाभलेले समाधान कुठेच मिळणार नाही आणि त्याचे मोलही करता येणार नाही हे त्यांनी आवर्जून सांगितले.

शिल्पा ताई स्वतःसाठी जगणे कधीच विसरून गेल्या आहेत इतक्या त्या “ ज्योतिषमय  “ झाल्या आहेत . त्यांचे कमी काळातील केलेले कार्य उत्तुंग आहे. इतके हे शास्त्र संपन्न , प्रगल्भ  आहे पण तरीही त्याला दुषणे ठेवली जातात हे सत्य डोळ्याआड करून चालणार नाही .म्हणूनच न राहवून एक प्रश्न विचारावासा वाटला कि समाजाला खरच ह्या शास्त्राची गरज आहे का? त्यावर शिल्पा ताई म्हणाल्या ,जेव्हा सर्व प्रयत्न संपतात , सर्वत्र अंधकार दिसू लागतो तेव्हा जातक ज्योतिषाकडे मोठ्या आशेने येतो. 

आजच्या धकाधकीच्या जीवनात जनसामान्यांचे प्रश्न  शिक्षण , परदेशगमन , नोकरी , विवाह , घर आणि पुढील आयुष्य  ह्याभोवतीच फेर धरून असतात .पत्रिकेच्या माध्यमातून व्यक्तीला वरील सर्व प्रश्नांसाठी नक्कीच मार्गदर्शन मिळू शकते. विद्यार्थ्यांना करिअर ची निवड करण्यासाठी तर अनेकांना आपले आयुष्य वाचवण्यापर्यंत हे शास्त्र उपयोगी पडते आणि म्हणूनच समाजाने ह्या शास्त्राची हेटाळणी न करता त्याचा योग्य तो सन्मान केला पाहिजे.

आजकाल “ विवाह “ हि समाजाला भेडसावणारी ज्वलंत समस्या आहे. ह्यातही शास्त्राच्या माध्यमातून दोघाने समुपदेशन करून अनेकांचे घटस्फोट वाचलेले आहेत .

ह्या सगळ्याचा गांभीर्याने विचार करता आज तरुण पिढीने ह्या शास्त्राकडे अभ्यासू नजरेने पाहून ते आत्मसात केले पाहिजे असे मी म्हणताच त्या म्हणाल्या अग आश्चर्याची गोष्ट अशी कि आज तरुण पिढीचा ओढा हे शास्त्र शिकण्याकडे नक्कीच आहे.  ह्या शास्त्राचा संशोधनात्मक अभ्यास केला तर जीवन सुसह्य होते . नुसत्या वल्गना करणार्यांनी ह्या शास्त्राची जरूर प्रचीती  घ्यावी आणि मगच मत ठरवावे.

अवकाशात अनेक मैल दूर असणारे हे तारे जेव्हा मानवी जीवनावर परिणाम करताना दिसतात तिथेच ह्या शास्त्राचे मोठेपण सिद्ध होते. कुणी टीका केली म्हणून ह्या शास्त्राचे महत्व तसूभरही कमी होणार नाही . ज्योतिष काहीवेळ बाजूला ठेऊया पण हिंदू धर्मातील अनेक परंपरा अगदी रोजच्या जीवनाशी निगडीत असणारे पंचांग कसे पाहायचे तेही अनेकांना माहित नसते . ह्या सर्वाचा अभ्यास जीवनाला पूरक असाच आहे.  हे शास्त्र शिकणार्या प्रत्येकाला त्याचा ध्यास घ्यावा लागतो . ते नसानसात मुरले तर त्याची महती समजते आणि गोडी वाढते .अभ्यासू वृत्ती , संशोधन करण्याची वृत्ती आणि संयम लागतो.

ज्योतिष हि एक तपस्याच आहे. जळी स्थळी  ज्योतिष दिसले पाहिजे इतके त्यात मुरावे लागते . ह्या शास्त्राचा मानवी मनाशी आत्म्याशी जीवनाशी जवळचा संबंध आहे.शिल्पा ताई नेहमी म्हणतात उत्तम ज्योतिषी होण्याआधी आपल्या व्यक्तिमत्वाची जडणघडण होणे अत्यावश्यक आहे.

ज्योतिषाचा अभ्यास हा दांडगा असायला लागतो कारण जातक सर्वार्थाने आपल्या निर्णयावर बरेचदा अवलंबून असतो .म्हणूनच ज्योतिषाला आपले कर्म , मानसिकता , उपासना चांगली ठेवावी लागते. कारण जो दुसर्याला उपासना सांगतो त्याची स्वतःची उपासना भक्कम असलीच पाहिजे नाही का.

गप्पांमध्ये अनेक विषय येत होते . शिल्पा ताईंच्या नजरेतून मी ह्या शास्त्राचे नाविन्य अनुभवत होते. सर्व आजचे युग हे स्पर्धेचे युग आहे . सर्वच क्षेत्रात असणारी जीवघेणी स्पर्धा ह्याही क्षेत्रात आहेच .आपला विवेक जागृत असेल तर कुठे काय शिकायचे ते समजते . उत्तम शिक्षक गुरु लाभणे ह्यालाही पूर्वसुकृत लागते भाग्य लागते. 

अनेकविध पुरस्कारांच्या मानकरी असलेल्या शिल्पाताई प्रत्येक क्षणी ज्योतिष जगत आहेत ह्याची ग्वाही आणि प्रचीती त्यांच्या सोबत झालेल्या गप्पातून मला मिळत गेली. ज्योतिष भूषण ,ज्योतिषाचार्य ,सुखकर्ता ज्योतिष पुरस्कार ,राष्ट्रगौरव, महिला ज्योतिष पुरस्कार ,अखिल ब्राम्हण महासभा तेजस्विनी पुरस्कार ,ज्योतिष ज्ञानचा उत्कृष्ठ लेखक पुरस्कार तसेच ज्योतिष शास्त्रातील अनेक गौरव आणि पुरस्कारांनी त्या सन्मानित आहेत . अनेक कार्यक्रमातून व्याख्याने ,सूत्रसंचालन सुद्धा त्यांनी केले आहे. घरासमोरील विशेष रांगोळी ,आरोग्यमुद्रा ,तुमची रास तुमचे करिअर ,वार्षिक राशी भविष्य तसेच अनेक दिवाळी अंकातून लेखनाद्वारे शास्त्राचा प्रसार करत असतात .

सतत नाविन्याचा ध्यास असणे , स्वतःचे असे वेगळे संशोधन करून विषय समजून घेणे , साधना , मनन चिंतनाची जोड आपल्याला विषयाच्या गाभ्यापर्यंत घेवून जाते. 

ज्योतिष शास्त्राने मला काय दिले हे महत्वाचे आहेच पण आज आपण ह्या शास्त्राला काय देऊ शकतो ह्याचा विचारही केला पाहिजे. अभ्यासकांनी स्वतःला सिद्ध करण्याची धडपड न करता स्वतःला झोकून देऊन शास्त्राची अनुभूती घेतली पाहिजे. 

खरच ज्योतिष हे रोजच्या जीवनात प्रत्येक क्षणी आपण जगतच असतो. म्हणूनच म्हंटले आहे “ Life Is a Cardiogram “ आयुष्य म्हणजे ऊनपावसाचा ,सुख दुक्खाचा खेळ आहे . पण त्यातून ह्या शास्त्राच्या माध्यमातून अंगावर आलेली एखादी सुखद झुळूक सुद्धा जीवनाला कलाटणी देते आणि म्हणूनच आपल्या ऋषीमुनींनी आपल्याला सुपूर्द केलेल्या ह्या अनमोल शास्त्राचा सन्मान करणे आपण शिकले पाहिजे . हा ठेवा आपल्या पुढील पिढ्यानाही सुपूर्द करता आला पाहिजे. प्रत्येकाला आपली पत्रिका काही प्रमाणात माहिती असलीच पाहिजे.

शिल्पाताई म्हणजे ज्ञानाचा कोश आहेत. अजूनही मनात असंख्य प्रश्न रुंजी घालत होते पण कुठेतरी थांबायला पाहिजे हे मला समजत होते .  शेवटी “ कधी थांबणार ? ह्या प्रश्नाऐवजी का थांबलात  ? हा प्रश्न जास्ती चांगला नाही का.

शिल्पा ताईंची सहज सुंदर भाषाशैली , अध्यात्मिक बैठक , विषयाची जाण आणि तो समजावून सांगायची हातोटी केवळ अवर्णनीय आहे. त्यांच्या व्यस्त दिनक्रमातून त्यांनी मला खूप वेळ दिला , कुठल्याही पुस्तकातून मिळणार नाही असे ज्ञानाचा ठेवा मला आज मिळाले ज्याचे कधीच मूल्यमापन करता येणार नाही .

इतक्या वेळ झालेल्या गप्पात  मला अहंकाराचा लवलेश सुद्धा जाणवला नाही आणि ह्याच गोष्टीमुळे त्या सर्वांचे मन जिंकून घेतात .माणसाने घेण्यापेक्षा देण्याकडे अधिक लक्ष दिले पाहिजे कारण त्यातून मिळणारा आनंद हा चिरकाल टिकणारा असतो हाच संदेश त्यांच्या वक्तव्यातून मला वारंवार मिळत गेला.

अश्या ह्या गुरु आणि एक मैत्रीण म्हणून लाभलेल्या गुरुतुल्य शिल्पा ताईचे माझ्या आयुष्यात आणि मनातही खास असे स्थान आहे. मला त्यांचा प्रचंड अभिमान तर आहेच पण त्यांच्या विचारांनी मी प्रेरित आहे .त्यांचे प्रत्येक व्याख्यान हे चिंतन मनन करायला लावते आणि हेच त्यांच्या यशाचे गमक आहे.

आजच्या शिक्षक दिनी शिल्पाताईंच्या चरणी त्रिवार वंदन . शिल्पा ताईंना त्यांच्या  पुढील आयुष्यात अनेक संकल्पना राबवायच्या आहेत . त्यांना उत्तम आयुआरोग्य लाभो आणि त्यांचे जीवन सतत प्रगती पथावर  राहूदे हीच स्वामींच्या चरणी प्रार्थना .आज  शिल्पाताईंचे हे सर्वांगीण यश “ याची डोळा ” पाहताना  त्यांचे सर्व गुरुजन सुद्धा कृतकृत्य झाले असतील. 

शिल्पा ताई म्हणजे एक असामान्य व्यक्तिमत्व आहे.क्षणात आपलेसे करून टाकण्याचा स्वभाव , कुठेही मोठेपणा नाही. सोज्वळ सकारात्मक व्यक्तिमत्व आणि चेहऱ्यावर न संपणारा आनंद , ज्ञानाचे तेज इतके असूनही  आपण कुणीतरी वेगळे ह्या भावनेला थाराही नाही .असे हे संपन्न व्यक्तिमत्व असणार्या शिल्पा ताई आज ह्या शास्त्राच्या सेवेची धुरा  यशस्वीपणे सांभाळत आहेत . 
त्यांच्या साधेपणात त्यांचे मोठेपण दडलेले आहे म्हणूनच म्हणावेसे वाटते
“ दिव्यत्वाची जेथ प्रचीती , तेथे कर माझे जुळती “.

अस्मिता

#अंतर्नाद#शिल्पाअग्निहोत्री#सखोलअभ्यास#पारंपारिकज्योतिष#अंकगणित#वास्तुशास्त्र

 

वेगळ्या वाटेवरचा प्रवास ...

 || श्रीस्वामी समर्थ ||

प्रत्येकाची खूप स्वप्ने असतात . पण ती सत्यात उतरवण्यासाठी दुर्दम्य इच्छाशक्ती , मेहनत लागते. सहज सोप्पे काहीच नसते पण अविश्रांत परिश्रमाने यशश्री खेचून आणता येते.
“ मला भावलेली व्यक्तिमत्वे “ ह्या “ अंतर्नाद “ वरील सदरात आज अश्याच एका धाडसी , अभ्यासू मित्राची ओळख करून देणार आहे ज्याने आयुष्यातील वाटा चोखंदळपणे  निवडल्या आणि आपल्या ध्येय पुर्तीकडे यशस्वी वाटचाल केली. 

स्वतःच्यातील सुप्त गुण ओळखेपर्यंत कधीकधी आपले अर्धे आयुष्य निघून जाते. आजची पिढी खूप सक्षम , समंजस,  हुशार आणि कर्तुत्ववान आहे. पण ह्या गुणांचे चीज होण्यासाठी स्वतःलाही त्यात झोकून द्यावे लागते. अश्याच एका “ समाजाला काहीतरी वेगळे देऊ पाहणाऱ्या “ पुण्याच्या श्री. सौरभ नाफडे "  ह्यांचा परिचय करून देताना आज मनापासून आनंद होत आहे. 

ज्योतिष शास्त्र तसेच इतरही काही माहितीपूर्ण सदर सादर करणारे “ वस्तुस्थिती “ हे youtube chanel सुरु करून त्याने आजच्या तरुण पिढीसमोर एक वेगळाच आदर्श ठेवला आहे. आज त्याच्या कडूनच त्याच्या ह्या प्रवासाबद्दल ,त्याच्याबद्दल आणि त्याच्या ह्या हटके chanel बद्दल अधिक जाणून घेऊया .

सौरभचा ज्योतिष शास्त्राचा प्रवास हा 2009 सुरु झाला. श्री वदा भट सरांची पुस्तके वाचून ह्या शास्त्राच्या अभ्यासाचा श्रीगणेशा झाला. ह्या शास्त्राबद्दल त्याच्या मनात खूप कुतूहल निर्माण झाले आणि ह्या क्षेत्रात आपल्याला काय करता येईल अश्या सर्व विचारातून अभ्यास पुढे गेला.  2016 नंतर त्याच्या ज्योतिष शास्त्र शिकण्याच्या अभ्यासाला खऱ्या अर्थाने गती आली . ह्या क्षेत्रातील एक उत्तुंग आदर्श व्यक्तिमत्व , अभ्यासक सौ. शिल्पाताई अग्निहोत्री ह्या त्याला गुरु म्हणून लाभल्या आणि खरे शिक्षण सुरु झाले. गेली ५ वर्षे ह्या शास्त्रातील त्याचे अध्ययन , चिंतन , मनन ह्यामुळे अभ्यास परिपक्वतेकडे गेला . ज्योतिष आणि वास्तुचाही अभ्यास करत असताना  आपण काहीतरी वेगळे केले पाहिजे हि भावना त्याच्या मनात रुंजी घालत होती. आयुष्यात सगळ्यात महत्वाचे काय असते तर आजचा आत्ताचा क्षण . आज ह्या क्षेत्रात काय घडामोडी घडत आहेत , काय वेगळेपण आहे ह्या सर्वाचा विचार करताना आपण ह्या शास्त्राच्या अभ्यासकांना , त्यांच्या विचारांना चालना देणारे ,अभ्यासपूर्ण मार्गदर्शन केले पाहिजे ह्या विचारांनी प्रेरित होत असतानाच “ वस्तुस्थिती  “ ची संकल्पना आकारास आली . अल्प काळातच अभ्यासकांच्या हृदयात स्थान मिळवलेल्या ह्या त्याच्या chanel बद्दल सांगताना सौरभ  भरभरून बोलत होता. त्याचा हा प्रवास जाणून घेण्यासाठी मीसुद्धा उत्सुक होतेच. 

“ Present moment is inevitable “ ह्या सूत्राला धरून,ज्योतिष शास्त्रात आज काय घडामोडी संशोधन होत आहे ,त्याचा जवळून आढावा घेणारे , वर्तमानाशी संबंधित असणारे  तसेच नवीन ज्योतिष शिकणार्यांसाठी काय देता येयील ह्याचा विचार “ वस्तुस्थिती “ मध्ये केलेला दिसतो. भविष्य घडवायचे असेल तर वर्तमान काळाचे भान ठेवून जगता आले पाहिजे.

ज्योतिष विशारद , ज्योतिष पंडित , वास्तूविशारद असलेल्या सौरभ ने ज्योतिष आणि वास्तू ह्यांचा एकत्र मेळ घालून एका वेगळ्या दृष्टीने पत्रिकेचा अभ्यास करता येतो का , वास्तू आणि ज्योतिषीय संकल्पनांमध्ये काही समान संदर्भ  सूर सापडतो तसेच ज्योतिष ग्रंथांमध्ये सुद्धा वास्तूच्या नियमांवर प्रकाश टाकला आहे का  ह्यासाठी चे संशोधन अजूनही तो करत आहे. दिशा आणि ग्रह ह्यांचा एकमेकांशी असलेला संदर्भ त्यांचे परिणाम आणि त्याचा पत्रिकेत मिळणारा अनुभव हा विषय गहन आहे आणि त्याचाही अभ्यास सौरभ अनेक वर्ष करत आहे. तसेच जैमिनी सूत्रे , वास्तूच्या 45 देवतांचा वैदिक संदर्भ ह्याचाही अभ्यास चालू आहे. मानवी जीवनाशी ह्या सर्वाची सांगड घालता येते का हा 
“ वस्तुस्थिती “ चा प्रमुख उद्देश आहे. ज्योतिष शास्त्रातील संकल्पना सुलभ साध्या सोप्या शब्दात कथन करणे जेणेकडून हा विषय सहज उलगडेल. लहान विषय घेवून एखादा मोठा गाभा समजावून सांगणे ह्याकडे ह्या chanel चा अधिक कल असल्यामुळे हे chanel सर्वार्थाने “ हटके “ झाले आहे. योग्य विषयाची निवड , त्याची बांधणी ,त्या समाविष्ट असणार्या गोष्टी ह्या सर्वच अद्भुत आहेत. 

आदिशक्ती ज्योतीर्विद्यालात अनेक गोष्टीत सहभाग असणार्या सौरभ ला तिथे शिकवण्याचीही संधी मिळाली . अत्यंत प्रामाणिक पणे अध्ययन करणाऱ्या सौरभ साठीच नाही तर त्याच्या सर्व चाहत्यांसाठी
“ वस्तुस्थिती “ हि एक अभिमानास्पद गोष्ट आहे हे नक्की ,त्याबद्दल त्याचे मनापासून अभिनंदन. 

सौरभ इतक्या गोष्टी एकावेळी कश्या सहजतेने करतो हे माझ्यासाठी एक अप्रूप आहे. पण प्रत्येक गोष्ट मी का करत आहे आणि कुठवर करणार आहे ह्याबद्दलचे त्याचे  विचार अत्यंत स्पष्ट असतात . कुठलीही गोष्ट तळमळीने करणे त्यात जीव ओतणे ह्या त्याच्या स्वभावाचे प्रतिबिंब त्याच्या कामात दिसतेच.

ह्या क्षेत्रात काम करत खूप पुढे गेलेल्या सौरभ ला “ स्वतःची संस्था “ स्थापन करण्याचे मनसुबे आहेत का ? ह्या माझ्या प्रश्नावर  त्याने सांगितले सध्या तरी अनेक प्रोजेक्ट हातात असल्यामुळे त्याबद्दल विचार नाही.

ज्योतिष शास्त्र हे प्रत्येकाने शिकावे असे मला वाटते कारण मानवी जीवनाशी त्याचा नजीकचा संबंध आहे. ज्योतिषाचा अभ्यास हा आपली विचारसरणी , जीवनाकडे पाहण्याचा दृष्टीकोन ह्यात अमुलाग्र बदल घडवते हे सांगताना सौरभ ने अनेक उदाहरणे दिली .आपल्या बाबत जे घडतंय त्याला सर्वार्थाने आपणच जबाबदार आहोत त्याचा दोष इतर कुणाचाच नसून स्वतःचाच आहे हे मान्य करण्याची वृत्ती ह्या अभ्यासामुळे मिळते. स्वतःच्याच आयुष्यातील घटनांचा मागोवा घेताना त्या का घडल्या ह्याचे उत्तर मिळू शकते. परमेश्वराच्या निकट जाण्यासाठी ह्या शास्त्राचे अध्ययन उपयोगी पडते हे सांगताना सौरभ म्हणाला कि जीवन कसे जगायचे हे ह्या शास्त्रानेच मला शिकवले म्हणून मी त्यासमोर नतमस्तक आहे. 

आजच्या नवीन अभ्यासकांना तू काय सांगशील ह्यावर “ काहीच जमत नाही म्हणून मग आता मी ज्योतिषी होतो” असे न करता ह्या शास्त्राचे सखोल अध्ययन ,तळमळ, वेदांचा अभ्यास ह्या सर्व गोष्टीचा सखोल अभ्यास करण्याची मनोधारणा ,  जिद्द ,कष्ट करायची तयारी आणि सर्वात मुख्य म्हणजे संयम हवा हे आवर्जून सांगितले. चार सहा महिन्याच्या अभ्यासाने फलादेश करणे हे सर्वार्थाने चुकीचे आहे कारण ह्यात फलादेश चुकू शकतो आणि पर्यायाने जातकाचा ह्या शास्त्रावरचा विश्वास उडू शकतो. ह्या शास्त्रात अजून खूप अभ्यास करण्याला वाव आहे आणि त्यातील गोष्टींची समाजाला वेळोवेळी जाणीव करून देऊन समाज जागृती करण्याचीही नितांत आवश्यकता आहे. 

सौरभ तळमळीने सांगत होता कि हे शास्त्र महान आहे त्यामुळे अयोग्य शिष्याला ते शिकवले सुद्धा जाऊही नये. उगीचच शिष्यांची कुमक तयार करण्यात काहीच अर्थ नाही. तळमळीने शिकणारे आणि शिकवणारे महत्वाचे आहेत . हे शास्त्र शिकवताना स्वतःची उपासना , आपल्या कुलस्वामिनीचे स्मरण आणि  गुरूंची उपासना अतिशय महत्वाची आहे. कुठेही शिका पण जो ह्या शास्त्राचा गाभा तुमच्यासमोर ठेवील तोच खरा शिक्षक असेल.

सध्याची पिढी संशोधनात एक पाऊल पुढेच आहे त्यामुळे आजच्या तरुण पिढीने हे शास्त्र नक्कीच अभ्यासावे .

आजकाल ह्या शास्त्रात खूप फसवणूक होताना दिसते ह्यावर काय सांगशील ह्यावर सौरभ म्हणाला ह्यावर खूप बोलण्यासारखे आहेच पण प्रत्येकाने डोळसपणे विचार करणे सर्वात महत्वाचे आहे. भूतकाळात जो रमला तो भविष्य घडवू शकत नाही पण जो आत्ताचा क्षण परिपूर्णतेने जगतो त्याचे भविष्य निश्चितच उज्ज्वल आहे.

कुठल्याही ज्योतिषाकडे सल्ला मागायला न जाता विचार विनिमय करायला जाणे सर्वात उत्तम म्हणूनच प्रत्येकाने ह्या शास्त्राचे अध्ययन करावे. अश्यावेळी भावनाविवश होण्यापेक्षा प्रक्टिकल अप्रोच ठेवला तर चांगलेच होईल. वाट्टेल तितके पैसे देऊन रत्न घेण्यापेक्षा उपासना वाढवा त्याचा प्रत्यय जास्ती लवकर येयील.

तुझ्या गुरु सौ. शिल्पाताई ह्यांच्या बद्दल काय सांगशील ह्यावर सौरभ सद्गदित झाला . त्यांच्या सारख्या गुरु लाभणे हे माझे भाग्यच आहे कारण त्या नुसत्याच उत्तम शिक्षक अभ्यासक नाहीत तर त्यांच्या अध्यात्मिक बैठक उत्तम आहे. त्या सर्वश्रेष्ठ उपासक असल्यामुळेच जीवनातील नितीमुल्ये , अभ्यासाची दिशा कशी असली पाहिजे , काय सोडून द्यायचे अश्या अनेक गोष्टीत त्यांचे अनमोल  मार्गदर्शन नेहमीच मिळत असते. त्यांना ज्योतिषाबद्दल अतिशय कळकळ ,उर्मी आहे म्हणून त्या ह्या क्षेत्रात  अविस्मरणीय काम करत आहेत.

स्वतःच्या ज्योतिष वाटचालीबद्दल काय सांगशील ह्यावर त्याने अजूनही मी अभ्यासक आहे , अजूनही खूप काही वाचायचे आहे. अध्ययन करायचे आहे. अध्यात्मिक स्थर वाढवायचा आहे. प्रत्येकाने अभ्यासाला लागा कारण एका जन्मात शिकण्यासारखे हे शास्त्र नाही इतका ह्याचा आवाका मोठा आहे. 

ज्योतिष शास्त्राचे अध्ययन करणाऱ्या प्रत्येकाने ह्या शास्त्राविषयी जाज्वल्य अभिमान ठेवला पाहिजे म्हणजे ह्या शास्त्राला नावे ठेवणार्यांची संख्या आणि अश्या घटना ह्यांना खिळ बसेल हे सांगताना सौरभ म्हणाला स्वतःचे ज्ञान वाढवणे हे सर्वात उत्तमच.

भविष्यातील योजनांबद्दल काही विचार केला आहे का ह्यावर त्याने आम्ही काही इंजिनिअर मित्र मिळून पुढे एखादी संस्था काढण्याचा विचार करूही. आपल्या परंपरा , रूढी संस्कार , ग्रंथ  ह्यावर आपले उज्ज्वल भविष्य आहेच पण प्रत्येकाने ह्यात योगदान दिले पाहिजे. आपल्या चालीरीती , ऋषीमुनींनी आपल्याला वेद ,पुराण आणि अनेक शास्त्र ह्यांच्या रुपात दिलेल्या देणगीचा योग्य तो मान ठेवला पाहिजे.

सौरभ म्हणजे ज्ञानाचे भांडार आहे आणि त्याच्याशी गप्पा मारताना हे ज्ञानाचे दालन माझ्यासाठी देखील खुले झाले . भाषेवर उत्तम प्रभुत्व असणार्या सौरभने अनेक प्राचीन ग्रंथ सुद्धा अभ्यासले आहेत . सर्वात महत्वाचे म्हणजे ज्योतिष हे काळानुसार बदलले पाहिजे कारण जातकाचे प्रश्न हे सुद्धा काळानुसार बदलत असतात  आणि ह्याचे भान ज्योतिष अभ्यासकांनाअसणे आवश्यक आहे. नुसती विद्यार्थ्यांची झुंबड तयार न करता त्यातून हुशार ज्योतिषी कसे तयार होयील हा एक मोठा चालेंज आहे असे त्याने आवर्जून सांगितले. इतका मोठा विषय समजावून घेणे आणि समजावून सांगणे हीसुद्धा एक साधनाच आहे. हा विषय समाजाच्या आणि आपल्या वैयक्तिक आयुष्यासाठी हिताचा असल्यामुळे त्याचे गांभीर्य लक्ष्यात आले पाहिजे.भविष्य कथन करणाऱ्या प्रत्येकाला साधना ,उपासनेची बैठक अत्यावश्यक आहे. सौरभ च्या आजवरच्या यशाचे गमक म्हणजे नुसतेच पुस्तकी पांडित्य नाही तर त्याने स्वतः चौकटीच्या बाहेर जाऊन संपादन केलेले ज्ञान . शास्त्राचा अभ्यास करण्याची तळमळ, परिपूर्णतेकडे जाण्याची धडपड ,स्वतःचे दिलेले योगदान ,मनन ,चिंतन हेच आहे. शास्त्रातील एखादा नियम सिद्ध झाला पण तो कसा झाला त्याची कारणमीमांसा करण्याची जिज्ञासू वृत्ती ,डोळसपणे एखाद्या पत्रिकेचा केलेला अभ्यास ह्या सर्वांमुळे त्याचा व्यासंग वाढला आहे. 

 

आज त्याच्या गुरु सौ. शिल्पाताई ह्यानाही अभिमान वाटेल अशी प्रशंसनीय कामगिरी त्यांनी केली आहे त्याबद्दल त्याचे करावे तितके कौतुक कमीच आहे.  गुरुशिष्य परंपरेला साजेल अश्या ह्या व्यक्तिमत्वाचा शास्त्राच्या अभ्यासातील प्रवास तुमच्यासमोर उलगडून दाखवण्यासाठी हा लेखनप्रपंच.

“ वस्तुस्थिती “ आज प्रत्येक ज्योतिष प्रेमींचा हृदयापर्यंत पोहोचत आहे. आजवर झालेली  40 व्याख्याने ,एकापेक्षा एक उत्तम वक्ते , त्यांनी हाताळलेले विषय ,त्याची मुद्देसूद मांडणी , उत्तम संकलन ह्यामुळे ज्योतिषप्रेमींच्या अपेक्षा वाढत आहेत. भविष्यात अंकशास्त्र आणि तत्सम विषयावरील व्याख्यानांचाही आस्वाद “ वस्तुस्थिती “ वर ज्योतिष अभ्यासकांना घेता येणार आहे.

जीवनात खूप काही हटके करता येते किबहुना तसाच प्रयत्न प्रत्येकाचा असला पाहिजे ह्याचा आदर्श आजच्या तरुण पिढीसमोर सौरभने घालून दिला आहे . एखादी कल्पना मनात येणे आणि ती प्रत्यक्षात उतरवणे ह्या दोन भिन्न गोष्टी आहेत . अभ्यासू वृत्ती , परिश्रमाची जोड जीवनात यशश्री खेचूनआणतेच ह्याचे “ वस्तुस्थिती” पेक्षा हटके उदाहरण असूच शकत नाही . मी ज्ञान संपादन करत आहेच  पण त्याहीपेक्षा 16 आणे खरे ज्ञान हातचे काहीही राखून न ठेवता भरभरून देत आहे त्याचा आनंद आणि समाधान सौरभच्या बोलण्यातून जाणवत होते. समाधान हि आयुष्यात खरच खूप मोठी गोष्ट आहे. समर्पणाची भावना असेल तर प्रत्येक कलाकृती माणसाला आत्यंतिक समाधान देऊन जाते. 

आज सौरभ ने आपल्याला सगळ्यांना खरच हटके ज्ञान दिले ,त्याच्या डोळ्यांनी ज्योतिषा कडे पाहताना नवा दृष्टीकोन लाभला. नुसतेच पुस्तकी पांडित्य नाही तर त्यावर स्वतःचा अभ्यास , संशोधन ,चिंतन ,सातत्य किती आवश्यक आहे हे अनुभवता आले. 

“ वस्तुस्थिती “ काहीतरी वेगळे देऊ पहात आहे .आम्हा सर्व ज्योतिष अभ्यासकांसाठी आपल्या ह्या मराठी माणसाचे ज्ञानप्रद chanel हि अभिमानाची गोष्ट आहे. जनमानसातून त्याला उत्स्फूर्त प्रतिसाद मिळत आहे . “ वस्तुस्थिती “ च्या यशाचे मानकरी ह्या उपक्रमात सहभागी असणारे सर्व वक्तेही आहेत .त्यांच्यामुळे ह्या chanel चे  वेगळेपण जाणवल्याशिवाय रहात नाही . अनुभव घेण्यासाठी  ह्या chanel ला अवश्य भेट द्या आणि अभिप्राय सुद्धा कळवा .

आपण आयुष्यभर प्रवास करताच असतो .पण एका वेगळ्या वाटेवरचा प्रवास आपल्याला खऱ्या अर्थाने जगायला शिकवतो. जीवन समृद्ध करतो आणि नवा दृष्टीकोन सुद्धा देतो. जीवन जगताना स्वतःचे अस्तित्व सिद्ध करणे ,काहीतरी मिळवणे आणि प्रत्येकाच्या स्मृतीत राहील असे काम करणे हीच तर आनंदी जिवनाची गुरुकिल्ली आहे. आज शिक्षक दिनाच्या निम्मित्ताने ह्या गुरु शिष्यांबद्दल लिहिताना मला अनेक गोष्टी नव्याने उलगडल्या हे आवर्जून सांगावेसे वाटते. कुटुंबवत्सल सौरभशी झालेल्या  दिलखुलास गप्पा रंगत गेल्या.आपल्यातील एक मराठी मुलगा काहीतरी वेगळे करत आहे त्याचा एक मराठी भाषिक म्हणून मला अभिमान आहे. 

प्रत्येकाला जीवनात अशीच आनंदाची ध्येयपूर्ती करणारी “ हटके “ वाट मिळूदे आणि त्यावरील त्यांचा प्रवास ज्ञानाची अनेक दालने खुली करणारा असो हीच स्वामींच्या चरणी प्रार्थना. सौरभच्या “वस्तुस्थिती” आणि पुढील ज्योतिषमय वाटेसाठी खूप शुभेछ्या. हा प्रवास आनंदयात्राच आहे आणि ह्यात आपण सगळेच त्याचे सह प्रवासी आहोत. " वस्तुस्थिती " सर्वाना मार्गदर्शक ठरणार आहे ह्यात दुमत नाही.

अस्मिता

antarnad18@gmail.com

#अंतर्नाद#वेगळ्यावाटा#ध्येय#ज्योतिषमय#वस्तुस्थिती#वास्तुशास्त्र#चिंतनशील#नव्यापिढीलाआदर्श

तुम्हालाही अशीच वेगळी वाट निवडायची असेल किंवा मार्गदर्शन हवे असेल तर संपर्क करा.

श्री. सौरभ नाफडे ( वास्तू ज्योतिष )

scnaphade@gmail.com

website : www.vastustithi.com